Comunicat stampa

USP – Da n merdi ai 19 nchin sada 23 de auril uniral de nuet salansà i tuniei sun la streda de Gherdëina da Tluses ite. Per via de chisc lëures puderan me passé i tuniei te una direzion al iede.

USP – Ciun che dëssa vester l svilup urbanistich de Gherdëina ie unì studià da grupes de lëur di chemuns de Gherdëina y chemuns ujins, cun l sustëni dl’Academia Europeica EURAC. I resultat, metù adum tl cunzet tlamà Masterplan per Gherdëina ie unì sëurandat ufizialmënter ai ambolc de Sëlva, S.Cristina, Urtijëi, Ciastel y Laion per l’apruvazion y per la realisazion. Per l assessëur provinziel Laimer ie chësc n strumënt inuvatif de planificazion urbanistica de ejëmpl nce per d’autri raions.

USP – Canche i mplanc portamont sera d’ansciuda, ne iel mo nia gheneda sun i purtoies y sun la montes. Nscila iela inò stata n lunesc de chëst ena (ai 11 de auril): sun Plan de Gralba à culaburadëures dla Furestela fermà su set motoslites che ova fat la Sellaronda. Da pert dla stazion dla Furestela de Persenon vëniel lecurdà che de tel raides cun la motoslites ie pruibides per lege ti raions sota defendura y che l vën fat cuntroi dedichei.

USP – L’ultimo tòch dla strada dla Val Badia dan rové a Picolin che ne n’ê nia ciamò gnü miorè, vëgn deslarié i proscimi mëisc. Tratan i laûrs che é odüs danfora cina d’agost, po i auti ma passè te öna na direziun al iade.

USP – Al valor culturel de nosc raion tla Dolomites fova dedicà l cuncors de scrì per ladin per la scoles dla provinzia de Bulsan y de Trënt. Tla trëi categuries à venciù Stefano Rizzi dla Scola auta de Poza, Maximilian Palfrader dla scola mesana de Al Plan y Emilia Bonata y Tatjana Runggaldier dl’elementera de Sëlva. La premiazion unirà tenida ai 29 de auril te Sëlva.

USP – I campionac dl mond di artejans a Londra y la mostra di artejans te Gherdëina ie stai argumënc dl’ancunteda danter l assessëur provinziel per l artejanat y i respunsabli dl’assoziazion provinziela per l artejanat LVH.

USP – N var inant à fat l proiet dla cherta sanitera-cherta di servijes. Dal 11 de auril iel cun chësta cherta mesun se nuzé de na lingia de servijes digitei che va dala borses de studi, la borses dl lëur nchin ai cuntribuc per l ulentariat. Te chësta prima fasa ulache la jënt possa mparé a cunëscer i servijes E-government, iel nce mesun se nuzé di servijes ala vedla maniera cun username y password.

USP - Ai 12 de auril dala 09.01, avisa n ann do la desgrazia tragica dla ferata dla Venuesta danter Kastelbell y Latsch iel ncuei unì descurì n sas de lecord ala nuef vitimes. “On udù cosses che ne an dant mo mei udù y che ne desminceron mei” à dit l presidënt dla provinzia che à nce lecurdà dl gran mpëni dla scuadres de prim aiut.

USP – Proscimamënter scumëncia di dis de educazion politica 2011. Dlongia manifestazions daviertes a duc, à la repartizion per la furmazion nce njenià ativiteies per la scoles. Davia che la cumpëida ie limiteda dëssa maestri nteressei se nunzië per tëmp.

USP – Per pudëi nsenië tla scoles ladines muessen sëuraprò ai tituli de studi nce avëi n ejam de ladin dedicà. 27 candidac ie chëst ann passei l ejam de ladin per nsenianc.