Comunicat stampa

USP – Ntan i ultimi cin ani ie tla provinzia de Bulsan smendrida la grandëza dla families. La mesaria de davani de familia ie resteda feter unfat. Tla prejentazion stata (ncuei) ai 03 de fauré a Bulsan à l presidënt dla Provinzia Durnwalder valutà i resultac dl studi sciche na resposta positiva ai pruvedimënc contra la crisa finanziera y sciche cheder dla situazion atuela dla families.

Chëst ena che vën, dai 7 ai 11 de fauré, tën l aucat populer udienzes te de pu luesc. La Udienzes te Gherdëina sarà n juebia ai 10 de fauré, l di do, vënderdi ai 11 de fauré vën chësc servisc pità tla Val Badia.

USP – La materies che unirà damandedes tla segonda prova scrita dl’ejam de stat tla scoles autes ladines ie unides crisses ora. Tla trëi sezions defrëntes se tratela de economia aziendela, rujenedes fulestieres y dessëni. La Ntendënza ladina a una cun l Minister dl Istruzion a Roma à nce fat ora ciuna materies che vën damandedes ora a usc dai cumëmbri dla cumiscion che vën da d’autra scoles.

USP – I set parcs naturei dl Südtirol giapa pra si ntredes prinzipeles nueva tofles de nfurmazion. Ntan l fin dl’ena se à l assessëur Laimer fat n cheder dla situazion tl parch dla Drei Zinnen.

USP - “Te nosc tëmps ie la pruvocazions sun i monumënc dl fascism per nia” nsci la posizion dla Jonta provinziela n cont dla mpermetuda dl minister talian Bondi de pudëi tò demez reperc dl fascism. “La populazion de rujeneda taliana ne se identifichea nia cun l fascism” à dit Durnwalder, che vëija l tò demez dla pruvocazion de utl per la cunvivënza. L monumënt dla vënta a Bulsan y i ossares sun la sëides dëssa resté, l relief sun l palaz dla finanza y l alpino de Burnech dëssa unì tëuc demez.

USP – L’Università de Bulsan se à sëurantëut la ncëria de valuté ciun nseniamënt universiter tla Talia o oradecà che dëssa unì recunesciù per l bilinguism. La cooperazion danter Provinzia y Università de Bulsan ie unida azeteda (ncuei) ai 31 de jené dala Jonta provinziela.

USP – Do che la Provinzia de Bulsan se ova metù adum cun chëla de Trënt per damandé n sustëni europeich per la stieres jites perdudes tesć la crisa finanziera, à l presidënt Durnwalder (ncuei) do la senteda dl 31 de jené cunedì che l’Union Europea à azetà l dumanda y che l unirà scrit ora n cuncors per patrons de lëur.

USP – La Jonta provinziela à tei si senteda dl 31 de jené (ncuei) scumencià a traté n sistem nuef de abunamënt al trasport publich. N ulëssa pité n sëul abunamënt che vel per dut l raion provinziel a na maniera che sëuraprò al viac che n fej plu suvënz, possel nce unì adruvà per vel viac te n auter raion. I priejes che ne fova nia plu unic tuchei per 15 ani muessa unì auzei. L sistem nuef premia chiche fej plu chilometri cun l servisc publich.

USP – Pra l cënsimënt dla populazion dla provinzia de Bulsan, de utober 2011 uniral adurvà na regulamentazion nueva per la detlarazion dla grupa de rujeneda. La Jonta provinziela à te si senteda (da ncuei) dl 31 de jené dat pro che per la detlarazion a fin de statistica dëssel me unì tëut n cunsciderazion i zitadins de naziunalità taliana che à l di de referimënt la residënza tla provinzia. A chësta maniera giapa i ladins, sciche mëndra grupa de rujeneda, n majer pëis.

USP – Per si prestazion straurdinera y per vester na persunalità de referimënt per dut l Südtirol, à l presidënt dla Provinzia Luis Durnwalder fat i auguresc a Carolina Kostner, vizecampiunëssa de Europa de jadiné artistich. “Kostner y i autri atlec che à venciù bedaies ntan l fin dl’ena desmostra tan inant che n possa ruvé tl sport sce n tën permez y à na tel mentalità da ejëmpl” à dit l presidënt dla provinzia.