Atualità

Te sies enes, ai 19 de juni scumëncia i ejams de matura. L ntendënt ala scoles ladines à śën numinà la 5 cumiscions per l’ejam de matura.

L Museum Gherdëina presentea tla mostra temporera “Clochards & roba da fé da mat“ lëures de sculées y sculeies dl Lizeum d’Ert “Cademia“ criei sun ispirazion de na selezion de pec dl museum. Cun chësta mostra tol l Museum Gherdëina pert ala scumënciadives per “l ann dl pez dl museum”. La mostra vën giaurida n vënerdi, 10 de mei, dala 10.00.

Ntan chësc ann iel unì metù a jì n barat danter i sculeies dl Lizeum linguistich da La Ila, la scola auta “Marie Curie” da Maran y la scola “Claudia de Medici” de Bulsan. Tl cheder di dis de educazion politica se anconta i sculeies (NCUEI) 7 de mei per n dì deberieda a Bulsan.

Maturanc che à plu de 80 ponc pra la matura dëssa bele chëst ann giapé n bonus de ponc tl ejam de amiscion al’università. Chësc vëija dant n decret dl minister da dant Francesco Profumo. La Jonta provinziela à (NCUEI) ai 06 de mei abù da pesimé sun chësc bonus y uel arjonjer che l vënie tenì cont dla particularità dla matura tl Südtirol.

Imparè lingac a na manira saurida y plajora: la publicaziun 7 stories te 4 lingac é śëgn inće da ciafè tla forma digitala por fonins. L’aplicaziun interativa nöia dal inom “Storiesapp” dl ofize Inovaziun y Consulënza dla Intendënza Ladina gnarà presentada en vëndres, ai 10 de mà dales trëi domisdé a La Ila.

I dis dla rujenedes ai 10 y 11 de mei a Bulsan dëssa deventé n festival dla rujenedes y dl plurilinguism. De plu scumenciadives y proiec per mparé rujenedes coordinei dal departimënt dl assessëur Tommasini unirà prejentei tl palaz Campofranco y tl zënter Trevi a Bulsan.

Cun l medemo liber de storia per i sculeies de duta trëi grupes de rujeneda possel unì mparà la ravises de nosta cumenanza nce da l’auter pont de ududa. L terzo liber de storia, dedicà al Südtirol dal 1919 inant unirà n mierculdi 9 de mei prejentà a Bulsan dai trëi assessëures ala scola Mussner, Kasslatter Mur y Tommasini deberieda cun i autores.

Acioche la rujeneda ladina posse se mantenì tl cuntest plurilinguistich y tenì l var di tëmps muessela unì svilupeda inant. Sun ncëria dla Provinzia de Bulsan lëura l Istitut culturel Ladin Micurà de Rü te chësc ciamp tan mpurtant per la rujeneda de mendranza. Cun na vijita tla sënta de Sëlva se à l assessëur ladin Florian Mussner fat n cheder de co che va inant i lëures.

Tla Rë zivica iel unì giaurì na sezion nueva dla publicazions ladines per sustenì la cura dla rujeneda ladina da pert dla Provinzia de Bulsan. “L suzes di doi libri dl ultimo cuncors de leteratura demostra che la populazion à gran nteres per publicazions ladines” sorissea l assessëur provinziel ladin Mussner n ucajion dl di mundiel dl liber ai 23 de auril.

Acioche la rujeneda ladina possa tenì l var di tëmps y se svilupé inant, lëura na grupa de esperc da n ann sun paroles nueves. La soluzions per esprescions nueves se adrova tëmp per madurì y la bona ulentà. “Paroles nueves che vede bën nce per la valeda ujina ie de gran valor ajache les ie sciche ziedli per fé su na fundamënta per miëur cuntac danter la valedes ladines” sorissea l assessëur ladin Mussner.