Comunicat stampa

USP – “Dificulteies de tò su nfurmazion y de les lauré ora tl cë da pitl insù” nscì se mostra for inò l autism te nosta sozietà . N mierculdi ai 16 de merz uniral pra n cunvëni nternaziunel a Bulsan analisà manieres per se udëi ora cumpurtamënc autistichs. La trëi ntendënzes ala scoles à nvià esperc de inuem nternaziunel y per n mierculdi se à bele nunzià passa 400 nteressei dl mond dla scola y dla sanità.

USP – Doi puenc nueves sun l Jëuf de Sela, la streda sota Plan de Gralba, dlandri a S.Cristina y miuramënc a Runcadic: chisc ie i lëures che l Assessorat provinziel per lëures publics à prugramà per chëst ann sun la stredes de Gherdëina. Sun pruposta dl assessëur Mussner à la Jonta provinziela da permò dat pro l program generel per l ann 2011.

La formaziun di insegnanc’ nöia, aladô dl decret che gnarà fat aposta por nosta provinzia, é stè l’argomënt de n’incuntada danter i responsabli dla Scora ladina y i rapresentanc’dla Facolté de Sciënzes dla Formaziun a Porsenù.

USP – Chisc dis vëniel spartì ora l’ultima pert dla 400.000 chertes saniteres nueves che cun n microchip puderà unì nuzedes per na lingia de servijes dl’aministrazion publica. La cherta sanitera – cherta provinziela di servijes, puderà da (ncuei) ai 7 de merz unì metuda n drova pra la purtines anjeniedes ite aposta.

USP – La statistica sun i ejams de bi- y trilinguism, publicheda dal’Astat, mostra su che i candidac ladins passa scialdi plu saurì i ejams permez ala cumpëida generela. “Feter 70% di ladins passa l ejam permez ala cuota provinziela de 42%, ie chësc n sëni tler che nosc sistem scolastich porta de bon resultac y che i Ladins à de bona cunescënzes de nosta trëi rujenedes” sorissea l assessëur Florian Mussner.

USP - L tunel de Petlin sun l stradon de Gherdëina a Urtijëi, vën chëst ena puzenà. Da n mierculdi ai 9 nchin a n vënderdi ai 11 de merz saral de nuet me mesun passé te una direzion al iede.

USP – Feter mile sculeies de mujiga sarà dai 9 nchin ai 18 de merz cuncurënc dl cuncors de mujiga per dut l Tirol “prima la musica”. Chëst ann vëniel metù a jì tl Südtirol y coordinà dala Scoles de Mujiga de Tluses y de Sëuc. L’assessëures provinzieles Kasslatter Mur y Beate Palfrader dl Tirol à (ncuei) ai 4 de merz prejentà l cuncors a Bulsan.

USP – Normatives plu tleres per frabiché sun Mont Sëuc, ie l resultat dla senteda dla cumiscion provinziela per la defendura dla cuntreda, stata n merdi ai prim de merz. La cumiscion à azetà mudazions al plann de cuntreda per la Mont Sëuc che reverda l frabiché sëura tiera y nce sota tiera.

USP – N lunesc, ai 7 de merz saral sun la streda de Gherdëina, danter Tluses y Puntives da aspité. Te doi tuniei uniral fat lëures y perchël messeran for inò saré la streda per n chert‘ de ëura.

USP - L abunamënt nuef per l trasport publich ie pert de n sistem nuef da nuzé plu saurì. De plu permez a sën, paierà n auter ann chiche se nuzea puech de curieres, ferates y furnadoies publiches. „L prudot nuef se pieta nce per grupes nueves y per mutivé pendolares a tò i mesuns publics nce te si tëmp liede“, à cunedì l assessëur Thomas Widmann (ncuei) n merdi danmesdì, ai 03 de fauré ntan la prejentazion a Bulsan.