Comunicat stampa

Cun le scomenciamënt de merz gnarál tigní les proes d’idoneité por maestri y maestres di schi y dla brëia. Les iscriziuns al’ejame mëss gní presentades al’Area funzionala turism dla Provinzia cina ai 24 de forá dl 2016.

L aniverser di 100 ani dala costruzion dla ferata de Gherdëina sarà chëst ann una dla tematiches dla Repartizion Cultura y Ntendënza Ladina. "L focus sarà sun la storia dla ferata cun nce n’udleda sun l daunì", nsci l assessëur Florian Mussner. Ai 23 de fauré uniral zelebrà na mëssa adum cun n pope dla dlieja russa-ortodossa per lecurdé la vitimes russes y duc i lauranc che à realisà la ferata.

Le presidënt dla Provinzia Arno Kompatscher sará indoman (ai 16 de forá) a Viena adöm cun i suranstanc dl Trentin y dl Tirol. Al é sön le program döes incuntades cun la ministra por les chestiuns internes Johanna Mikl Leitner, sön la chestiun di migranc y di controi ai confins, y daldô cun le presidënt dla Republica dl’Austria Heinz Fischer.

Les mosöres de control spezifiches sön le Prener messará avëi n carater straordinar, transitore y limité tl tëmp: chësc é chël che i presidënc Arno Kompatscher, Ugo Rossi y Günther Platter ti damana ala Talia y al’Austria cun na deliberaziun y reuniun incö (ai 15 de forá) a Balsan dl GECT Euregio. Incuntades preodüdes ince a Viena y Roma.

La promoziun di lingac de mendranza te contesć de plurilinguism é un di obietifs primars dla rëi d’archirida “Mercator”, la organisaziun dles scores de mendranza por cunt dl’Uniun Europeica. La plataforma europeica presentëia da püch sön süa plata internet l’intendënt Roland Verra sciöche espert dl mëis de forá y fej ince referimënt a süa publicaziun “The Ladin language in education in Italy".

L’Aministraziun provinziala á publiché incö, ai 11 de forá, n concurs por cater posć por colaboradus aministratifs resservá ai ladins. I posć é a tëmp indeterminé, dui a tëmp plëgn y dui a tëmp parzial. An pó se scrí ite cina ai 2 de merz dl 2016.

En gaujun dl De internazional dl lingaz dla uma ogranisëia le Sorvisc de coordinamënt por l’integraziun en vëndres, ai 19 de forá dl 2016, dales 17.00 inant n convëgn en presënza dl soziologh Adel Jabbar y cun le scienziá Lorenzo Zanasi dl Eurac tl Palaz Widmann a Balsan. L’entrada é debann, iscriziuns tres email.

Le Südtirol ará tl dagní la poscibilité da antergní diretamënter por limité le trafich di auti ince por sostigní la sconanza dl ambiënt y dl paesaje. La norma d’atuaziun che regolamentëia chësc argomënt é gnüda aprovada inier da sëra (ai 10 de forá) dal Consëi di Ministri en presënza dl presidënt Arno Kompatscher. Löm vërda ince ala norma sön la Curt di Cunc.

Imajes, inoms y stories sará tl zënter dla secunda ediziun dl Liber dl sport südtirolej 2015, che contëgn les sfidades y les arjuntes sportives plü beles tl ann passé. Le liber dl sport gnará presenté dal’assessuria Martha Stocker, adöm ai ghesć d’onur y campiuns dl monn 2015 Roland Fischnaller, Evelin Lanthaler, Patrick Pigneter y Florian Clara.

En sabeda, ai 13 de forá, sará le presidënt dla Provinzia Arno Kompatscher y le presidënt dla Regiun Venet Luca Zaia a Cortina por sotescrí le protocol d’acordanza por la planificaziun de n coliamënt feroviar danter la Val de Puster y le Ciadura. Ala firma sarál ince presënt le minister por les infrastrotöres y i trasporc Graziano Delrio.