Comunicat stampa

La Junta provinziala á stabilí incö (ai 08/03) i criters nüs pro la conzesciun di contribuc ai lauranc dependënc por les spëises de iade. I criters, proponüs dal assessur Florian Mussner, ti corespogn ales diretives UE y á le fin da sostigní i pendolars che fej na trata lungia y complicada por arjunje le post de laur. Les domandes pó gní presentades da aurí cina ai 30 de jügn.

La Junta provinziala á aprové la gradatöra definitiva dla bandida por la daurida de 20 apoteches nöies (de chëstes öna n’apoteca provisora) sön le teritore südtirolej. Sis de chëstes gnará daurides a Balsan, döes a Maran y Porsenú. I partezipanc al concurs á sëgn 60 dis de tëmp por presenté recursc eventuai.

La Junta provinziala á dé incö (ai 08/03) süa aprovaziun ala pröma tlamada por la presentaziun di proiec tl contest dl program de cooperaziun INTERREG V A Talia-Austria (2014-2020) Por chësc pröm call él a desposiziun 30 miliuns de euro de finanziamënt europeich dal program por le svilup regional FESR.

La Junta provinziala á aprové incö (ai 08/03) sön proposta dl assessur Florian Mussner na delibera che alza la capiënza orara dl personal sajonal dl’Aziënda Museums provinziai. A pert le Museum archeologich y le Museum de Sciënzes naturales, che é daverc döt l’ann, dauriará ince tosc les atres set strotöres sües esposiziuns ai vijitadus tles proscimes edemes.

L’eutanasia y i aspec desvalies che reverda la tematica sará tl zënter dla secunda sëra publica metüda da jí dal Comité etich provinzial en mercui ai 9 de merz a Balsan. En colaboraziun cun le Filmclub gnarál mostré le film“Am Ende ein Fest“ por todësch. L’entrada é debann.

La consultaziun popolara söl aeroport de Balsan gnará tigní en domënia ai 12 de jügn: le decret che alda lapró dl Presidënt dla Provinzia é gnü publiché incö (al 1 de merz) sön le Boletin ofizial dla Regiun.

Cun la reforma dl marcé dl laur (Jobs Act) dl govern Renzi mëss ince la Provinzia de Balsan se fistidié por atué n valgönes mudaziuns che reverda l’ordinamënt dl lernerat. Le dessëgn de lege é gnü aprové dala Junta provinziala: al é preodü na norma ad hoc por garantí l’ejam de maturité al intern dla formaziun duala.

La Junta provinziala á aprové incö (al 1. de merz) le program 2016 por l’inrescida y l’inovaziun. Le budget dla Repartiziun inovaziun, inrescida y université é de 134 miliuns de euro. Al pó ti rové pormez al sostëgn finanziar ënc de inrescida, impreses o proiec de cooperaziun danter aziëndes.

L’assistënza sanitara di ghesć dles residënzes por seniors tl Südtirol gnará miorada tres na presënza costanta y strotorada de doturs: chësc é l’obietif prinzipal dla delibera aproada incö (al pröm de merz) dala Junta provinziala. Aladô dles dimenjiuns dla strotöra ará i seniors n’assistënza cun dai dui ai cinch doturs de medejina generala.

L’analisa scientifica di produc „made in Südtirol“ sará le compit prinzipal dl laboratore sensorial nü dla Laimburg. La Junta provinziala ti á dé incö süa aprovaziun al program volumetrich dl laboratore che ará na spëisa de 600mile euro y che gnará cofinanzié tres le FESR. L’assessur Schuler á presenté la proposta.