Comunicat stampa

USP – A Urtijëi à (ncuei) ai 24 de mei messù unì fermà i lëures y sarà n cantier ajache l ne ie nia unì garantì la segurëza di lauranc. I ispetëures dl Ufize provinziel per scunanza tecnica dl lëur à messù tò chësc pruvedimënt ajache l manciova defin la mesures de segurëza y ajache l ie unì frabicà zënza respeté la regules scrites dant per lege. De plu lauranc à laurà a na autëza de feter 10 metri de autëza zënza vester segurei.

USP – 7.507 sculeies dala terza elementera nchin ala cuinta tlas dla scola auta à chëst ann fat pea l cuncors „Kangaroo dla matematica“ per la scoles de rujeneda tudëscia y ladina. Danter i sculeies dla terza tlasses mesanes à venciù Klaus Prinoth dla scola mesana de Urtijëi che à arjont l miëur resultat de duta la categuries. N merdi (ncuei) ai 24 de mei ie tl palaz Widmann a Bulsan unì premiei 55 sculeies.

USP - Per museré la cumpetënza dla rujenedes tla scoles ladines à l Cumité per l’Evaluazion nvià via n’analisa sun basa scientifica. I resultac sun la cumpetënza dl tudësch, talian y ladin di sculeies dla scoles autes unirà prejentei n mierculdi ai prim de juni tl’Università a Persenon. Ala prejentazion cun i prufessëures Rita Franceschini y Pasquale Della Rosa ie nviei duc i nteressei.

USP – L barat danter l Stat y la Provinzia va inant. Da permò iel unì sotscrì n’acurdanza che la Provinzia frabica, concia su o compra sies casermes per i Carabinieri y la Polizia, y giapa lessù puscions stateles che à l medemo valor. “Chësta puscions ie de gran mpurtanza per l svilup de nosta ziteies y luesc” dij l presidënt Luis Durnwalder. Una de chësta casermes unirà nce cumpreda a Badia.

USP – Chisc dis vëniel sun la streda dl jëuf de Frea, dala pert de Corvara y sun la streda dla Val Badia jit inant a museré l deslivel. Ntan chisc lëures, che ie udui dant nchin ai 17 de juni iel da fé cont che la streda messerà uni tant unì sareda de fin o che l sarà a aspité pra n semafer.

USP - Ferates nueves, promozion y sburdla economica tres sustëni ala produzions de films tl Südtirol, l program per aspité demanco te spedel, bonus de cubatura y l bilanz dl zënter per avisé segures. Chisc ie stai i argumënc prinzipei che l presidënt dla Provinzia Durnwalder à prejentà te cunferënza stampa, ncuei ai 23 de mei riesc do la senteda dal Jonta provinziela.

USP – La Jonta provinziela uel sëurantò l bonus de cuabatura udù dant dal Stat ma me sce l vën nce fat n ressanamënt per sparanië energia. “Chësc pruvedimënt dëssa nce purté vantajes al ambient y ala cumenanza” à sorissà (ncuei) ai 23 de mei l presidënt Durnwalder do la senteda dla Jonta provinziela.

USP – I ulenteres che fej servisc de prim aiut possa pité assistënza ai dutores, ma sciche i nfermieres ne possi nia tò nstësc dezijions n cont de traté i pazienc. La Jonta provinziela à (ncuei) ai 23 de mei segurà chësta regulamentazion che ie nce scrita sun la lëtra dl 2006 dl assessëur Richard Theiner.

USP – Tenian cont di urientamënc bele dai pro, à la Jonta provinziela (ncuei) ai 23 de mei azetà l program per smendrì l aspité per prestazions spezialistiches. N se à tëut dant che i pazienc dëssa aspité al plu nchin a 60 dis per caji che se lascia spusté y te ezezions nchina 120 dis.

USP – Sciche udù dant pra la giaurida dl zënter per avisé segures dl 2008, dëssa l Safety Park fé jì a ega l bilanz da chëst ann. Chësc ie (ncuei) ai 23 de mei unì fat ora dala Jonta provinziela.