Comunicat stampa

Al é gnü prolungé ciamó por trëi agn i coliamënc direc cun le bus danter la Talia y la Svizera sön la trassa danter Müstair-Mals y Martina-Nauders-Mals. La convenziun, a chëra che al tol pert la Provinzia de Balsan, le Ciantun di Grijiuns, la SAD y le PostAuto Schweiz, é gnüda aprovada incö, ai 24 de novëmber dala Junta provinziala sön proposta dl assessur Florian Mussner.

Al vá inant le percurs de definiziun de düc i aspec che reverda la fujiun danter SEL Spa y AEW Spa. La Junta provinziala á dé incö (ai 24 de novëmber) süa aprovaziun ai proscims dui vari tl prozes de reorganisaziun dl setur dl’energia tl Südtirol: da öna na pert la prorogaziun dl termin dla conclujiun dl’operaziun de fujiun, dal’atra pert l’aprovaziun dles condiziuns stabilides dal’Antitrust.

La Junta provinziala á tut la dezijiun incö da renové la colaboraziun cun i trëi istituc dl’Austria che é spezialisá tl tratamënt de patologies gravëntes dla dependënza da alcol y da medejines y tles problematiches coliades. Les convenziuns spezifiches é gnüdes renovades incö ai 24 de novëmber dala Junta.

La Junta provinziala á aprové incö (ai 24 de novëmber) le schema de convenziun che regolëia les modalités dles proietaziuns dl coliamënt danter la linia dla ferata de Puster cun chëra dl Prener. Le finanziamënt de 1,5 miliuns de euro vëgn dal program de mosöres de compensaziun ambientales por la realisaziun dl tunel de basa dl Prener.

Dla revijiun dl Statut d’autonomia do la reforma costituzionala y dl’acordanza á baié le presidënt dla Provinzia Arno Kompatscher incö (ai 23 de novëmber) a Viena cun le presidënt dla Republica austriaca Heinz Fischer, le vize-canzelier Reinhold Mitterlehner y le minister por l’Ester Sebastian Kurz.

Les scomenciadies organisades a livel provinzial por recordé le De mondial cuntra la violënza sön les ëres é gnüdes presentades incö ai 23 de novëmber a Balsan. Öna dles mosöres prinzipales é por l’assessuria provinziala por l’avalianza dles oportunités Martha Stocker la prevenziun.

Le Ciamp Inovaziun y Consulënza tl Departimënt Educaziun y Cultura ladina inviëia düc i interessá ala presentaziun dles unités didatiches nöies de ladin por la scora alta en lönesc, ai 30 de novëmber dl 2015, dales 15.00 tl Museum Ladin Ciastel de Tor. Ala presentaziun tolarál ince pert l’assessur ladin Florian Mussner, l’intendënt Roland Verra y le diretur Felix Ploner.

Por se dé jö cun i avenimënc y le svilup dles localités dl Südtirol s’á incunté incö, vëndres ai 20 de novëmber, söporjö 100 cronisć en gaujiun dl 18ejimo De di Cronisć dl Südtirol. L’assessur Florian Mussner á rengrazié i cronisć por so laur de racoiüda volontar por i paisc dla Provinzia y ti á surandé n’onoranza por i gragn miric te chësc setur ince a siur Christian Moroder.

La Provinzia á albü tles edemes passades de plü contac cun Comuns desvalies por ci che reverda la realisaziun de storöres ajuntives d’acoliënza por porsones che damana do asil y por sostigní na miú spartiziun di profugs assegná dal govern ala Provinzia.

La mobilité y l’elaboraziun de n plann strategich por n turism sostenibl cina la fin dl 2015: chisc é stá i temesc dla reuniun dl Consëi d’aministraziun dla Fondaziun Dolomites UNESCO, cun a cé l’assessur dl’ambiënt Richard Theiner, inier (jöbia ai 19 de novëmber) a Ampëz.