Comunicat stampa

Le presidënt dl Land Vorarlberg Markus Wallner sará indoman, jöbia ai 10 de setëmber, en vijita dal presidënt dla Provinzia Arno Kompatscher a Balsan. Tratan chësta incuntada gnarál traté la strategia unitara europeica por i raiuns dles Alpes y le svilup dla competitivité y azessibilité dles provinzies. Daldô presentará i dui presidënc na tuta de posiziun deboriada.

Na fontana d’aconsiamënt importanta por dötes les domandes che reverda l’edcaziun é le Telefon di geniturs. Incö (09.09) él gnü presenté i dac atuai: insciö él gnü registré l’ann passé indöt 1064 telefonades, dantadöt por ci che reverda domandes sön l’educaziun, la scora y la despartiziun di geniturs. Tres de plü domandes vëgn fates en relaziun al’adoranza di fonins da pert di mituns y jogn.

Ciamó cina ai 13 de setëmber y spo dai 3 de otober cina la fin de jená dl 2016 sarál poscibl da vijité tl Museum Natöra da Balsan la mostra speziala „Lëdi y salvari“. Da odëi él de plü retrac de spostamënc de tiers salvari y de coridors naturai dles Alpes y dl’America dl nord che dess sensibilisé sön le spostamënt lëde di tiers y sön le mantignimënt dla biodiversité.

Chëst’ena che vën scumencerà i ntervënc d’adatamënt y de segurëza dla streda statela te Gherdëina te de plu lueges tl chemun de Sëlva. Inier, n lunesc, ai 7 de setëmber, iel unit sëurandat la ncëria di lëures.

Les diretives che reverda la programaziun dl’Aziënda sanitara provinziala, che é gnüdes aproades dan da püch dala Junta provinziala, gnará presentades tl contest de na conferënza stampa en jöbia ai 10 de setëmber dales 14.00 a Balsan dal’assessuria Martha Stocker y dal diretur general Thomas Schael.

Deplü Euregio, demanco burocrazia: chësc le messaje prinzipal dla deliberaziun tecnica aproada incö (ai 8 de setëmber) dala Junta provinziala che á l’obietif da mioré la gestiun dl’organisaziun dl GECT Tirol-Südtirol-Trentin. La delibera é gnüda aprovada dan da püch dala junta dl Land Tirol y aspeta sëgn ma plü la löm vërda da pert dl esecutif da Trënt.

Tres l’acordanza danter le Stat y la Provinzia gnarál scomencé en jöbia cun la costruziun de trëi frabicac a Maran che ti fajará da alberch ales families di soldas en sorvisc tl Südtirol. Implü prevëiga l’acordanza la surandada di raiuns nia plü adorá dal Minister dla Defenüda ala Provinzia. Al é preodü plü intervënc a Balsan, Porsenù, Corvara, Sterzing, Laives, Vahrn y Kaltern.

I Comuns dl Südtirol ará tl dagní plü autonomia y opziuns de gestiun plü amples canche ara nen jará dles tarifes varëntes por i sorvisc de sarenaziun y depuraziun dles eghes pazes. Les diretives aproades incö ai 8 de setëmber dala Junta provinziala prevëiga danterater n sistem de na cuta fissa anuala o de n paiamënt colié a vigni depuraziun efetuada.

2mile porsones á tut pert al De dles portes davertes a Balsan y a Ciastel Tirol olache al é gnü pité n’odüda atuala sön l’analisa storica dl raport danter la resistënza y le nazifascism y le svilup dla realté particolara südtiroleja. Le bilanz dl De dl’autonomia, festejé ai 5 de setëmber, é positif y por le proscim ann él preodü l’aniversar di 70 agn dal’Acordanza de Paris.

Sön proposta dl assessur Florian Mussner á la Junta provinziala aprové da püch le reconoscimënt dles ativités de formaziun extrascolastiches da pert dles scores ladines. Cun la lege omnibus gnará les diretives nöies aplicades por le pröm iade en chësc ann de scora 2015/16. „L’integraziun de ativités extrascolastiches é n arichimënt dl’oferta formativa por nostes scores", insciö Mussner.