Comunicat stampa

USP - Cun l proscimo ann de scola uniral nce tla scola prufesciunela a Urtijëi nsenià do l model paritetich. A chësta maniera vëniel garantì l nseniamënt tla trëi rujenedes provinzieles, ladin, tudësch y talian cun sëuraprò nce l nglëisc.

USP – Cun la publicazion nueva “Miti ladini delle Dolomiti” vëniel nvià via n proiet editoriel per fé valëi la mpurtanza storich-culturela dla lijëndes ladines y per les dé inant a n majer publich te n cuntest de valuta leterera. L Istitut Ladin Micurà de Rü nvieia al prejentazion, n merdi 17 de auril, dala 09 danmesdì tl palaz Widmann a Bulsan, n prejënza dl assessëur provinziel Mussner.

USP – Chisc dis vëniel scumencià i lëures per ngrandì y miuré la ncrujeda da Bula sun la streda de pas Pinëi. Aldò di cuntrac iel udù dant che i lëures dure trëi mënsc.

USP - L Museum Ladin Ciastel de Tor nvieia la populazion de Gherdëina à fé pea ativamënter l proiet interreg “E.CH.I. – Etnografies talianes-svizres”, tres chël che l vën fat na tueda sun l’arpejon culturela nia materiela dla valeda. Chiche se da cunté de usanzes, tradizions, festes, bai, lijëndes y stories de Gherdëina, o che à vel pez, vel foto de documentazion ie priei bel de tò su cuntat cun l Museum Ladin.

USP – l canal de televijion per nfurmazion turistica, la speculazions sun na reduzion de scioldi da Roma, l finanziamënt dl dërt de studium, ie stai i argumënc zentrei dla senteda dla Jonta provinziela ai 10 de auril. L presidënt Luis Durnwalder à cunedì la dezijions tla cunferënza stampa riesc do la senteda.

USP – Te si senteda da (NCUEI) ai 10 de auril à la Jonta provinziela dat pro na lingia de delibres. Tla cunferënza stampa do la senteda, à l presidënt cunedì de plu argumënc de majer nteres, danter chisc nce doi pitla mudazions ala pruposta de regulamentazion dla chëuta IMU, l program de culaburazion de svilup per 1,7 milion de euro, cumpensazion finanziera dala Svizra.

USP - Danter borses de stude, rembursamënt de iscrizions, lueges da durmì y menses à la Jonta provinziela (NCUEI) ai 10 de auril dat pro finanziamënc per 22 milion de euro acioche la jënt posse chëst ann studië te na università. L fin prinzipel de chisc aiuc ie de premië chëi che arjonj de bon resultac y de judé a chëi che ne à nia nstës la despunibltà finanziera de jì al’università.

USP – Chi che fej feries tl Südtirol dëssa giapé nfurmazions turistiches tres n canal de televijion speziel. Chësc se à la Jonta provinziela tëut dant de realisé nchin a n auter ann. (NCUEI) ai 10 de auril à la grupa “Servus TV” prejentà si pruposta ai assessëures, l’ena che vën jirà no d’autra prupostes te Jonta y pona uniral scrit ora n cuncors.

USP – “Nchinamò ne iel nia ruvà na comunicazion de Roma che n ulëssa smendrì la pert dla chëutes che ruva inò de reviers da Roma, perchël ne iel deguna rejon de sté ert”: chësc à (NCUEI) ai 10 de auril detlarà l presidënt dla Provinzia Durnwalder sorissan che velch da de tel possa me unì fat sce l Südtirol ie a una.

USP – Feter 500.000 zitadins, 210.000 families y passa 80.000 cëses ie d’autonn stai l cuntenut dla cumpededa dla jënt. Ntan la proscima enes muessa 3131 families mo tenì pea per cuntroi che ie debujën per garantì la cualità dla nfurmazions purtedes adum. Proscimamënter sarà pona l Istitut de statistica de Stat ISTAT a publiché i prim resultac.