Comunicat stampa

USP – N vënderdi ai 17 de juni scumëncia nce tla scoles ladines i ejams per finé via la scola. N iede uniral fat i ejams scric de 5 dis tla scola mesana y pona n mierculdi ai 22 de juni scumëncia cater dis de ejams scric tla scoles autes. Permez a d’autra scoles vëniel tla scoles paritetiches ladines fat na prova scrita de plu.

USP – La Grupa europea de culaburazion teritoriela (GECT/EVTZ) danter Trentin, Bulsan y Tirol ie deventeda istituzion. La trëi Jontes provinzieles à (NCUEI) ai 14 de juni sotscrì ufizialmënter l statut de chësta istituzion nueva che fej pert dl’Euregio. Tl Ciastel Thun tla val di Non iel nce bele unì fat ora i argumënc de priorità per la istituzion nueva: mubilità y energia, sanità, economia y nrescida.

USP – I sculeies dla scoles ladines fej nce unëur a si scoles tl sport. Verena Hofer de Urtijëi à venciù i campionac taliani de tennis per la scoles.

USP – Ti ultimi agn s’à le Museum Ladin Ciastel de Tor dè dassënn da fà por mostrè sö la storia y la cultura ladina y sostignì la identificaziun dla jënt ladina cun cun süa storia y süa cultura. Ai 24 de jügn él 10 agn ca che al é gnü daurì le Museum Ladin. La sënta destacada nöia a San Ciascian y le depot che vëgn fat a San Martin vëgn sostignis dal Assessorat por i laûrs publics y odüs sciöche scincunda ala jënt ladina por chësta ocajiun.

USP – A Urtijëi à (inier) ai 8 de juni mo n iede messù unì s’arà n cantier. “L ne ie mo mei suzedù che n cantier a messù unì s’arà doi iedesc te tëmp de doi enes per rejons de segurëza” dij l diretëur dla repartizion per l lëur Helmuth Sinn, dessenà y cun festide.

USP – L Museum Ladin Ciastel de Tor à l ann passà dedicà gran mpëni per l’ert metan a jì doi cuncorsc d’ert. Tres la „3ª Trienala Ladina“ y l pest de scultura “Richard Agreiter“ à artisc’ ladins fat de bela opres che ie nce unì valutedes y analisedes tres rezenscions. Ai 7 de juni iel tl Museion a Bulsan unì prejentà n catalogh de chisc lëures scrit te cater rujenedes.

USP – Danter i sculeies dla scoles autes dl Südtirol che à fat pea i campionac de scienzes natureles iel (NCUEI) ai 7 de juni unì premià 40 sculeies. Dla scoles autes ladines ie Milena Perathoner dl Istitut Tecnich de Urtijëi unida premieda tla olimpiada de conc.

USP – “Per na pruposta de regulamenté l muvimënt di auti sun i jëufs dla Dolomites dëssa nce rujené pea la Lia di Chemuns ladins”, nscì l assessëur provinziel Florian Mussner do che la Jonta provinziela se à damandà na pruposta cuncreta dai chemuns dla val Badia y de Gherdëina.

USP – La dumanda dla Jonta provinziela ai chemuns ladins n cont dla regulamentazion di jëufs dla Dolomites ie da pont de ududa ladin l argumënt prinzipel prejentà tla cunferënza stampa do la senteda da (ncuei) ai 6 de juni. I majeri argumënc che reverda dut l Südtirol toca l statut per la Grupa europea de culaburazion teritoriela (EVTZ) y la linies nueves per arjonjer l tunel dl Prëner. Chësta scines nueves vën propi fates dan porta dla valedes ladines, a Pruca. Aldò di criteries nueves per l i mulins dal vënt ne ie Al Plan de Mareo nia plu danter i chemuns che pudëssa damandé de fé n tel mplant.

USP – La jonta provinziela à spënt de doi ani la data nchin a chëla che i chemuns muessa avëi njenià l plann di raions de pericul. Danterauter à la Jonta nce lecurdà la mpurtanza de jì al referendum ai 12 y 13 de juni.