Comunicat stampa

Por smendrí l’intensité dl trafich tl zënter de La Ila á la Junta provinziala aprové i dac tecnics por la realisaziun de n rondel al’incrujada cun San Ciascian.

„Les barieres ne eliminëia nia i problems, mo ares i sposta. I viun te n’Europa zënza confins interns, che á dötes les condiziuns por defëne sü prinzips che á porté ala nasciüa dl’UE“: chësta é la sintesa dla posiziun coletiva dl presidënt dla Provinzia Arno Kompatscher y dl suranstant dl Parti popolar europeich, Manfred Weber, do n’incuntada incö danmisdé (ai 18 d’aurí) tl Palaz Widmann.

Ara é gnüda presentada en sabeda ai 16 de aurí a Al Plan de Mareo la publicaziun nöia de Lois Craffonara y de Helga Dorsch dedicada ala figöra storica de Catarina Lanz, l’eroina ladina dles batalies de liberaziun tirolejes. Le liber é gnü dé fora dal Museum Ladin y é le resultat de plü agn d’inrescides sön i aspec desvalies che reverda la „fancela ladina de Spinges“.

Cun la publicaziun nöia dl Museum Ladin vëgnel a löm informaziuns nöies sön la jona d’Al Plan de Mareo Catarina Lanz che á combatü por la liberté. Le liber vëgn presenté en sabeda, ai 16 d’aurí tl salf dles manifestaziun a Al Plan de Mareo dai auturs Lois Craffonara y Helga Dorsch. Ala presentaziun tolel ince pert l’assessur ladin Florian Mussner y le diretur dl Museum Ladin Stefan Planker.

La ediziun 2016 dl tornê de hockey danter les scores mesanes dles valades ladines é jüda a piz inier, jöbia ai 07 de aurí, a Cianacëi. Jogadus de Gherdëna, dla Val Badia, de Fodom/Alleghe, de Ampëz y de Fascia á combatü por le titul „campiun de hockey interladin 2016“. Le prömes trëi posiziuns é jüdes a Ampëz, Fascia y Gherdëna.

Le minister di afars cun l’ester Sebastian Kurz s’á incunté incö, jöbia ai 7 de aurí, sön invit dl presidënt dla Provinzia Arno Kompatscher a Balsan cun i trëi presidënc dl’Euregio. Danter l’ater él gnü traté la problematica di profugs, i controi söl confin dl Prener, le svilup dl’autonomia y la tlausola de proteziun dl’Austria.

Cöi adöm propostes por ajorné la colaboraziun danter scolina, scora y families é la tematica prinzipala de döes sëres de discusciun ai 14 d’aurí a Urtijëi (dales 20:00) y ai 21 d’aurí a La Ila (dales 16:30). Les incuntades vëgn metüdes da jí dal’Intendënza ladina, ala pert ince l’assessur por la scora ladina Florian Mussner y l’intendënt Roland Verra. Düc é inviá.

Te Südtirol röiel lapró indöt 96 maestri dai schi nüs, partis sö danter schi alpin y snowboard, 3 maestri dl telemark y 15 direturs de scora dai schi: i diploms é gnü surandá incö (ai 6 de aurí) a Balsan tl contest dla Fiera ProWinter. Danter i maestri nüs ince l’atleta Manuela Mölgg y l’atlet Alex Zingerle.

En sabeda, ai 9 de aurí, gnarál metü a jí dales 10.30 tla sënta dla Biblioteca provinzala dla Teßmann na mësa torona sön la relevanza dla cultura y dl ert por la popolaziun dl Südtirol. La scomenciadia vëgn organisada adöm ala Lia di artisć dl Südtirol.

La Junta provinziala á aprové incö (ai 5 de aurí) le program d’esecuziun dles costruziuns publiches por i proscims trëi agn 2016 – 2018. Por l’ann atual él a desposiziun 47,4 miliuns de euro, tl 2017 sarál a desposiziun 46,7 miliuns y por le 2018 indöt 45,4 miliuns. I intervënc reverda danter l’ater scores, üties y strotöres soziosanitares.