Comunicat stampa

USP – Dassënn grant ie inier stat l nteres peri resultac dla veles provinzieles 2008 publichei sun la plates internet dla Provinzia. Aldò dla nfurmazions dla Sozietà nfurmatica Südtirol, ie stat 53.681 vijitadëures sun feter 4 milions de plates ududes.

USP – A chëi che uel avëi na miëura vijion sun l’aministrazion publica vëniel pità n aiut. Da duman (29 de utober) jirà online la plates internet di 900 servijes publics dla Provinzia de Bulsan.

USP – L Museum Ladin a San Martin de Tor y nce i autri museums provinziei, chël de Dietenheim, de Steinhaus y de Prettau scumëncia cun l prim de nuvëmber la paussa da inviern.

USP – Sun la streda statela danter Pruca y Puntives vëniel chëst ena fat i ultimi lëures de mantenimënt dan l inviern. Sëura la ustaria Stern iel ncuei, (merdi 28 de utober) unì metù n semafer per lascé mpo passé l muvimënt sun streda ntan l lëures.

USP – Dala 14.30 iel unì finà de cumpedé ora la stimes dla veles provinzieles 2008. Duta la comunicazion tecnica ie jita bën y zënza dificulteies. De gra ai presidënc dla sezions ie i resultac unì dai tres drët aslune cun l BalckBerry.

USP – Nce sce l ie l di di resultac dla veles, à la Jonta provinziela ncuei tenì si senteda a Bulsan. Dessot i ponc de majer nteres prejentei dal Presidënt dla Provinzia Luis Drunwalder.

USP – Ti chemuns de Gherdëina y dla Val Badia an finà de cumpedé la stimes dla veles provinzieles. Tulan ca la media di 8 chemuns arjonj la Svp tla doi valedes l 63,6 percënt dla stimes. La segonda majera cumpëida ti ot chemuns ladins à la Lista Ladins Dolomites cun 18,8 percënt. Terzo partit tla doi valedes ie i Freiheitlichen cun l 6,9 percënt. Tan de reprejentanc che uni grupa giapa tl Cunsëi provinziel nuef savran permò canche l ie unì cumpedà ora la zedules de vela te duta la Provinzia de Bulsan.

USP – Ti Chemuns de Gherdëina y dla Val Badia an dala 12.00 finà de cumpedé ora la zedules de vela. Dala 7 da duman an tla sezions di chemuns scumencià a cumpedé.

USP- De ndut ie 313.867 persones jites a lité l Cunsëi Provinziel nuef, chësc ie l 80,1 percënt di 387.796 cherdei a lité. Permez al’ultima veles provinzieles tl ann 2003 ie stat 2,3 percënt de manco che ie jic a lité. Te Gherdëina à lità l 82,5%, tla Val Badia iesen stai plu lezitënc arjunjan l 83,5%.

USP – N dumënia 26 de utober ie 387 zitadins cherdei a lité da nuef l Cunsëi provinziel de Bulsan per i proscimi cin ani. Tla doi valedes ladines, Gherdëina y Badia, iel 15.070 litadëures. L vën lità n dumënia nchin ala 10 da sëira. La zedules unirà cumpededes l lunesc dala 7 da duman inant.