Comunicat stampa

Incö domisde (ai 9 de novëmber) él gnü a se le dé la pröma incuntada di suranstanc dl Departimënt Sanité y dl’Aziënda sanitara provinziala por definí l’organisaziun dles prestaziuns sanitares tl dagní ti set ospedai provinziai y di sorvisc dl’Aziënda sanitara.

L’assessur Arnold Schuler á firmé incö (ai 9 de novëmber) a Balsan cun i rapresentanc di seturs dl’agricoltöra, dl comerz y dl setur energetich la „Charta dl lëgn“. Al se trata de n documënt che prevëiga „la realisaziun de mosöres de promoziun por chësta ressursa preziosa che á ince na gran valüta economica por nüsc raiuns“, insciö Schuler.

Les trëi Consultes provinziales di jogn de düc i trëi grups linguistics s’á incunté en sabeda ai 7 de novëmber por na sentada deboriada. L’incuntada é gnüda a se le dé por inrescí les poscibilités de colaboraziun sot al moto "Gemeinsam Projekt Südtirol - la mia Heimat - cun deplu rujenedes y cultures".

En mertesc ai 10 de novëmber gnarál organisé dales 13.30 tla Ciasa dla Cultura a La Ila n jüch por mituns cun pesć ispiré ala trascmisciun televisiva dla „Millionenshow“ sön la tematica dla laurs dolomitica Ursus ladinicus. La scomenciadia é organisada dal Museum ladin, l’entrada é debann.

UploadSounds é n contest de musiga che reverda döt le raiun dl’Euregio Tirol-Südtirol-Trentin. Dai 3 de novëmber é les iscriziuns davertes por düc chi che ó se candidé por tó pert al’ediziun 2015/16 de UploadSounds. Le festival é dediché ai jogn talënc de musiga.

En sabeda ai 7 de novëmber gnarál tigní na sentada deboriada dles trëi Consultes di Jogn di grups de lingaz ladin, todësch y talian. Dales 17.30 sarál spo poscibl da incunté i rapresentanc dles consultes por informaziuns y domandes.

L’entrada te vera dla Talia y les situaziuns de vera sön le front é les tematiches dl convëgn dediché al “Ann de vera 1915” che pëia ia en jöbia ai 12 (cun na mësa torona) y che vá inant en vëndres ai 13/11 (cun referac). Le convëgn é organisé dala Teßmann y dal’Academia austriaca dles Sciënzes adöm cun le Zënter de competënza regionala dla LUB y l’Istitut storich talian-todësch de Trënt.

„I sun sigüsc che la promoziun di sorvisc d’assistënza spezialisá pois ti garantí ales families n sostëgn y n’informaziun plü ampla y n renforzamënt abonora“, á dit l’assessuria provinziala Waltraud Degg incö (ai 4 de novëmber) a Balsan ala presentaziun dles mosöres formatives preodüdes por les families dl Südtirol. Le Departimënt Familia mët a desposiziun vigni ann 3,6 miliuns de euro.

Da chësta edema él da ciafé sön la plata dl’Euregio Tirol-Südtirol-Trentin n concurs fotografich cun pesć dediché ala sajun da d’altonn tl Euregio. Cina ai 15 de novëmber él düc che pó mené sües fotografies dl altonn che gnará spo coiüdes adöm te n album spezifich sön Facebook. La dezijiun sön chi che davagna le concurs sará tles mans di vijitadus de FB.

La Junta provinziala á fat n vare inant incö por ci che reverda l’atuaziun tl Südtirol dl program plurianual nü (2014-2020) dl Fonds sozial europeich. Sön proposta dl presidënt Kompatscher él gnü nominé les porsones che manajará i rodi dl’autorité de gestiun, dla zertificaziun y dl audit. Le presidënt Kompatscher á implü anunzié da orëi „stlü jö cina d’isté la contabilité intardiada dl FSE.“