Comunicat stampa

USP – Ai 5 de dezëmber fovel unì giaurì la Rë zivica dla Provinzia de Bulsan nce tla rujeneda ladina. La bilanz di prim 100 dis (ai 15 de merz) mostra su che l ie nteres per l portal de nfurmazion tla rujeneda ladina y che la populazion ladina a scumencià a se usé dl servisc de nutizies, di servijes dl’aministrazion publica y dla banches dac. Drët vijitedes ie nce la previjions meteo tla rujeneda ladina.

USP – Per mparé a cunëscer co che vën purtà inant la rë dl internet aslune tl Südtirol à na delegazion dl ciamp economich dla Stiria n lunesc ai 12 de merz ancuntà l asssessëur provinziel Florian Mussner a Bulsan. Per i reprejentanc dal’Austria se tratovel dantaprima de mparé dal’esperienza tl Assessorat ai lëures publics ajache ëi ulëssa ënghe mëter a jì na tel rë.

L program de pruvedimënc acioche jëuni zënza lëur ruve pra na stiera, la unificazion di sistems informatics per dl’aministrazion publica dala Provinzia nchin ai chemuns y l paië do de cuntribuc mpermetui a pendolares ie stai i ponc de majer nteres tratei dala Jonta provinziela y prejentei dal presidënt Durnwalder te cunferënza stampa.

USP – Pendolares che ova damandà n cuntribut dala Provinzia dëssa prësc giapé si pert mpermetuda. Per dumandes nueves unirà i criteries laurei ora da nuef.

USP – Per pudëi lauré cun la medema nfurmazions y per se baraté ora i dac, uniral metù a jì n sistem informatich unificà danter Provinzia, spediei, cumuniteies raioneles y chemuns. Per chësc mpëni à la Jonta provinziela (NCUEI) ai 11 de merz dat pro de aumenté l capital dla sozietà de nfurmatica SIAG.

USP – Te chësc mumënt iel tl Südtirol 11,6 percënt di jëuni zënza lëur. Per ti judé ai jëuni a abiné na stiera à la Jonta provinziela (NCUEI) ai 11 de merz dat pro n program de set ponc y n finanziamënt de na milion de euro. Aldò de ultima cumpededes iel tl Südtirol 626 jëuni sota 30 ani zënza lëur y che ti mancia cumpetënzes per abiné na stiera.

USP – La scuadra de Fascia à venciù la cuarta edizion dl turnoi de hockey per sculeies dla mesanes ladines. L’ancunteda sportiva danter la cin valedes ladines dla Dolomites a Alie (Alleghe) à purtà pro a miuré i cuntac danter la scoles y a n mparé a se cunëscer miec danter sculeies.

USP – L’urganisazion dla fundazion che aministrea l’arpejon mundiela Unesco – Dolomites, dëssa deventé plu megra. I prim vares de chësc viers iel unic fai n vënderdi 8 de merz pra na senteda dl cunsëi de aministrazion te chëla che l assessëur Elmar Pichler Rolle à reprejentà l Südtirol. Ai prim de juni passerà la presidënza de chësta fundazion al Südtirol.

USP - Per sustenì l cianté te scola fovel bele dan man n liber cun cianties per talian. Śën iel unì tëut su na CD per l nseniamënt tla scolines y tla scoles elementeres. L proiet nuef dl Servisc Inuvazion y Cunsulënza per la scoles ladines unirà prejentà ai 20 de merz te Sëlva.

USP – Ala fin dl ultimo ann ie unì marciadà l program de servisc cun la RAI, pra chël che zapa ite per l prim iede nce la Provinzia. (INIER) Ai 7 de merz se à la cumiscion paritetica danter Stat, RAI y Provinzia ancuntà per l prim iede a Roma per stlarì i prim vares per aumenté l tëmp de trasmiscion y per n renuvamënt tecnich.