Comunicat stampa

L ann de scola che se fina ie de segur stat bëndebò positif. De gra al bon tlima de descuscion y de culaburazion danter respunsabli dla scola y nsenianc, genitori y studënc iel stat mesun ruvé a soluzions consensueles sun deplù ponc de gran mpurtanza per l daunì de nosc model de istruzion dla valedes ladines. Nsci an pudù arjonjer formulazions che vën purtedes da duta la pertes n cont dl desseni de lege sun la scolina, la scola elementera y la scola mesana, che vën iust sën tratà tl Cunsëi Provinziel.

USP – La populazion dl Südtirol à arjont ala fin dl ann 2007 la cumpëida de 493.910 y ie nscì ruveda daujin a mesa milion. Nce la capitela provinziela de Bulsan ie bele passeda via i 100.000 abitanc. L aumënt dla populazon ie per 70% gaujà da tei che vën a sté da oradeca, la cumpëida dla nascites resta bassa. La situazion ie unida analiseda dal Istitut Provinziel de statistica ASTAT.

USP – Cun na scumënciadiva particulera vëniel n dumënia ai 15 de juni, da pert dl ufize provinziel per i parcs naturei festejà i 30 ani dl Parch Naturel Puez- Odles. Dala Val Badia, Gherdëina y Funes vëniel muet cun jites nchin dala Schlütterhütte ulache l unirà liet na santa mëssa, fat mujiga y pità n programm per mëndri.

USP – Sasc da copa da plu pertes dl mond iel da sën inant da udëi tl Museum Ladin a San Martin. L se trata de na mostra esclusiva a livel intenaziunel prejenteda an na maniera moderna. Tres chësta mostra possen ti ruvé plu daujin al mister de co che ie unides a se l dé la copes.

USP – L ann comemoratif 2009 dëssa nce unì sentì dai jëuni. Per motivé i sculeies per la storia dl Tirol y che i se debe ju cun la tematica iel unì laurà ora n juech tres internet. L presidënt dla provinzia Luis Drunwalder deberieda cun i assessëures ala cultura Florian Mussner y Sabina Kasslatter Mur à ncuei (merdi 10 de juni), prejentà la scumenciadiva tla cësa provinziela Widmann.

USP - N lunesc ai 16 de juni scumëncia i ejames tla scoles mesanes dla Val Badia y de Gherdëina cun la prova scrita tla rujeneda ladina. L ejam de stat, la matura per la scola autes scumëncia n mierculdi ai 18 de juni.

USP – I lëures publics ie bën de plu che mëter a desposizion strutures, de chësta minonga fova i esperc dl simposium de architetura ntan l fin dl’ena a Auer, duc a una. Sun nvit dl assessëur ai lëures publics Florian Mussner iel unì tenì na discuscion sun l daunì di lëures publics.

USP – Sun la homepage provinziela iel unì dedicà plates ai singuli cumëmbri dl Guviern provinziel. L vën tlo prejentà la cumpetënzes y la biografies, ma nce i fins y la minonghes n cont de argumënc d’uni sort da pert di assessëures.

USP – Te si ultima senteda à l Guviern provinziel de Bulsan danterauter tratà la cuestion che l ti vën vendù l auto a chëi che avisa cun massa alcol tl sanch. N ie tl lëur de la mëter a ji che jëuni possa bele ji pra moster dan avëi 16 ani. Pra i lëures publics dëssel unì adurvà de plu lën da tlo. Dan 10 ani ova la Provinzia sëurantëut la stredes dl stat.

USP – N mierculdi ai 11 de juni uniral sëurandat de ndut 27 stieres tla scolines ladines per l proscimo ann de scola. Maestres che ie tla graduatories per trasferimënc y per ncëries a tëmp determinà ie nviedes tla direzion dla scolines a Piculin.