Comunicat stampa

USP – Nia plu 27%, ma nchin a 40% dl finanziamënt sëurantulerà la Comunità Europea danter l 2014 y 2020 per fé dl tunel dl Prëner. Chësc à l cuordinadëur dl EU, Pat Cox segurà al presidënt dla Provinzia Durnwalder y duc i respunsabli ntan si vijita (NCUEI) ai 20 de merz a Bulsan. L presidënt dla Provinzia à menà do per la proietazion dla trates da ruvé permez al tunel.

USP – Per no ciarië l cunsumadëur de strom trëi iedesc cun chëutes à la Jonta provinziela purtà na pruposta te Cunsëi per tò demez la njonta provinziela y dé la puscibltà ai chemuns de renunzië sun si njonta. La lege nueva ie publicheda tla Gazëta ufiziela y jirà n droa (DUMAN) ai 21 de merz.

USP – N mierculdi ai 21 de merz va n droa la lege nueva per l cumerz. “Cun la regulamentazion nueva ons cialà de nuzé la pertes positives de tant che l Guviern Monti nes à metù dant n cont de liberalisazions y dal’autra pert ons cialà de defënder nosc sistem che va bën” dij l assessëur Thomas Widmann. La lege nueva ie (NCUEI, ai 20 de merz) publicheda tla Gazëta ufiziela.

USP – L’istituzion de n’agenzia per la ncëries publiches, la diretives per la chëuta IMU y l plann per persones cun handicap ie stai i argumënc zentrei dla senteda dla Jonta provinziela ai 19 de merz. l presidënt Luis Durnwalder à riesc do la senteda prejentà i ponc tratei.

USP – Tl Südtirol vivel 40.000 persones cun handicap. A chësta persones, dantaprima i 3000 che à n majer handicap, uel la Jonta provinziela ti seguré l daunì. Cun l plann per persones cun handicap iel (NCUEI) ai 19 de merz unì udù dant agevolazions per ruve pra n lëur, pusciblteies da viver y de assistënza.

USP - La Jonta provinziela à (NCUEI) ai 19 de merz delibrà l’istituzion de n’agenzia per scrì ora lëures y ncëries publiches. Chësc servisc nuef dla Provinzia pieta cunsulënza y sëurantol nce l scrì ora per duta la istituzions publiches. Si lëures puderà riesc mëter man.

USP – La Jonta provinziela de Bulsan se à (NCUEI) ai 19 de mei dat ju plu a puntin cun la diretives per i chemuns n cont dla nueva chëuta unitera di chemuns IMU. De plu agevolazions ie bele ududes dant, ma dan na dezijion definitiva se à i assessëures damandà mo vel calculazion plu avisa.

USP – Nteressei a nsenië l proscimo ann de scola tla scoles di luesc ladins possa nchin ai 12 de auril de ju dumanda per unì tëuc su tla graduatories de istitut. Chiche ova bele fat dumanda per la graduatories provinzieles di nsenianc y ova dat sëura la preferënza, ne muessa nia plu fé chësta segonda dumanda.

USP - N merdi ai 20 de merz saral sun la streda danter Tluses y Puntives for inò da aspité per pudëi passé. L Servisc per la stredes à per chësc di prugramà lëures sun streda.

USP – Nchin ala fin de merz, te passa doi enes, à sculeies che finerà chësta ann la mesana mo dl’aurela de se scrì ite ala scoles autes. Chiche ne à mo nia tëut na dezijion dëssa se de jù plu a puntin cun cie che l vën pità. Tla valedes ladines iel cin scoles autes da crì ora: doi istituc tecnics economics, n lizeum liniguistich, n lizeum d’ert y na scola prufesciunela.