Atualità

USP – L Guviern a Roma à azetà la lege provinziela dl’ena a cin dis per la scoles dl Südtirol y l minister al’istruzion Profumo à dat pro l decret per tenì i cursc de abilitazion per maestri tl’Università a Persenon. L assessëura Kasslatter Mur che à giapà la nutizies da Roma, valuteia chëstes sciche gran suzes.

USP – Do 40 ani de Autonomia nueva dla Provinzia de Bulsan se tratela de abiné soluzions a descriminazions sciche chëla che n ladin ne possa nia deventé vizepresidënt dla Provinzia. Pra l Di dla Cultura Ladina, (NCUEI) ai 14 de setëmber a Bulsan iel unì pità nfurmazion plu sota dl’Autonomia dl Südtirol dal pont de ududa ladin. Permez ai ladins de Trënt y de Belun se n sta chëi dl Südtirol miec y de chësc dëssa i zitadins nce tenì cont.

USP – Tla cater scoles autes di luesc ladins ne à 68 sculeies nia finà via l ultimo ann de scola defin positivamënter y à d’instà mo pudù fé do n ejam de singula materies. Curt dan che scumencëssa l ann de scola nuef ie 85 percënt de chisc candidac passei l ejam da instà per pudëi passé tla proscima tlas.

USP – L’ofize “Inovaziun y consulënza” dl Departimënt educaziun y cultura ladina à publiché na unité didatica sön la storia dla scora ladina por insigné ladin tla cuarta y cuinta tlassa dla scora elementara.

USP – I paiamënc di nsenianc dla scoles elementeres, mesanes y scoles autes unirà adatei. La Jonta provinziela à te si senteda (da NCUEI) dl 10 de setëmber dat pro l adatamënt dl cuntrat culetiv provinziel cun n aumënt de 0,6 nchin a 1,35 percënt.

USP - La Jonta provinziela ie stata a una per n’acurdanza danter l Assessëur ladin y l’Assessëura ala scoles tudësces che l’aministrazion dla scoles de mujiga ladines ne vënie nia spartida dala scoles tudësces. Al assessëur Mussner ti uniral garantì l dërt de rujené pea te cuestions urganisatives y pedagogiches.

USP – L festival dla mendranzes a Aosta à ntan l fin dl’ena abù n gran suzes de partezipazion y publich. Ghesc’ prinzipei dla cuarta edizion ie states reprejentanzes dl’Irlanda, dla Luisiana y dl Friul. L Assessorat Ladin dla Provinzia de Bulsan à fat pea prejentan i Ladins dla Dolomites y curan i cuntac istituzionei aldò dl’idea dl “Festival dei Peuples Minoritaires” per rafurzé i cuntac danter mendranzes de rujeneda.

USP – Pra l Di dla Cultura Ladina puderan chëst ann nrescì velch de plu sun l Statut d’Autonomia nuef dal pont de ududa dla grupa de rujeneda ladina. L danmesdì de relazions, mujiga y descuscion unirà tenì n vënderdi 14 de setëmber tl palaz provinziel Widmann a Bulsan.

USP – L Vëscul, l Presidënt dla Provinzia y l Assessëur Ladin à tla chëurt dl palaz provinziel 2 a Bulsan ai 04 de setëmber descurì trëi scultures che nvieia al dialogh. L opra d’ert metuda ora ie esprescion de ancunteda tl dialogh y passenea drët bën dan porta dla sënta dl Assessorat provinziel ladin ulache passa truepa jënt de duta la grupes de rujeneda.

USP – Pra l Di dla Scola Ladina à l presidënt Durnwalder y l assessëur Mussner garantì che tla scoles ladines ne uniral te chisc tëmps de sparani nia smendrì la stieres di nsenianc, sce se mantën la cumpëida de sculeies. Cun l danmesdì de ajurnamënt per nsenianc y respunsabli dla scoles ladines, iel (NCUEI) ai 04 de setëmber a Al Plan de Mareo unì nvià via l ann de scola (che scumëncia duman cun la lezions).