Comunicat stampa

USP – Tla descuscion sun l anjenië la pruposta de bilanz 2012 ie la Jonta provinziela (NCUEI) ai 17 de utober stat a una de nia auzé l IRAP y de la lascé do per chëla firmes che à na gran produtività, na gran segurëza per la stieres, che fej nvestimënc tla tueda y che ti vën nce ancontra ala families y al tlima.

USP – L Stat à chëst ann mudà la dumandes dl ejam de amiscion per fé l’università de scienzes dla furmazion a Persenon. Me 19% ie stai boni de passé l’ejam. Davia che la furmazion di maestri de scola ie scrita dant dal Stat, uel la Jonta provinziela abiné na soluzion per judé i jëuni a pudëi fé chëst studi universiter.

USP – La lores che ie ti ultimi dis jita ncantëur tla valeda de Ulten, à s’ën n ciol trasmitënt ntëur al col. Ntan la la nuet dl 17 de utober iel unì pià la lores che n à inò messù lascé jì. “L trasmitënt ti ie unì metù acioche savon ulache ie la lores, acioche pudon n cajo ti l fé al savëi ala jënt y acioche pudon, pernan che giapon la lizënza, nce l pië” à spiegà l presidënt Durnwalder do la senteda dla Jonta provinziela.

USP – For plu families damanda de mandé si mutons ala refezion de scola. I chemuns se stënta a curì l custimënt y nsci uel la Jonta provinziela abiné soluzions tulan nce ite ulenteres.

USP - Aldò dla normes europees possa la Provinzia fé i culegamënc dl internet a slune nchin ala zentrela de uni chemun, ma nia nchin pra la cëses. Chësc ultimo toch dëssa perchël sëurantò i chemuns. La Jonta provinziela ie (NCUEI) ai 17 de utober stata a una de ti judé ai chemuns che ne ie nia boni de fé chisc lëures te curt tëmp.

USP – Tl Ciastel Tirol se à (NCUEI) ai 13 de utober ancuntà i reprejentanc dl Trentin, Bulsan y Tirol per la prima senteda do la fundazion dla grupa europea de culaburazion teritoriela (GECT/EVTZ). I obietives prinzipei dla culaburazion reveda la trassa dl Prëner, l auzé dl daz, l mparé rujenedes, la tueda y la union dla nfrastrutures tl ciamp dl’energia.

USP – De soluzions per la gestion dl’l’eghes sun Monta Sëuc - Puntives y a Badia se ala (NCUEI) ai 12 de utober tratà tla senteda dla cumiscion ambientela dla Provinzia de Bulsan. La cumiscion cun si presidënt Luigi Minach à azetà duc trëi proiec tla valedes ladines.

USP – La varianta per la sentadoia nueva y parëies contra levines sun Ciampinëi ie da permò unic dai pro dala Cumiscion per la defendura dla cuntreda. Tramedoi proiec tl chemun de Sëlva reverda l’atività dl jì cun i schi.

USP - N mierculdi ai 12 de utober uniral te dut l raion provinziel fat na prova dl’alarm dla prutezion zevila. Do la diesc danmesdì sunerà 400 sirenes te duta la provinzia.

USP – Pra l cunvëni sun l plurilinguism ti prim ani de vita RML2future a Klagenfurt à la prejentazion dl model plurilinguistich dla scolines ladines abù gran suzes. I partezipanc da de plu nazions à mustrà gran nteres per l model che ti vën pità ai mëndri y ala mëndres tla valedes ladines.