Comunicat stampa

USP – L Istitut per cuatieres soziei IPES cumederà ca na cësa de 10.500 cubich tla streda Runcat. Almanco mesa de chësta cubatura unirà nuzeda per fé ora feter 25 cuatieres per jënt de davani mesan. Chësta pruposta dl’assessëur Tommasini ie (ncuei) ai 4 de auril unida data pro dala Jonta provinziela.

USP – Pra l’ancunteda di alpini, n auter ann d’ansciuda a Bulsan, se aspieten che l vënie adalerch 400.000 persones. La Jonta provinziela ie una de judé pea pra chësta gran manifestazion, ma se damanda nce la coordinazion aldò.

USP – La Jonta provinziela ie a una de tò su muciadives dla Libia n relazion ala cumpëida dla populazion. De uedl critich vëniel al incontra udù l’idea de fé i cuntroi di imigrei zënza lizënza tl Südtirol. L assessëur Berger tulerà (DUMAN) n merdi ai 05 de auril pert ala proscima ancunteda danter Stat y regions.

USP – Chisc dis scomëncion cun i laûrs por dortoré la strada danter San Martin y Lungiarü. Sön inciaria dl Assessorat provinzial por i laûrs publics vëgnel deslarié y avalié la strada por garantì na miù viabilité y de plü segurëza sön strada.

USP – Davia che l vën laurà sun la streda dla Val Badia, puderà l muvimënt di auti a Picolin, me passé te una direzion al iede. Chësta regulamentazion ie ududa dant nchin mez lugio.

USP – Reprejentanc dl servisc de ntegrazion dla scoles ladines lëura ativamënter te na grupa nternaziunela de metodologies dl mparé y per sustenì la ntegrazion tl’Europa. Tla Romania iel da permò uni tenì n’ancunteda sun cunzec de sustëni per mprenditëures jëuni che uel meter su firmes nueves y nsci dé da lëur a jënt. La proscima ancunteda sarà tl Südtirol per mparé a cunëscer proiec de ntegrazion tla scoles ladines.

USP – Co che l vën curà y mantenì la rujeneda y cultura ladina nteressea nce l’Ambasciata britanica. L assessëur Mussner à (NCUEI) ai 31 de merz prejentà la realtà ladina a Andrew Jacksen, culaburadëur dl ambasciata a Viena.

USP – Imigrei che ne respetea nia la lege resta de cumpetënza dl Minister dl intern, ma muciadives unirà nce tëuc su dala regions. Sun chësta posizion ie (N SËIRA) ai 30 de merz ruvei a una i reprejentanc dla regions talianes. I muciadives dëssa unì tëuc su n relazion ala cumpëida dla populazion, nsci iesen ruvei a una danter l Stat y la regions. L Südtirol ie te chësta tratatives unì reprejentà dal vizepresidënt Hans Berger.

USP – Vën pa l’esigënzes de nosta sozietà y dla scola ladina curides cun la furmazion atuela di nsenianc? La resposta dëssa dé n cungres scientifich metù a jì n ucajion di 10 ani dla Repartizion ladina d’Università de Bulsan. Esperc de furmazion, respunsabli dl’università y dla scola ladina, deberieda cun l assessëur provinziel ladin y respunsabli da vita soziela fajerà l pont dla situazion n cont dla furmazion di nsenianc ladins. L cungres dal titul “Le ladin tl sistem furmatif” vën tenì n mierculdi ai 6 de auril tla sënta universitera a Persenon.

USP – Fora por les valades prinzipales dl Südtirol él bele gnü metü les fires otiches por l’internet asvelt; cina dl 2013 désseres avëi arjunt düc i comuns a na moda che la comunicaziun digitala arjunjes n livel alt te döta la provinzia. En lönesc, ai 28 de merz (inier) à la Junta provinziala aprovè le program anual por les infrastrotöres dl internet a banda leria presentè dal assessur Florian Mussner. A chësta manira él gnü garantì investimënc por 8,3 miliuns de euro. Feter n terzo de chësta soma vëgn spenü ite por la Val Badia.