Comunicat stampa

Le Conservatore Monteverdi de Balsan pitará dal ann academich 2015/16 inant n curs de secundo livel por la formaziun de maestri de musiga che insegna da soné n stromënt: la Junta provinziala á aprové incö, mertesc ai 20 d’otober, la deliberaziun che autorisëia l’ativaziun di cursc. I posć de stüde preodüs é 34 por todësch y 12 por talian.

Dal 2016 inant deventará operativa tl Südtirol l’aziënda speziala nöia che é nasciüda dala fujiun danter cater fornidus locai de sorvisc tl ciamp economich: BLS, EOS, SMG y TIS. Incö á la Junta provinziala aprové l’istituziun dl’aziënda speziala nöia y so statut.

Per avëi na basa scientifica dla cunescënza dl ladin, tudësch y talian tl scuté su y tl ntendër di mutons dla scolines à la Intendënza ladina metù a jì adum ala Università de Persenon na evaluazion dla situazion atuela. N ressumé di resultac dl svilup linguistich di mutons y dla mutans dl ultimo ann tla scolines ladines uniral prejentà ai 28/10 dala 16.00 a Urtijëi. Duc i interessei ie inviei.

Te na conferënza stampa él gnü presenté incö, lönesc ai 19 d’otober, a Balsan dal’assessuria por la sanité y les politiches soziales Martha Stocker la „Relaziun sanitara 2014“. Le focus dl’inrescida da chësc ann é sté n’analisa particolara che reverda la sanité dles ëres.

En domënia, ai 25 d’otober organisëia le Musem Ladin Ciastel de Tor n torneo de batadú a San Martin de Tor y n domisdé cun ativités por mituns y gragn cun entrada debann tl Museum Ladin Ursus Ladinicus a San Ciascian.

La Comisciun provinziala por l’avalianza dles oportunités mët a jí en gaujiun dla festa de sü 25 agn na manifestaziun en vëndres ai 23 d’otober dl 2015 dales 17.00 tl Ciastel Maretsch a Balsan. L’incuntada cun i media é dales 16.30.

Vari inant por les trasses d’azes dl proiet dl tunel de basa dl Prener (BBT): a Roma á RFI, gestur dla rëi dla ferata, dé jö al Ministere dles infrastrotöres y di trasporc le proiet definitif por la trassa d’azes Fortezza-Pruca. A chësta moda vëgnel metü da jí l’iter d’autorisaziun dl CIPE.

L’anima te situazions dramatiches sciche tl cuntest de viera sarà tl zënter dl referat “L’anima dla viera – La viera tl’anima“ tenì dal dutor spezialisà te psichiatria y psicoterapia Mario Horst Lanczik ai 27 d’utober dala 19.00 tla Galaria Prisma a Bulsan. La relazion fej pert dla curnisc dla mostra 1915-2015 metuda a jì dala Repartizion Cultura ladina y dal Südtiroler Künstlerbund.

Al tema dla migraziun ti dedichëia la biblioteca provinziala Teßmann da Balsan dui apuntamënc. En vëndres ai 23 d’otober sarál da odëi le film „Io sto con la sposa“, premié plü iadi a Aunejia, y en sabeda ai 24 d’otober gnarál presenté de plü publicaziuns y auturs dla leteratöra africana y asiatica.

Le percurs de reorganisaziun dl setur dl turism dla Provinzia de Balsan vá inant. Incö (ai 15 d’otober) s’ál incunté le comitê de coordinamënt a Balsan adöm al presidënt dla Provinzia Arno Kompatscher. La tematica prinzipala é stada la restrotoraziun dl’organisaziun provinziala dles assoziaziuns turistiches.