Comunicat stampa

USP – Cun l fin de smendrì l cunsum de energia à la Jonta provinziela (ncuei) ai 30 de dezëmber udù dant che la cëses che vën frabichedes da nuef possa me plu adurvé 5 litri de gasuele per meter cuadrat y respeté nscila l standard de “Cësa Tlima B”. Per l ressanamënt energetich de vedla cëses ne iel nia unì fat mudazions.

USP – Strutures turistiches muessa avëi pruvedimënc contra l meldefuech. La data per vester a post cun chisc pruvedimënc ie unida spënta de n ann, nfati nchin ala fin dl 2011.

USP – La Jonta provinziela ti à sëurandat ala SEL la cunzescion dal’ega per la zentrela dal strom S.Flurian tl chemun de Neumarkt, una dla majera de duta la region. Chësc ie unì fat al savëi dal presidënt Durnwalder ntan la cunferënza stampa do la senteda dl 30 de dezëmber (ncuei).

USP – Konrad Pfitscher ie unì numinà presidënt nuef dl Istitut per edilizia soziela IPES. Cun 60 cuatieres nueves per la categuria de davani mesan à la Jonta provinziela (ncuei) ai 30 de dezëmber nce dat pro mudazions al regulamënt n cont de chëi che ne azetea nia n cuatier.

USP – A personal de cura y educadëures de persones cun handicap che ne ova mo nia l ejam de bilinguism ti fovel tl ann 2001 unì cunzedù n tëmp de 9 ani per fé chësc ejam. Gran pert à mustrà su de savëi la rujenedes provinzieles. A chëi che ne à fat degun ejam, ne ti vëniel nia plu slungià l cuntrat de lëur.

USP – Strutures che dà albierch te raions valutei turisticamënter sciche “puech svilupei” possa tl 2011 inò damandé n sustëni provinziel. La Jonta provinziela à (ncuei) ai 30 de dezëmber fat ora de lascé pro n pert dumandes per sustëni turistich. L sustëni dëssa dantaprima judé raions che manacia de nia se la cavé.

USP – La Jonta provinziela à tl 2010 dat pro 2.234 delibres, che ie scialdi demanco permez a dan n valgun ani y nscì iel nce mesunpurté inant la custions cun manco papieresc. Tla ccunferënza stampa do la senteda dla Jonta dl 30 de dezëmber (ncuei) à l presidënt Durnwalder sorissà che chësc ie stat mesun tres na bona culaburazion danter i assessëures y la sensibltà per i bujëns dla populazion.

USP – Te si ultima senteda dl ann à la Jonta provinziela (ncuei) ai 30 de dezëmber spartì su i 100 milion de euro che vën dai ora dala Provinzia mpede l Stat, y che ti dà perchël cumpetënzes nueves ala Provinzia.

USP – Na vijita drët da plajëi à (NCUEI) ai 30 de dezëmber giapà la Jonta provinziela ntan si ultima senteda dl ann tl palaz Widmann a Bulsan. Mutans y mutons furnì su da Trëi Rëiesc à ciantà ai assessëures provinziei y à pià do na dunfierta per la persones che se n stà manco bën. Chëst ann vëniel judà te na maniera particulera a doi proiec de cooperazion nternaziunela tl Brasil.

USP – Cun la fin dl ann lascia Helmuth Moroder, diretëur tecnich dla strutures de trasport (STA) y diretëur dla ferata dla Val Venuesta, si atività per se dediché a d’autri mpënies prufesciunei. Pra na pitla festa de cumià à l assessëur provinziel ala mubilità Thomas Widmann unerà l mpëni de Helmuth Moroder de Urtijëi per na mubilità tl respet dl ambient.