Comunicat stampa
Ai 4 de agost ancunteda de metà legislatura cun l assessëur ladin Mussner
USP – A metà legislatura anconta i assessëures provinziei i culaburadëures di media per cialé de reviers y cialé inant sun l’atività. N juebia ai 4 de agost tën l assessëur ladin Florian Mussner si ancunteda a Sureghes per rujené de argumënc che reverda la populazion ladina, i culegamënc internet a slune, stredes y la sëurandata de lëures publics.
Le liber sön la storia di ladins vëgn presentè tles singoles valades ladines
USP – Le gran liber sön la storia di Ladins dles Dolomites dè fora dal Istitut Ladin vëgn presentè ciamò trëia iadi d’agost. Ai 5 d’agost a Col de Santa Lizia, ai 11 d’agost a Urtijëi y ai 19 a Corvara.
Le Museum Ladin Ursus ladinicus a San Ciascian é davert
USP – La cerna dles strotöres culturales tles valades ladines é deventada plü rica. En sabeda, ai 30 de lugio él gnü daurì a San Ciascian n museum nü dediché ala laûrs preistorica dles Dolomites. Le Museum Ladin Ursus ladinicus presentëia sön trëi alzades la storia y l’ambiënt de vita dan da 40.000 agn dla laûrs di andri, de chëra ch’al é gnü ciafè i resc’ dan da 24 agn tl Ander de Conturines. Cater comëmbri dla Junta provinziala, le Presdiënt dla Provinzia Durnwalder cun i assessurs Kasslatter Mur, Mussner y Berger, deboriada cun l’ombolt de Badia Iaco Frenademetz, à daurì ufizialmënter le museum nü.
Ai 5 de agost sëurandata de stieres tla Scola Ladina
USP – N vëderdi ai 5 de agost vëniel sëurandat la stieres da nseniant per l ann de scola 2011-12 tla Scola Ladina. Nsenianc che ie tla graduatories possa se prejenté dala 9.00 danmesdì tla sënta dla Ntendënza Ladina a Bulsan.
Giaurì l troi geologich sa Bula
USP – La defrënta sortes de sas sëura la streda da Bula ie cunesciudes danter i geologhes de livel nternaziunel ajache tlo se à mantenì drët bën sasc che se ova furmà dan feter 252 milion de ani. Chësta defrënta sortes de sas possen sën vijité drët saurì jan sun l troi geologich che unì giaurì (ncuei) ai 22 de lugio dal presidënt dla Provinzia Durnwalder y dal assessëur Florian Mussner.
Sëurandat i lëures per i ultimi dlandri di puenc a S.Cristina
USP – Pra la streda de zircunvalazion a S.Cristina vëniel finà l’ultima pertes. Tl Ufize provinziel per sëurandé i lëures iel n mierculdi ai 20 de lugio unì sëurandat i lëures per fé i dlandri di puenc “Monte Pana” y “Saslong”.
Cumiscion per la cuntreda azetea proiec a Mareo y te Gherdëina
USP - La segonda cumiscion provinziela per stravardé la cuntreda à n merdi ai 19 de lugio dat pro proiec per n stont de nfurmazion a Pederü y n ntervënt contra la levines te Sëlva. Leprò iel nce unì azetà n garage pra la sentadoia Florian sun Mont Sëuc y n adatamënt dl rone pra l zënter da podejé sun Mont de Pana a S.Cristina.
Sënta destacheda dl Museum Ladin dedicheda al Ursus ladinicus
USP – Ala fin dl mëns uniral a S.Ciascian giaurì la nueva sënta destacheda dl Museum Ladin dedicheda ala lores de Conturines, l Ursus ladinicus. Chësc museum nuef, che valorisea nce l raion dolomitich, ie (NCUEI) ai 19 de lugio unì prejentà dal presidënt dla Provinzia Durnwalder y dal’assessëura Kasslatter Mur te na cunferënza stampa a Bulsan.
Furmazion prufesciunela fajerà pert di departimënc de educazion
USP – La Jonta provinziela à (ncuei) ai 18 de lugio dat pro de mëter la furmazion prufesciunela pra i departimënc de educazion a na maniera da mëter a jì da nuef l sistem de furmazion a na maniera plu megra y plu efizienta. La reorganisazion dla ciamp dla furmazion ie me na pert de n majer pachetl de pruvedimënc che la Jonta provinziela uel purté inant ti proscimi mënsc per smëndrì la burocrazia.
Jonta provinziela ne vëij deguna rejon per se paré dala manovra de sparani
USP – Diretamënter o nce nia diretamënter arà la manovra de sparani dl Guviern talian na fazion sun Südtirol. Ma davia che n se aspieta mo mudazions ne vëijen sën nia l drë mumënt per se paré. Chësta ie stata la cuntlujion dla Jonta provinziela, (ncuei) ai 18 de lugio, n cont dla manovra de sparani.