Comunicat stampa

Dal 2013 é i contribuc provinziai por l’afit strotorá atramënter: les döes prestaziuns da denant, le sostëgn por la ciasa paié dal IPES y le contribut por l’afit paié dai raiuns soziai, vëgn metüs adöm te na sora prestaziun. Tla fasa transitora dl regolamënt nü vál debojëgn de n valgügn adatamënc aprová incö (22/09) dala Junta provinziala.

Al é de indöt 32 miliuns de euro le import preodü por la perioda 2014-2020 dal program dl Fonds europeich por le svilup regional (FESR) ti seturs dl’archirida y dl’inovaziun. Do la löm vërda al program operatif „Investimënc de sostëgn ala cresciüda y al’inovaziun“ á la Junta provinziala aprové incö (22/09) sön proposta dl presidënt Arno Kompatscher la pröma bandida por 10 miliuns de euro.

Dal mëis de novëmber 2015 cina jená 2016 gnarál organisé n percurs de stüde che portará indô de plü cenc de scolars dal Südtirol, dal Trentin y chësc ann ince dal Tirol, sön le iade dla recordanza a Auschwitz-Birkenau y a Cracovia. L’ediziun nöia é gnüda presentada incö (21/09) dai trëi assessurs por la cultura Mussner, Tommasini y Achammer y dales organisaziuns partezipantes.

Por gaujia dl prigo dla tomada de peres é la strada statala dl Prener (SS12) sarada do la galaria de Bluman cina plüssigü en mercui ai 23/09 por döt le trafich te trames döes les direziuns. Le trafich gnará desvié sön l’A22 y sön la strada provinziala Steinegg-Gummer. Sön l’A22 ne él da paié degun daz da incö dales cater domisdé inant por autisć che adora l’autostrada danter Tlüses y Balsan Nord.

Pervia dl pericul de sasc che toma ju unirà la streda dl Prëner (SS 12) y l troi dla rodes do l tunel a Blumau śarei da ncuei domesdì, 17 de setëmber, dala 18 nchin bonamënter n mierculdì, 23 de setëmber, per rejons de segurëza per dut l trafich. Ntan chësc tëmp uniral fat sauté l crëp y menà demez l material.

N’escursciun dër interessanta por inrescí i posć storics dla Gran Vera vëgn metüda da jí en sabeda ai 19 de setëmber sön le Col de Lana. L’escursciun é organisada dal Museum Ladin Ciastel de Tor adöm al’assoziaziun Lia da Munt Ladinia.

„Sorvisc d’assistënza por l’infanzia: ara vá ciamó da mioré“ chësc é le tema dla conferënza anuala sön la familia che vëgn organisada dal’Agenzia provinziala por la familia en jöbia ai 24 de setëmber sön le Ritten. L’assistënza di mituns y les oportunités desfarëntes sará insciö al zënter dl’incuntada dl’assessuria Deeg cun plü esperc internazionai.

Ma cun competënzes linguistiches adatades pó i mituns y jogn demostré sües capazités te scora y tla sozieté. Le sorvisc por la consulënza pedagogica y l’integraziun dl’Intendënza ladina á metü da jí chësc isté de plü scomenciadies por mituns y mitans cun y zënza n background de migraziun. „Partezipaziun, intlujiun y formaziun é na ghiranza de düc“, insciö l’assessur por la scora Florian Mussner.

La Junta provinziala s’á dé jö incö (ai 15 de setëmber) cun la cuantificaziun dles retüdes che ti speta ala Provinzia da pert di Comuns y di gesturs di implanc de racoiüda y dla desgorta dl ciomënt. Sön proposta dl assessur por l’ambiënt Richard Theiner él gnü aprové na delibera che ti vá adincuntra ales esigënzes di Comuns zënza aumenté les retüdes.

Chësta edema apëna metüda man sará por le presidënt dla Provinzia Arno Kompatscher na „edema europeica“: en mercui él insciö preodü la vijita a Balsan dl coordinadú dl TEN-T, Pat Cox, por traté le tunel de basa dl Prener, en vëndres sará le presidënt a Bruxelles por incunté le presidënt dla Comisciun europeica, Jean-Claude Juncker, y en sabeda él sön le program la festa dl’Euregio.