Comunicat stampa
Provinzia y chemuns per n model nuef de finanziamënt
USP – La maniera de finanzië i chemuns dëssa unì laureda ora da nuef. De chësc ie (inier) ai 28 de auril stai a una la Jonta provinziela y l Cunsëi di chemuns. Da nuef dëssa nce unì metù a jì la spartizion di scioldi danter i chemuns per arjonjer na spartizion plu giusta.
Provinzia y chemuns per na cumiscion sun la chëuta turistica
USP – La Provinzia y i chemuns uel mëter a jì da nuef l finanziamënt dla urganisazions turistiches, te ce forma iel mo da udëi, tler iel che l muessa respeté i bujëns dla situazion. Riesc do l’ancunteda danter Jonta provinziela y l cunsëi di chemuns, à l presidënt Durnwalder (inier) ai 28 de auril cunedì che la regulamentazion nueva unirà bonamënter nvieda via cun la lege finanziera.
Bulsan resta sënta per la fabrich dal acel, la Provinzia fej na reduzion dl fit
USP – La firma dal acel Valbruna puderà resté a Bulsan Sud seguran nce sce l ie tëmps de crisa, la stieres. Chësc à i dirijënc dla firma segurà al assessëur Roberto Bizzo che à da pert dla Provinzia arbassà 50% dl fit per la fabrich a Bulsan. L cuntrat danter Valbruna y la Provinzia ie unì sotscrì (ncuei) ai 28 de auril.
L nteres al servisc ai media ladins devënta for majer
USP – Dan doi ani, ai 23 de auril, ova l Ufize stampa dla Provinzia de Bulsan mudernisà si plata internet tla rujeneda ladina. La cumpëides de tanc che se à nuzà de chësta plata web cun i comunicac, fotos, ntervistes audio y video desmostra che l nteres per l servisc de nfurmazion tla rujeneda ladina devënta for majer. Ntan l ultimo ann iel unì cumpedà 37.884 vijites.
Lëures sun la streda de Gherdëina per seguré l crëp de Puntives
USP – Chisc dis vëniel scumencià i lëures per fé sun n gran mur dedora da Puntives per tenì su l rone sëura streda. L Servisc provinziel per la stredes tl raion Salten Scilier fej chësc mur a na maniera da scunjeré l pericul che tome ju sasc. Ntan i lëures saral for inò de bujën de fermé i auti. Nchin tla segonda ena de mei puderan me passé te una direzion al iede.
Jonta provinziela sun l cialé di documënc dla SEL
USP – Per la Jonta provinziela ne iel nia da pesimé n cont dl pudëi cialé ai cuntrac dla SEL cun ENEL y Edison. “L ie na sentënza dl Cunsëi de Stat a chëla che tramedoi pertes muessa se tenì” dij la Jonta provinziela. Chësc uel di che la SEl muessa ti lascé udëi i cuntrac ai cunselieres di Vërc, ma ëi ne possa nia purté i cuntenuc al publich.
Metodologies dla scola ladina ti dà crëta a vijitadëures nternaziunei
USP – La vijita ala scoles ladines da pert de na grupa nternaziunela tl ciamp dla furmazion ti à dat gran crëta per realisé l’inuvazion tla furmazion de sculeies cun handicap scrita dant dala Union Europa. Ntan ancuntedes a Sarns y vijites a scoles de Urtijëi iel unì prejentà a esperc da cin nazions doi ponc stersc dla scola ladina, la metodologies de ntegrazion y l nseniamënt dla rujenedes.
Jonta provinziela ne scurta nia tla furmazion
USP – La Provinzia de Bulsan ie una dla pueces che ne à nia scurtà mesuns tl ciamp dla scola. Chësc ie unì ora dala tlausura dla Jonta provinziela ulache l ie unì tratà cuestions aministratives do che ie unides fates la iscrizions per l ann de scola nuef cun la reforma dla scola auta.
Miuramënc per internet slune y telefonia
USP – Sun 95% dl raion provinziel ie bele mesun giapé l internet debota, purempò uel la Jonta provinziela mo miuré la cualità. Per ruvé tan inant vëniel metù cabli de fibres otiches, tratà i operadëures dla telefonia y miurà la rë de antënes. Tla tlausura dla Jonta provinziela iel unì tratà programs de miuramënc.
Reperc dl fascism: ai 2 de mei la prima tofles
USP – N lunesc ai 2 de mei uniral metù tu su la tofles de spiegazion pra i ossares de Mals y Gossensaß. A chësta maniera vëniel realisà la soluzion per contestualisé doi reperc dl fascism, che univa udui de pericul per l cunviver dla grupes etniches.