Comunicat stampa

I teritori “Leader” chiris fora dala Provinzia de Balsan tl cheder dl program de svilup rural 2014-2010 finanzié dal’Uniun Europeica é sis. Chësc é gnü fat fora incö, ai 15 de setëmber, dala Junta provinziala y l’assessur competënt Arnold Schuler á alzé fora che “al vëgn rapresenté düc i raiuns dl Südtirol, destenüs fora tl teritore cotan plü da toch co tl passé”.

L’aziënda economica nöia, che mët adöm te na sozieté unica les cater sozietés dla SMG, EOS, TIS y BLS, jará en funziun dal 1 de jená dl 2016 inant. Do mëisc d’analisa y de propostes él gnü stabilí incö (15/09) da pert dla Junta provinziala tres n’acordanza cheder i proscims vari che dess porté ala nasciüda dl’aziënda economica nöia de proprieté dla Provinzia y dla Ciamena dl Comerz.

Cun le scomenciamënt dl ann 2016 jará en funziun na rëi de suraverda epidemologica veterinara aladô de n sistem nü cun la figöra prinzipala dl doturs dai tiers ’aziendal’: la proposta dl assessur Arnold Schuler é gnüda aprovada incö (15 setëmber) dala Junta provinziala.

Cinch posć culturai che ne é normalmënter nia daverc al publich pó gní vijitá ai 20 de setëmber en ocajiun dl De europeich dl patrimone. „Chëstes operes storiches nes dá la poscibilité da descurí le tëmp passé, mo ince da ponsé al dagní“, insciö l’assessur por i bëgns culturai Florian Mussner incö (14/09) ala presentaziun dla scomenciadia. Da odëi sarál ince na ciasa retica.

Le Departimënt Educaziun y Cultura Ladina dla Provinzia de Balsan inviëia düc i interessá al De dla Cultura Ladina olache an baiará de „Liberté de stampa: dërt d’informaziun y responsabilité di media“. Le convëgn gnará tigní, en presënza dl assessur Florian Mussner y de tröc esperc dl monn di media, en jöbia ai 24 de setëmber dales 09.00 inant tl Palaz Widmann a Balsan.

Sot le moto „Vire, gusté y sintí l’Euregio Tirol-Südtirol-Trentin“ gnarál tigní ai 19 de setëmber a Dala/Hall tl Tirol la gran festa dl’Euregio. La popolaziun dles trëi provinzies é inviada a tó pert ala scomenciadia.

Les sfidades dla sanité sará tl zënter de n convëgn söi 35 agn dl ativité dl Tribunal por i dërc di amará che gnará tigní ai 18 de setëmber tl Auditorium dl Palaz provinzial 12 tla strada via Gamper 1 a Balsan. Al convëgn tolarál pert l’assessuria provinziala Martha Stocker y le diretur general dl’Aziënda sanitara Thomas Schael.

Tl contest dla campagna de sensibilisaziun sön la donaziun de organs vëgnel metü da jí ai 15 de setëmber na sëra d’informaziun dales 20.00 a Badia cun l’assessuria Martha Stocker, le primar Marco Pizzinini, le neurologh Gregorio Rungger y le diretur da denant dl raiun sanitar da Bornech Davide Willeit. Tl zënter dl convëgn sarál ince les impresciuns personales de paziënc atocá y de sü familiars.

Pröma incuntada ofiziala incö (10/09) a Balsan danter le presidënt dla Provinzia Arno Kompatscher y chël dl Land austriach dl Vorarlberg Markus Wallner. I dui suranstanc á sotligné l’importanza da „lauré adöm por se fá sintí deplü tl contest europeich.“ Danter les tematiches tratades él ince sté la Macroregiun alpina, l’economia y la formaziun.

Le passaje de arees militares ala Provinzia sciöche barat por abitaziuns nöies por i soldas: chësc é le contignü de na convenziun danter le Minister dla Defenüda y la Provinzia de Südtirol stabilida bele dan da ot agn y che vëgn sëgn portada inant cun n’acordanza ajuntiva y la deponüda dla pröma pera por la costruziun de abitaziuns nöies incö ai 10/09 a Maran en presënza dl presidënt Kompatscher.