Comunicat stampa

La revista culturala nöia „NuJ“ é scrita te plü lingac, danter chisc ince por ladin y da ladins, y pita na plataforma de presentaziun a de plü artisć jogn dl Südtirol. Ara vëgn dada fora un n iade al ann cun indöt 3.000 ejemplars. La pröma ediziun é gnüda presentada dan da püch a Urtijëi dal assessur provinzial Philipp Achammer.

La Junta provinziala á inserí incö (ai 6 de otober) na desposiziun tl regolamënt dl’esecuziun dla lege urbanistica provinziala por stabilí la tomada dl termo di dui agn por les mudaziuns ajuntives ai planns urbanistics. La dorada dl tëmp vëgn calcolada danü tres cun le scomenciamënt dla legislatöra comunala nöia.

I laurs de manutenziun dla pista de ateraje y start dl aeroport da Balsan dess gnis stlüc jö cina la fin de novëmber. Chësc é gnü anunzié incö (ai 6 de otober) dal presidënt Arno Kompatscher che á sotligné inant che al se trata de „intervënc bele planificá che ne á nia da nen fá cun n ampliamënt ipotisé dla pista.“

Por ti consintí ales imprejes na miú adoranza dles alisiraziuns statales y de chëres provinziales tl ciamp economich á la Junta provinziala aprové incö (06/10) la cumulabilité de n valgönes de chëstes alisiraziuns. La Junta provinziala á implü adoté na scemplificaziun dles prozedöres por les imprejes inserides tla White List dl Minister.

Realisé n implant de simulaziun che reprodüj les condiziuns climatiches plü estremes: chësc é le proiet dl Istitut por la medejina d’emergënza alpina dl’EURAC che gnará finanzié dala Provinzia de Balsan cun n investimënt de 5 miliuns de euro. Retüda economica y vari inant tl svilup dl’archirida scientifica é i vantaji prinzipai.

La Junta provinziala á aprové incö (ai 6 d’otober) l’ejame dla valutaziun dl impat ambiental dl proiet d’ampliamënt y de restrotoraziun dl depuradú de Pontives y dl proiet por le potenziamënt dl implant de telescialdamënt de Balsan.

Por garantí na maiú segurëza ala zircolaziun sön la strada statala dl Prener da Balsan en direziun de Tlüses tla zona de Bluman á la Junta provinziala definí incö (06/10) n valgügn intervënc de prescia, danter chisc la realisaziun de n mür de proteziun cuntra les peres y le spostamënt dl tru dles rodes.

Dal 2004 colaborëia les Provinzies dl Südtirol y dl Trentin cun les regiuns dl Venet y dl Friul ti seturs dla prevenziun, dla diagnosa y dla cura dles maraties che vëgn dant dainré. La Junta Provinziala á nominé incö (6 de otober) trëi zëntri de referimënt nüs suraregionai che ará süa sënta tl ospedal da Balsan.

La Junta provinziala ó defëne le dërt al’adoranza paritara di lingac provinziai tl’Aministraziun publica y porchël éra antergnüda te dui caji de concursc dla Polizia statala, do che al é gnü constaté na violaziun dles desposiziuns dl Statut d’autonomia. La Junta á tut incö (ai 6 d’otober) la dezijun da contesté les perts che reverda le Südtirol.

Lauré fora strategies por na mobilité sostenibla: chësc sará le compit dl grup de laur nü che se crüziará dla ’Green mobility’, la mobilité sensibla sön l’ambiënt, che la Junta provinziala á istituí incö (ai 6 d’otober) sön proposta di assessurs Florian Mussner y Richard Theiner. Le grup de laur ará na funziun spezifica al intern dla STA (Strotöres trasporc Südtirol).