Comunicat stampa

USP – Cun l „Pas culturel“ giapa i cumëmbri ulenteres de lies cultureles l priesc de manifestazions y museums lascià do nchin al 50%. Chisc dis à l Ufize provinziel Cultura ladina mandà ora l „Pas culturel“ nuef che vel doi ani. Sce vel lia culturela ne l ëssa nia giapà, possela se l damandé.

USP – N mer de lingac é le titul dl convëgn por le personal insegnant de lingac che gnarà tignì en lönesc y en dedolönesc ai 29 y 30 d’agost a Balsan. La scomenciadia di trëi Departimënc scolastics y dl’Univesité de Balsan à le fin de portè pro a na vijiun plü ampla dl plurilinguism, mostran sö la potenzialité dla conescënza de de plü lingac.

USP – Passa 200 nsenianc ladins se à ntan chësc instà, ntan si feries, tëut dl’aurela per cursc de furmazion. Chisc ie plu di mec nsenianc dla soles y scolines ladines che à fat i cursc te nosc raion, a Roma o oradecà. L’esperienza dla furmazion y cuntat cun coleghes d’autri raions à dat mutivazion per l ann de scola nuef.

USP – I cater proiec azetà dala comisciun provinziala por la sconanza dla contrada reverda le mioramënt de na pista da paslunch a San Ciascian, le deslariamënt de na pista dai schi a Badia, l’ampliamënt de na lerch da lascè jö material te Mareo y l’implimënt de na büja tl comun de Sëlva.

USP - La Provinzia de Bulsan sustën la cura y l mantenimënt dla cultura judan dantaprima tl finanziamënt. I scioldi a desposizion vën spartì su aldò dl pruporz danter la grupes de rujeneda. La reduzions de bilanz te chisc tëmps toca nce la mëndra grupa de rujeneda: “La spartizion di finanziamënc puderà unì mudeda dai resultac dla cumpededa dla jënt che ie l pruporz nuef per i proscimi 10 ani” sorissea l assessëur provinziel ladin.

USP – Per dé na ntroduzion al ann de scola nuef mët l Departimënt Educazion y Cultura Ladina dla Provinzia de Bulsan nce chëst ann a jì n di de ajurnamënt y ancunteda per nsenianc de scola, reprejentanc di genitores y aministradëures publics. L Di dla Scola Ladina unirà chëst ann dedicà ala nuviteies dl ann de scola y al valor dla mujiga tl’educazion. Chësc di ie unì metù a jì per l 9 de setëmber tl’università a Persenon cun scumenciamënt da mesa la nuef da duman.

USP – Per l ann de scola 2011/12 puderan inò damandè cuntribuc ala Provinzia de Bulsan per sculeies dla scola elementera y mesana che va te na cësa di studënc. La dumandes possa unì dates ju nchin ai 29 de setëmber 2011 tres n formuler che ie da giapé tl Ufize provinziel per Assistënza scolastica.

USP – Da n lunesc ai 22 nchin ai 24 de agost uniral lavà ora i tuniei sun la streda de Gherdëina a Urtijëi y a Pruca. De nuet puderan me passé de un viers al iede.

USP – La prejentazion dl liber „Storia die ladini delle Dolomiti“, n vënderdi ai 19 de agost a Corvara stluj jù na lingia de prejentazions tla valedes ladines ntan chësc instà. Tl cheder dla scumenciadiva „Un libro, un rifugio“ à l liber de Werner Pescosta, dat ora dal Istitut Ladin Micurà de Rü“ giapà n post de unëur.

USP - Oswald von Wolkenstein ie stat na persunalità stravaganta che à tla segonda metà dl 15esim secul mustrà de plu musc ti ciamps dla mujiga, poejia y cumposizion, ma nce tla politica de raion. Tl Tublà da Nives te Sëlva à l assessëur provinziel ladin Florian Mussner deberieda cun l ambolt y l diretëur dl Museum Ladin (NSNUET) ai 12 de agost giaurì na mostra de chedri dedicheda a chësc gran uem dl Tirol tl medieve tert. Nchin de utober iel da udëi 94 chedri che 14 aritsc’ à fat ti ultimi 50 ani.