Comunicat stampa
Paures possa nchin ai 30 de setëmber damandé de nia paië l’ICI
USP – I paures che ne uel nce tl daunì nia paië l chëuta sun frabicac ICI, muessa se cruzië che i cëses o tublei vënie metui tla drëta categuria dl Cataster. La dumandes per la mudazion de categuria muessa unì fates nchin ai 30 de setëmber.
Jonta provinziela se pera contra l saré de suneries
USP – Aldò dla manovra finanziera per salvé la finanzes dl Stat Talian, dëssel unì sarà la mëndra suneries per sparanië. La Jonta provinziela de Bulsan à (NCUEI) ai 26 de setëmber fat ora de ntervenì per tëmp acioche ne vënie nia saredes la suneries.
Jonta per adurvé dl ciaut di mplanc da fé strom
USP – I mplanc de energia alternativa cun chëi che l vën fat strom y ciaut vën fai for de plu nce te nosc raions. La Jonta provinziela se damanda che pra i mplanc de chësta sort (Blockheizkraftwerke/impianti di cogenerazione) che à na produzion de passa 100 kw, muessel unì nuzà amaca 70% dl’energia termica.
50 milion per cuatieres a saudeies
USP - La Jonta provinziela de Bulsan à te si senteda (da NCUEI) ai 26 de setëmber dat pro de junté 50 milion de euro al capitul per ressanamënc de cuatieres per saudeies. Chisc cuatieres ie pert dl barat cun l Stat per giapé raions militeres, te de bona posizions, che ne vën nia plu adurvei.
Jonta provinziela fej per l 2012 cont cun n bilanz feter unfat grant
USP – Per l proscimo bilanz provinziel fej la Jonta provinziela cont cun 130 milion de ntredes de plu. Davia che la manovra finanziera dl Stat se damanda de smendrì dassën i custimënc, sarà la soma de bilanz n auter ann mpomo feter la medema sciche chëst ann.
Nosc sentimënt fej viver la rujeneda: Mussner per l Di nternaziunel dla rujenedes
USP – La mpurtanza dla rujeneda dl’oma, vën NCUEI ai 26 de setëmber sorisseda particularmënter n ucajion dl di nternaziunel dla rujenedes. L assessëur ladin Florian Mussner sorissea che la rujeneda dl’oma ie pert de nosta identità y che l ne se trata nia me de paroles ma dl’esprescion de nosc vester.
Di dla Cultura Ladina ai 30 de setëmber
USP – La fazion dla cumpededa dla jënt y dl pruporz che vën a se l dé dala detlarazion de grupa rujeneda ie i doi argumënc zentrei dl Di dla Cultura Ladina. L danmesdì per se dé jù cun chësta tematiches a unirà, n vënderdi ai 30 de setëmber, giaurì cun na ntroduzion dl presidënt dla Provinzia Durnwalder y dl assessëur ladin Mussner.
Jonta provinziela recunësc la matura paritetica ladina
USP – La Jonta provinziela de Bulsan à (NCUEI) ai 19 de setëmber recunesciù la matura paritetica ladina azetan che la dëssa nce unì recunesciuda per l trilinguism “B”. La pruposta dl assessëur ladin Florian Mussner unirà data inant ala Cumiscion di Sies per adaté la norma de atuazion al Statut de Autonomia.
Situazion atuela de stieres per ladins: mudazions tres l pruporz nuef
USP - Tl’Aministrazions publiches dl Südtirol ie la stieres per la populazion ladina resservedes aldò dl pruporz. La cumpëida atuela puderà ti proscimi mënsc unì mudeda: “Sun la basa dl pat de stabilità se à l Stat damandà na reduzion generela dla siteres, ma la reduzion dla stieres ladines possa d’autonn mo giapé na corezion tres i resultac dla cumpededa dla jënt che ie la basa dl pruporz” sorissea l assessëur Florian Mussner.
I lëures danter Longega y Picolin va inant
USP - N lunesc ai 12 de setëmber jirà inant i lëures sun l stradon dla Val Badia danter Longega y Picolin. Tlo fova i lëures unic fermei ntan la sajon da instà. Ntan duta l’ena, nchin n vënderdi ai 16 de setëmber iel udù dant de saré mesa la streda a na maniera che n puderà me passé te una direzion al iede.