Atualità

Per l nseniamënt te scolina y te scola iel a desposizion n cufer de materiai didatics che trata dl lëur cun l’eves y la miel. Chësc cufer à abù gran suzes y vën prejentà ai culaburadëures dla scolines y dla scoles ladines te n curs de furmazion a S. Martin de Tor.

Tla scoles ladines iel unì fat na nrescida sun la cumpetënzes di sculeies tla rujeneda nglëija. L se trata de n cheder dla situazion te duc trëi livei de scola: tl’elementeres, tla mesanes y tla scoles autes. I resultac laurei ora a livel scientifich unirà prejentei n juebia 6 de juni tl palaz Widmann a Bulsan.

USP - I archifs nüs tl Museum Ladin Ćiastel de Tor a San Martin de Tor vëgn surandà ofizialmënter dal Presidënt dla Provinzia Luis Durnwalder y dal assessur provinzial Florian Mussner ai 31 de mà.

L problem di destubs tl mparé y mëter a verda se lascia for plu sentì nce tla scoles ladines. Per ti jì ancontra a chësc problem di sculeies à l Servisc de cunsulënza y ntegrazion tenì na spezialisazion de trëi ani. N vënderdi 24 de mei uniral a Sarns sëurandat diploms a 25 nsenianc dla scoles ladines.

La costruziun de biblioteches al dedaincö, les "Ćiases dl savëi” é l’argomënt de na sëra de referać cun discusciun tla biblioteca provinziala Teßmann a Balsan. La sëra ai 30 de mà fej pert dla linia de referać dal titul “Texturen”.

L’Urchestra sinfonica di jëuni dl Südtirol chier jëuni y jëunes de duta la grupes de rujeneda. L possa fé pea jëuni strumentisć da 14 a 24 ani.

Al’economia y ala sozietà ie dedicà n cudejel nuef per l nseniamënt dla rujeneda ladina tla soles autes. Chësta publicazion dl Servisc Inovazion y Consulënza dl Departimënt Educazion y Cultura Ladina ie la prima de na lingia de materiai didatics sun la storia ladina. L cudejel ie n sustëni al nseniamënt de ladin, che ie unì aumëntà tla scoles autes.

Te si segonda senteda da chëst ann à la Cunsulta provinziela per la cultura ladina dat si bënsté a cuntribuc culturei per na soma de 63.500 euro. Per l ann 2013 iel nchinamò unì dat pro n sustëni finanziel da pert dla Provinzia de Bulsan per de ndut 97 scumenciadives, dutes tl ciamp dla Cultura Ladina.

La trëi grupes de rujeneda dl Südtirol valutea la storia da si pont de ududa. L liber de storia che ie unì prejentà (NCUEI) ai 09 de mei a Bulsan ie unì fat da esperc de duta trëi grupes y ie per duta trëi grupes de rujeneda: l dëssa judé pro a deventé plu cuscienc dla storia deberieda y a chësta maniera a na miëura cunvivënza dla grupes de rujeneda.

L’atività artistica fej pert dla cultura y ie tla valedes ladines drët sentida. Per sustenì chësta atività dla mendranza ladina compra la Provinzia de Bulsan uni tant vel opra d’ert. La cumiscion cherdeda ite dal Assessorat Ladin che dëssa fé prupostes y dé na valutazion sun i priejes, sa à (INIER) ai 08 de mei ancuntà l prim iede.