Comunicat stampa

La planificaziun de proiec y de aziuns tles Dolomites patrimone UNESCO é stada la tematica zentrala dla pröma sentada dla „mësa torona permanënta por les Dolomites patrimone Unesco“ che s’á incunté por le pröm iade en vëndres ai 31 de messé tl Palaz provinzial 11 a Balsan.

Le secreter de Stat por le svilup economich Antonello Giacomelli sará a Balsan indoman (04/08) por presenté le martl nü dediché ales Dolomites. Cun le presidënt dla Provinzia Arno Kompatscher gnarál ince baié dla convenziun nöia danter Stat y Provinzia sön le finanziamënt di programs dla Rai por ladin y todësch. Dales 10 sarál na conferënza stampa cun i jornalisć tl salf stampa dl Palaz Widmann.

Les desposiziuns nöies che reverda i apalc publics gnará publicades indoman sön le Boletin ofizial dla Regiun y jará en forza en mercui ai 5 de agost: deache ares messâ gní aprovades de prescia éres gnüdes ajuntades tl articul 11 dla lege nöia sön la cultura.

Les condiziuns de vita di prijoniers de vera y les conseguënzes dles porjiuns tles valades y ti paisc é les döes tematiches prinzipales sön le portal internet dla Gran Vera dl’Euregio Tirol-Südtirol-Trentin. Ince chësc iade vëgnel presenté la teamatica aladô de trëi domandes y respostes. Da lí do, sciöche ince ti mëisc passá, sot ala seziun de „Let’s talk“ de www.14-18.europaregion.info.

Por düc i apascioná dl sport dl arpizé él gnü realisé a Bornech la palestra por l’arpize y le bouldering scolastich „K3“, na strotöra moderna y inovativa. Le frabicat nü é gnü surandé incö, vëndres ai 31 de messé ai gesturs.

Istituzionalisé la colaboraziun che reverda le trasport de marcianzies tl’Euregio: chësta é la posiziun coletiva di assessurs dl’Euregio Florian Mussner (Südtirol), Ingrid Felipe (Tirol) y Mauro Gilmozzi (Trentin) do l’incuntada da incö (31/07) a Balsan. Cun i suranstanc dles Ciamenes de comerz di trëi raiuns á i assessurs debatü ince dl transiamënt proibí de seturs de marcianzies tl Tirol.

L’assessuria provinziala por la sanité Martha Stocker á presenté incö ai 31 de messé tl contest de na conferënza stampa a Palaz Widmann les diretives nöies por la fecondaziun „eterologa“. Al á tut pert al’incuntada cun la stampa ince le primar dl repart de ginecologia dl ospedal da Bornech, Bruno Engl.

Tl mëis de agost s’incuntará la Junta dui iadi, en mertesc ai 11 y en mertesc ai 25 d’agost. Al ne é preodü degönes sentades por en mertesc ai 4 y en mertesc ai 18 d’agost.

Escursciuns cun les rodes vëgn dër aprijades: porchël gnarál amplié ti fins dl’edema dl mëis de agost la linia dla ferata tla Alta Val de Puster cun cater iadi implü por ti jí adincuntra al numer plü alt de ziclisć che jará cun la ferata. „Cun chësta mosöra orunse ti dé na maiú lerch ai ziclisć y sostigní chësta forma de turism ecologich y sportif“, sotlignëia l’assessur Florian Mussner.

Euforia, podëi, impotënza y agonia é i temesc de na mostra speziala che gnará daurida ai 9 d’otober a Balsan, cun chëra che la Repartiziun Cultura ladina presentëia i avenimënc dla Gran Vera y la crudelté dla violënza en general te n’elaboraziun artistica nöia. Indöt gnarál mostré les operes d’ert di ot davagnadus dl concurs artistich da inann, che é gnüs chiris fora da püch.