Comunicat stampa

Dal mëis de aurí dl 2014 él gnü aprové l’esenziun zënza scadënzes dal paiamënt dl ticket por paziënc che á maraties croniches de zircolaziun. Cun la deliberaziun aprovada incö (ai 3 de novëmber) dala Junta provinziala vëgn le passaje dal sistem vedl (36 mëisc) al sistem nü (zënza limic de tëmp) fat te na manira automatica. „L’obietif – sotlignëia Stocker – é chël da smendrí la burocrazia."

La Junta provinziala á aprové incö (ai 3 de novëmber) la secunda pert dl finanziamënt 2015 por l’Université Lëdia da Balsan. La Provinzia mët a desposiziun 15,2 miliuns de euro por l’ativité dl ënt de formaziun y ti conzed, danterater, da manajé inant la Biblioteca medejinala virtuala.

Ince tl ciamp dla medejina nia convenzionada é la formaziun cualificada n criter fondamental por podëi garantí la cualité dles prestaziuns pitades. La Junta provinziala á porchël aprové incö (ai 03/11) les modalités de reconoscimënt dla zertificaziun a istituziuns publiches y privates por pité prestaziuns ti seturs dl’agopuntura, dla fisioterapia y dl’omeopatia.

La plataforma de interaziun soziala y digitala „facebook“ é n stromënt d’ütl por baraté fora sü pinsiers y l’adoranza di lingac te chësc contest é sté tl zënter de n’analisa che gnará presentada en mertesc, ai 10 de novëmber, da sëra tla sënta dla Teßmann da Balsan. Ala mësa torona de discusciun tolarál pert esperc dla sciënza, dla scora y dl jornalism.

Cun la fin dl mëis d’otober s’ál stlüt jö la sajiun dles Ciases de vijita di parcs naturai dl Südtirol: le program de scomenciadies é sté dër ampl ince chësc ann, da alzé fora él danterater i dui cursc de fotografia metüs a jí en colaboraziun cun l’assoziaziun Federparchi. Le resultat: bëgn plü de 10mile retrac dles belëzes dla contrada y dla natöra „made tl Südtirol“.

Dan da püch él gnü publiché l’ediziun plü nöia dla revista d’informaziun „ëres“. L’ediziun ti é gnü dedicada al aniversar di 25 agn dala nasciüda dla Comisciun provinziala por l’avalianza dles oportunités che é stada buna da arjunje te so percurs de plü obietifs. Tröpes mosöres y scomenciadies dla comisciun á insciö contribuí a svilupé inant positivamënter la sozieté tl Südtirol.

Le program dles costruziuns dl Istitut por le frabiché sozial IPES por i agn 2016-2020 contëgn la realisaziun de indöt 300 abitaziuns nöies por n investimënt complessif de 75 miliuns de euro. La planificaziun é gnüda presentada incö, ai 30/10, tla sënta dl IPES da Balsan dal assessur por le frabiché abitatif Christian Tommasini. Tl program él ince 5 abitaziuns nöies a Urtijëi y 6 a Ciastel.

Le post de pelegrinaje San Romedio tla Val de Non, la personalité dër conesciüda tl ambit cultural Gerhard Prantl y la chestiun iuridica dla sconanza dles plantes tl’Euregio é i temesc dl mëis dla plata internet ofiziala dl’Euroregiun Tirol-Südtirol-Trentin.

La Consulta por la familia á incunté le presidënt Arno Kompatscher por tematisé n valgügn di seturs prinzipai dla politica por la familia: dales alisiraziuns fiscales preodüdes tl bilanz ala lege sön i apalc, cina ales diretives por l’assistënza al’infanzia. „La politica por la familia – á splighé Kompatscher – é danter les priorités dla Junta, por chësc ann ti él gnü assegné 500 miliuns.“

Indicaziuns stradales, placac sön les corieres, anunzies tl radio, informaziuns sön internet y ti social media. Da indoman, ai 30 d’otober, pëia indô ia te döt le Südtirol la campagna de prevenziun sön l’alcol „Bëre cun mosöra“. N tema tres d’atualite che reverda dötes les generaziuns cun söporjö 3mile porsones che á damané l’ann passé tl Südtirol aiüt por problems cun l’alcol.