Comunicat stampa

USP – La Provinzia de Bulsan à scrit ora n cuncors de ideies per na streda de zircunvalazion te Sëlva. Cun chësc var scumëncia la prima pert de proietazion per abiné na soluzion al gran muvimënt di auti che passa tres l luech de Sëlva. “Tres l cuncors de ideies puderan udëi co miuré cuncretamënter l problem de viabilità per Sëlva” sorissea l assessëur ala stredes.

USP – Cun l aiut de cianties, juesc y stories possa i mëndri dla scolina avëi n cuntat cun l’autra rujenedes de nosta provinzia. I trëi Istituc pedagogics dla Provinzia de Bulsan à dat ora n liber cun CD nuef che pieta na basa per chësc cuntat cun la trëi cultures. Ncuei (16 de utober) iel unì prejentà a Urtijëi tla Scolina Salieta la publicazion “Miteinander – Insieme – Deboriada”.

USP – La ferata tla valeda de Puster se prejënta dut ntëur nueva. Tres ncrujedes nueves passà de plu ferates, stazions ressanedes pieta plu sauridanza, de nueva ferates pieta na sensazion nueva de viac. N sada, 18 de utober vëniel tenì n gran di dla ferata pra la stazion de Burnech che nvieia via na era nueva dla ferata te Puster.

USP – Chi che va a scola de ublianza possa nchin ai 31 de utober fé dumanda per cuntribuc per chësc ann de scola. Chësc vën fat al savëi dal Ufize provinziel per assistënza scolastica che à udù dant 230 cuntribuc da 2.800 Euro.

USP – Ncuei (16 de utober) da duman iel unì batù tres l ultim toch dl segondo tunel per la streda de zircunvalazion de S. Cristina. L mumënt aspità ert per via dla dificulteies geologiches a giavé chësc puent ie unì vissù n prejënza dl assessëur ai lëures publics, ambolc y tecnics. Duman vënderdi uniral metù i trames dl puent da Dorives.

USP – La trasmiscions dla RAI de Bulsan y dl RAI3 vën da ncuei (14 utober) mandedes ora cun la tecnica digitela. A Bulsan à l Presidënt dla provinzia ufizialmënter mpià l sistem digitel dla RAS.

USP – Ulà taché ite l’ega, ulà che possa dé sëura l joler ulà iel pa n lech cun ega da destudé fuech: canche i destudafuech muessa fé n ntervënt tl bosch, puderai damoinla se judé cun na cherta digitela ulache n possa udëi la nfrastrutures. L Ufize provinziel per la planificazion di bòsc mët a desposizion ne nueva generazion de chertes per l ntervënt ti bòsc.

USP – Jënt de tëmp sëura 70 ani possa tl Südtirol furné debant cun i mesuns de trasport publics. Da n auter ann inant iel de bujën de n abunamënt aldò, che n possa apusté tl dipartimënt provinziel per la mubilità. L ie unì mandà ora na lëtra a uni persona de tëmp cun l formuler per damandé l abunamënt, sce zachei ne l ëssa nia giapà, adrovel me da cherdé su.

USP – Per vester anjeniei a jì a lité ai 26 de utober, possen sën se cialé n facsimile dla zedula da lité tl internet sun la plates provinzieles. Sun la zedula iel i simboi dla chìndesc listes y cater risses per la stimes de preferënza.

USP – La crisa finanziera y si cunseguënzes sun l’economia tl Südtirol ie ncuei stat l’argumënt zentrel dla senteda dla Jonta provinziela de Bulsan. Do na prima descuscion sun i pruvedimënc da tò, aspieten che la banches, i fonds de pension y i partner soziei feje si cunsulënzes, dan fé vares cuncrec. Te Jonta provinziela iel mplu nce unì rujenà dla cuotes dl lat, la furmazion de dutores spezialisei y de mprësc per studënc.