Comunicat stampa

USP – I cëves dl’assoziazions dla ndustries talianes y tudësces, la presidënta dla Confindustria Emma Marcegaglia y l presidënt dl BDI Hans-Peter Keitel ie (N SËIRA) ai 20 de utober stai ghesc’ dl presidënt dla Provinzia Durnwalder tla Laimburg. I cëves dla gran ndustria à mustrà stima per l lëur dla Provinzia de Bulsan.

USP – A Persenon iel (NCUEI) ai 19 de utober unì giaurì ufizialmënter l toch nuef dla scola prufesciunela per la gastronomia y alimenteres „Emma Hellensteiner“. L frabicat cun de ndut feter 10.000 metri cubich ie unì sëurandat ala scola dal presidënt Durnwalder cun i assessëures Mussner y Berger.

USP – De judé inant i chemuns se ala (NCUEI) ai 17 de utober tratà ti argumënc de majer nteres. Acioche i chemuns possé fé l’ultima pert di culegamënc de internet a slune ti luesc y per curì l custimënt dla refezions de scola chier la Jonta provinziela do soluzions. Tla valeda de Ulten ti an metù n ciol trasmitënt ala lores.

USP – Tla descuscion sun l anjenië la pruposta de bilanz 2012 ie la Jonta provinziela (NCUEI) ai 17 de utober stat a una de nia auzé l IRAP y de la lascé do per chëla firmes che à na gran produtività, na gran segurëza per la stieres, che fej nvestimënc tla tueda y che ti vën nce ancontra ala families y al tlima.

USP – L Stat à chëst ann mudà la dumandes dl ejam de amiscion per fé l’università de scienzes dla furmazion a Persenon. Me 19% ie stai boni de passé l’ejam. Davia che la furmazion di maestri de scola ie scrita dant dal Stat, uel la Jonta provinziela abiné na soluzion per judé i jëuni a pudëi fé chëst studi universiter.

USP – La lores che ie ti ultimi dis jita ncantëur tla valeda de Ulten, à s’ën n ciol trasmitënt ntëur al col. Ntan la la nuet dl 17 de utober iel unì pià la lores che n à inò messù lascé jì. “L trasmitënt ti ie unì metù acioche savon ulache ie la lores, acioche pudon n cajo ti l fé al savëi ala jënt y acioche pudon, pernan che giapon la lizënza, nce l pië” à spiegà l presidënt Durnwalder do la senteda dla Jonta provinziela.

USP – For plu families damanda de mandé si mutons ala refezion de scola. I chemuns se stënta a curì l custimënt y nsci uel la Jonta provinziela abiné soluzions tulan nce ite ulenteres.

USP - Aldò dla normes europees possa la Provinzia fé i culegamënc dl internet a slune nchin ala zentrela de uni chemun, ma nia nchin pra la cëses. Chësc ultimo toch dëssa perchël sëurantò i chemuns. La Jonta provinziela ie (NCUEI) ai 17 de utober stata a una de ti judé ai chemuns che ne ie nia boni de fé chisc lëures te curt tëmp.

USP – Tl Ciastel Tirol se à (NCUEI) ai 13 de utober ancuntà i reprejentanc dl Trentin, Bulsan y Tirol per la prima senteda do la fundazion dla grupa europea de culaburazion teritoriela (GECT/EVTZ). I obietives prinzipei dla culaburazion reveda la trassa dl Prëner, l auzé dl daz, l mparé rujenedes, la tueda y la union dla nfrastrutures tl ciamp dl’energia.

USP – De soluzions per la gestion dl’l’eghes sun Monta Sëuc - Puntives y a Badia se ala (NCUEI) ai 12 de utober tratà tla senteda dla cumiscion ambientela dla Provinzia de Bulsan. La cumiscion cun si presidënt Luigi Minach à azetà duc trëi proiec tla valedes ladines.