Comunicat stampa

Chësta sabeda, ai 3 de otober dl 2015 dales 20.30, gnarál presenté al Fort de Franzensfest na manifestaziun musicala speziala dal titul „S(ch)ein: Les ambries dla musiga“ cofinanziada dala Repartiziun cultura dl’Intendënza ladina. L’evënt é na manifestaziun combinada danter istalaziuns artistiches y musicales dal baroch cina aldedaincö.

Informaziuns ütles sön le percurs d’adoziun di mituns y sön la cultura familiara de atri Paisc gnará presentades tratan la sëra d’informaziun ai 8 de otober tl raiun sozio-sanitar da Bornech. Por düc chi che ó tó pert ala sëra de discusciun él sëgn la poscibilité da se registré.

Euforia, pudëi, mputënza y decadënza ntan la viera ie la tematiches lauredes ora artisticamënter y prejentedes tla mostra 1915-2015. L unirà metù ora l’opres premiedes n ucajion dl cuncors artistich sun l centené dla Prima viera munidela metù a jì dala Repartizion Cultura y Intendënza ladina y l Südtiroler Künstlerbund. L assessëur Florian Mussner giaurirà la mostra ai 9 de utober.

Al jará inant almanco cina la fin dl ann le sorvisc de coliamënt dles corieres danter Sanciana y Santo Stefano di Cadore. La Junta provinziala á aprové incö (ai 29 de setëmber) sön proposta dl assessur por la mobilité Florian Mussner la prorogaziun dla convenziun cun la Provinzia de Belun che ára validité cina ai 12 de dezëmber.

Na prozedöra scemplificada y plü trasparënta, n percurs plü asvelt por implanc cun plü funziuns, finanziamënc ambientai por le pröm iade ince por derivaziuns idroeletriches mesanes: chëstes é les diretives tecniches nöies por les pices dejotes y chëres mesanes aproades incö (29 de setëmber) dala Junta provinziala sön proposta dl’assessur Theiner.

Les aziëndes dl turism dl Südtirol ára la poscibilité da ester portadësses dl logo europeich Ecolabel cun n’atenziun particolara por l’ambiënt: la Junta provinziala á aprové incö (29/09) na convenziun bienala danter l’ISPRA y l’Agenzia por l’ambiënt dla Provinzia, che fajará i controi tles strotöres por ciaré sce i standarg damaná vëgn tignis ite por l’assegnaziun dl logo.

Le budget metü a desposiziun dala Provinzia al’Academia Europeica de Balsan (EURAC) por l’ann 2015 é de 450 mila euro. I scioldi gnará dá a cater proiec d’inrescida sön l’ecologia, le telescialdamënt, le plurilinguism y le sparagn energetich.

Por ti dé na sbürla ala Plose sciöche destinaziun turistica á la Plose Ski Spa tut la dezijiun da baraté i dui lifc da scagns cun na furnadoia unica nöia che dess porté sön la Piza Vansuro (Pfannspitze) sura Porsenú. La Junta provinziala á dé n arat positif al proiet che ará n efet positif ince sön la contrada, podará gní adorada por jites y a n mioramënt dl sorvisc dal punt d’odüda economich.

Tröc ascutadus, reladus dër cualificá y na seria de idees nöies - le bilanz dl convëgn en ocajiun dl De di museums dl vedl Tirol é positif. La manifestaziun vëgn metüda a jí vigni ann dales Repartiziuns Museums dl Tirol, Südtirol y Trentin adöm al’Euregio. Chësc iade é le de gnü organisé a Ciastel Tirol por inrescí ci che i mueums pó fá por la pêsc tla sozieté.

La Repartiziun Laur dla Provinzia y la Direziun regionala dl Paiern dl’Agenzia por le laur s’á incunté incö (28/09) a Balsan por n convëgn sön le marcé dl laur, tratan chël che al é gnü firmé n’acordanza sön na colaboraziun plü strënta por ci che reverda le barat de personal spezialisé.