Comunicat stampa

La Junta provinziala á definí incö (ai 2 de forá) le program legislatif da atué dl 2016 y le calënder che taca lapró por alisiré la programaziun di laurs. Al se trata de na seria de ddl che la Junta oress elaboré cina la fin dl ann y che reverda les leges organiches nöies y i adatamënc ales diretives europeiches y statales.

Sostigní abonora y acomagné cun profescionalité les families atocades da chestiuns de separaziun: chisc é i obietifs primars dl pachet de mosöres contignü tl proiet „Families plü stersces“ dl’Agenzia provinziala por la familia, aprové incö (ai 2 de forá) dala Junta provinziala.

Ares s’é stlütes jö da püch les prömes 21 gares por les üties da munt de proprieté dla Provinzia. Dötes les strotöres, adinfora dla Ütia Borletti, é gnüdes assegnades ai gesturs atuai. La bandida publica, che é gnüda despartida aladô dl numer dles üties, prevëiga na conzesciun trienala che podará gní arlunjada por ciamó trëi agn por garantí la planificaziun di investimënc.

La Junta provinziala á aprové incö (ai 2 de forá) l’ordinamënt didatich dl master trienal dal inom “Viticoltöra, enologia y produziun dl vin“ dla Facolté de Sciënzes y Tecnologies dla Université Lëdia de Balsan.

La campagna por la donaziun di organs y le renforzamënt dla rëi de colaboraziun sön le teritore: chëstes é les priorités por le 2016 dles assoziaziuns che se fistidëia te Südtirol dles tematiches che reverda la donaziun de organs. Da püch ti é i obietifs por le 2016 ince gnüs presentá al’assessuria Martha Stocker dai suranstanc de AVIS, AIDO, ADMO y ADISCO.

Indöt á 42 educadësses y educadus, en gran pert dla scora ladina, stlüt jö en sabeda, ai 30 de jená, la scoraziun „Montessori“ metüda a jí dal Ciamp Inovaziun y Consulënza adöm cun la Akademie Montessori Biberkor de Paiern. „La scora ladina pó amplié insciö süa oferta formativa cun na forma de pedagogia de valüta internazionala“, á sotligné l’assessur Mussner pro la surandada di diploms.

Ai messass jí en forza cun le mëteman dl isté i criters de sostëgn nüs che reverda les ativités da d’isté y dl domisdé di mituns y di jogn. I contignüs dla reforma ti é gnüs presentá ales assoziaziuns, cooperatives y organisaziuns che laora tl setur dl’assessuria Waltraud Deeg y dal diretur dl’Agenzia por la familia Stefan Walder.

L’Intendënza scolastica ladina á publiché incö (ai 29 de jená) les materies di ejams de maduranza tles scores altes che reverda la secunda proa scrita. La data de scomenciamënt di ejams é chësc ann ai 22 de jügn dl 2016. 100 é atualmënter les scolares y i scolars che frecuentëia na cuinta tlassa dles scores altes ladines.

La Biblioteca provinziala todëscia „Friedrich Teßmann“ y la Biblioteca provinziala taliana "Claudia Augusta" lascia alessëi che les strotöres restará davertes ma cina les 12.30 ai 04 de forá (Jöbia grassa) y ai 09 de forá (Carlascé).

En colaboraziun cun l’Akademie Montessori Biberkor dl Paiern á le Ciamp Inovaziun y Consulënza organisé na scoraziun de dui agn che reverda la metoda d’insegnamënt Montessori y süa atuaziun tles scores elementares y scolines tles valades ladines. Do la proa de contlujiun ti gnarál surandé ales partezipantes en sabeda ai 30 de jená i diploms tla scora elementara de Urtijëi.