Comunicat stampa

Imajes, inoms y stories sará tl zënter dla secunda ediziun dl Liber dl sport südtirolej 2015, che contëgn les sfidades y les arjuntes sportives plü beles tl ann passé. Le liber dl sport gnará presenté dal’assessuria Martha Stocker, adöm ai ghesć d’onur y campiuns dl monn 2015 Roland Fischnaller, Evelin Lanthaler, Patrick Pigneter y Florian Clara.

En sabeda, ai 13 de forá, sará le presidënt dla Provinzia Arno Kompatscher y le presidënt dla Regiun Venet Luca Zaia a Cortina por sotescrí le protocol d’acordanza por la planificaziun de n coliamënt feroviar danter la Val de Puster y le Ciadura. Ala firma sarál ince presënt le minister por les infrastrotöres y i trasporc Graziano Delrio.

„Assiguré l’assistënza sanitara te Südtirol ince por i agn che vëgn: chësc é nosc compit primar“, sotlignëia l’assessuria provinziala Martha Stocker en ocajiun dl De mondial di amará che toma ai 11 de forá. Tl zënter dles politiches sanitares mëssel ester i paziënc cun sü bojëgns, y ince cun sües tëmes, preocupaziuns y nezescités, insciö Stocker.

La Consulta di Jogn ladina s’á incunté en vëndres (05/02) a La Ila por dé jö so arat sön le program anual por la promoziun dl sorvisc jogn dl grup linguistich ladin. Do na debatüda é le plann gnü aprové. La Consulta á ince stabilí, da orëi se dé jö tl dagní de plü cun la chestiun di jogn y dla pröma ciasa por informé i jogn sön les poscibilités de cumpra y costruziun de na pröma ciasa.

Ai 09 de forá, mertesc de Carlascé, sará i ofizi daverc ma danmisdé y al ne sará degöna sentada dla Junta provinziala. Le presidënt, i assessurs y les assessuries s’incutará indô ai 16 de forá.

L’edema da denant é les portines uniches por l’assistënza y la cura por porsones nia autonomes gnüdes presentades: sëgn á la Repartiziun Politiches provinziales ince publiché sön internet la lista di sorvisc y di contac. La plata internet cun düc i contac, ince por la Val Badia y Gherdëna, é da ciafé sot a: www.provincia.bz.it/sociale

Plü de 150 jogn y jones dal Südtirol tolará pert al percurs dles recordanzes de Promemoria_Auschwitz cun la ferata che pëia ia incö (ai 04 de forá) cun sön le program vijites al ghetto ebraich a Krakau, ai ciamps dla mort de Auschwitz y Birkenau y ala fujina de Oskar Schindler. I assessurs Mussner, Tommasini y Achammer á saludé i partezipanc incö a Balsan.

Cun tles mans i resultac dla sentada coletiva de novëmber dl ann passé a Porsenú ti á i rapresentanc dles trëi Consultes di Jogn presenté inier, mertesc ai 2 de forá, ai trëi assessurs provinziai Mussner, Tommasini y Achammer sües ghiranzes y propostes por le svilup tl dagní dles tematiches che ti stá plü a cör ai jogn.

La Junta provinziala á ince aprové incö (ai 2 de forá) te süa sentada edemala le program 2016 dla Comisciun por l’avalianza dles oportunités. De plü é les scomenciadies planificades, danter l’ater ativités de sostëgn a proiec che reverda l’avalianza di sesc y na revalutaziun dla imaja dles ëres ti media.

I dac de proprieté dl’aministraziun pulica sará azessibli por düc y podará gní adorá tres le portal Open Data Südtirol. La deliberaziun che regolamentëia n’azessibilité tres plü daverta ai Open Data é gnüda aprovada incö (ai 2 de forá) dala Junta provinziala sön proposta dl’assessuria Waltraud Deeg.