Comunicat stampa

Ćina śëgn podô porsones cun maraties croniches y rares sciöche inće cun n’invalidité se lascè scrì dal dotur por vigni rezeta ma döes confeziuns de medejines por la dorada de dui mëisc. “Da śëgn inant se scemplifichëia la situaziun cotan: por vigni rezeta pon damanè sis confeziuns de medejines por terapies ćina mez n ann”, spliga l’assessuria Stocker.

Michela Morandini é gnüda nominada a mez mà aconsiadëssa por l’avalianza dles oportunitês. L’assessuria por le laûr Martha Stocker y le diretur dl Departimënt Helmuth Sinn à incuntè Morandini inier, mertesc al 1. de messè, a Balsan.

Stlarì, informè y se dè jö cun la discusciun: la Junta provinziala dl Südtirol ne ô nia ma atuè i regolamënć por ći che reverda l’adoranza di mesi por la sconanza dles plantes, mo ara ô inće ester un di raiuns plü inovatifs. Inier, mertesc al 1. de messè à la Junta provinziala aprovè la proposta dl assessur Schuler che prevëiga mosöres desvalies.

Cun n convëgn final él gnü stlüt jö inier, mertesc al 1. de messè le proiet sura-regional “violënza tla vedla eté“ danter i Länder de Südtirol y Tirol. “La violënza sön jënt atempada ne po nia ester n tabu; cun chësc proiet orunse nos mostrè sö al personal de cura strategies sön co afrontè la tematica”, chësc à dit inier Martha Stocker.

Indöt 35,2 miliuns de euro mët la provinzia a desposiziun por stipendiums por la scora d’oblianza, por libri scolastics, la mensa scolastica y por le transport scolastich. Chësta dezijiun é gnüda tuta incö, mertesc al 1. de messè, dala Junta provinziala. Implü é inće gnüda aprovada la proposta dl assessur Achammer por l’ecuiparaziun di diploms de maester artejan danter le Südtirol y l’Austria.

Dal 2011 inant mëss le conzescionar de 10 implanć idroeletrics tl Südtirol, l’aziënda SE Hydropower Srl, ti paié ai Comuns y ala Provinzia contribuć por le ressanamënt dl ambiënt. “Por i proscimi trëi agn, ćina le 2016, ciafarà i Comuns interessà y la Provinzia indöt 32,7 miliuns de euro da investì por le mioramënt y ressanamënt dl ambiënt”, spliga l’assessur por l’energia Richard Theiner.

“Incö dales cater domisdé pëia ia ofizialmënter le portal internet dla Euregio che é dediché ala pröma vera mondiala”: chësc à dit incö (al 1. de messé) le Presidënt dla Junta Arno Kompatscher do la sentada dla junta. L’ativaziun dla plata internet nöia, che gnarà ajornada te dui, proscimamënter trëi lingać, é n proiet por aumentè la cosciënza dla popolaziun sön chësta tematica

I scefs de govern Matteo Renzi y Werner Faymann à confermè trami dui la presënza por le convëgn “Regiuns tl’Europa – Europa dles Regiuns” a Ćiastel Prösels a Fié sön le program por la proscima sabeda, ai 5 de messé. Chësc à dit le Presidënt Arno Kompatscher, tratan la conferënza stampa do la sentada dla junta. Le convëgn mët bele man en vëndres (04.07) cun la pert scientifica.

Le Museum Ladin y l’assoziaziun turistica de Urtijëi te Gherdëna organisëia vigni vëndres domisdé dai 4 de lugio ai 29 d’agost (ater co ai 15 d’agost nia) na jita acompagnada sön le tru geologich de Bula, olache an vëiga te pera la gran möria dan da 252 miliuns de agn.

Tl cheder dla campagna de sensibilisaziun „No Credit“, che é organisada dal Sorvisc Strades adöm cun la polizia locala y le Setur Zentrala viabilité por cherdé sö i motoziclisć a rovëne cun segurëza sön strada, pon desćiarié da incö inant (01.07) le flyer inće por ladin.