Comunicat stampa

USP – Dan doi ani, ai 23 de auril, ova l Ufize stampa dla Provinzia de Bulsan mudernisà si plata internet tla rujeneda ladina. La cumpëides de tanc che se à nuzà de chësta plata web cun i comunicac, fotos, ntervistes audio y video desmostra che l nteres per l servisc de nfurmazion tla rujeneda ladina devënta for majer. Ntan l ultimo ann iel unì cumpedà 37.884 vijites.

USP – Chisc dis vëniel scumencià i lëures per fé sun n gran mur dedora da Puntives per tenì su l rone sëura streda. L Servisc provinziel per la stredes tl raion Salten Scilier fej chësc mur a na maniera da scunjeré l pericul che tome ju sasc. Ntan i lëures saral for inò de bujën de fermé i auti. Nchin tla segonda ena de mei puderan me passé te una direzion al iede.

USP – Per la Jonta provinziela ne iel nia da pesimé n cont dl pudëi cialé ai cuntrac dla SEL cun ENEL y Edison. “L ie na sentënza dl Cunsëi de Stat a chëla che tramedoi pertes muessa se tenì” dij la Jonta provinziela. Chësc uel di che la SEl muessa ti lascé udëi i cuntrac ai cunselieres di Vërc, ma ëi ne possa nia purté i cuntenuc al publich.

USP – La vijita ala scoles ladines da pert de na grupa nternaziunela tl ciamp dla furmazion ti à dat gran crëta per realisé l’inuvazion tla furmazion de sculeies cun handicap scrita dant dala Union Europa. Ntan ancuntedes a Sarns y vijites a scoles de Urtijëi iel unì prejentà a esperc da cin nazions doi ponc stersc dla scola ladina, la metodologies de ntegrazion y l nseniamënt dla rujenedes.

USP – La Provinzia de Bulsan ie una dla pueces che ne à nia scurtà mesuns tl ciamp dla scola. Chësc ie unì ora dala tlausura dla Jonta provinziela ulache l ie unì tratà cuestions aministratives do che ie unides fates la iscrizions per l ann de scola nuef cun la reforma dla scola auta.

USP – Sun 95% dl raion provinziel ie bele mesun giapé l internet debota, purempò uel la Jonta provinziela mo miuré la cualità. Per ruvé tan inant vëniel metù cabli de fibres otiches, tratà i operadëures dla telefonia y miurà la rë de antënes. Tla tlausura dla Jonta provinziela iel unì tratà programs de miuramënc.

USP – N lunesc ai 2 de mei uniral metù tu su la tofles de spiegazion pra i ossares de Mals y Gossensaß. A chësta maniera vëniel realisà la soluzion per contestualisé doi reperc dl fascism, che univa udui de pericul per l cunviver dla grupes etniches.

USP – L barat cun cun la casermes vëija dant che l Stat dà puscion militeres che l ne adrova nia plu y che la Provinzia feje cuatieres per i ufezieres sun la puscion che ti resta al Stat. Per purté inant i programs plu a slune à la Jonta provinziela fat ora de spënder ite plu scioldi.

USP – L sustëni ai zitadins per n cuatier ie stat un di gran argumënc tratei dala Jonta provinziela ntan si tlausura ai 21 y 22 de auril. I ponc zentrei ie stai la formes de sparanië per pudëi frabiché, la cundizions do avëi giapà cuntribuc provinziei y l pest de cubatura.

USP – La tofles di troies da mont dëssa cialé ora sciche ti autri paejes dl’Elpes. La Jonta provinziela à ntan si tlausura azetà la pruposta dl assessëur Berger de sëurantò standards nternaziunei.