Comunicat stampa

N bilanz plü o manco anfat a chël dl ann passé y na soma dles entrades cun n pice aumënt sciöche segnal de n mioramënt dla situaziun economica. Chësc é le cheder por ci che reverda le bilanz de previjiun 2016 debatü inier (23 de jügn) tratan n’incuntada danter le presidënt Kompatscher, döta la Junta provinziala y i rapresentanc dles organisaziun soziales y economiches.

La Junta provinziala á dé incö ai 23 de jügn löm vërda ala secunda pert di finanziamënc dl 2015 por i films y documentars realisá te Südtirol. I esperc y la Business Location Südtirol (BLS) á chirí fora 10 proiec che gnará sostignis tres le Fonds por les produziuns dl Südtirol.

La Junta provinziala á tut incö (23 de jügn) la dezijiun al’unanimité da sconé l’interes publich jon cuntra la delibera anunziada dala Brennercom SpA da paié fora la partezipaziun dla Provinzia al’intern dla sozieté. „I ne podun nia azeté l’espropriaziun de n bëgn publich da pert de privac“, á sotligné le presidënt dla Provinzia Arno Kompatscher.

La Junta provinziala á aprové incö (23/06) le pat por le lernerat che prevëiga mosöres de sostëgn por le lernerat tradizional y n aumënt di posć a desposiziun por i lerneri. Le pat gnará sotescrit y presenté plü avisa en jöbia ai 25 de jügn dal assessur Philipp Achammer y dales organisaziuns soziales.

Sensibilisé i mituns y i jogn, mo ince i adulc y i maestri sön le tema dla sigurté sön strada y promöie la mobilité sostenibla: chisc é i obietifs prinzipai dla campagna SOS Zebra, che á metü man tl 2009 por sconé dantadöt i peduns sciöche componënta plü „debla“ sön strada. La Junta provinziala á tut incö (ai 23/06) la dezijiun da renové la campagna ince por le proscim ann de scora 2015/16.

Le presidënt Arno Kompatscher s’á incunté incö (ai 22 de jügn) cun na delegaziun dal Ecuador, n paisc dl’America dl Süd olache la Provinzia sotëgn de plü proiec de cooperaziun al svilup por mioré l’efiziënza dl’aministraziun publica. I programs de sostëgn döra ciamó cina le 2017, mo an pënsa a n arlungiamënt.

Ci él pa da fá canche an incunta na laûrs? L’osservadù ne dess nia lascé süa posiziun y ne dess gnanca s’avijiné ala laûrs por ti fá na foto: chësc sotlignëia l’Ofize provinzial Ciacia y pëscia che dá ince n valgügn consëis online. Al é da mët dër averda y da se tigní tres al dërt comportamënt canche an á n’incuntada cun na laurs.

L’assessuria por le laur Martha Stocker s’á incunté da püch cun na delegaziun dla Lia di Artejans (LVH-APA) dl Südtirol. Tl zënter dl’incuntada él sté les tematiches di apalc, dla surandada di laurs publics a imprejes dl post y dl inserimënt de cursc aposta sön la sigurté söl laur tles scores profescionales.

Cultura, turism, y sport é i trëi pilastri zentrai dla federaziun locala nöia „FederCultura Turismo Sport Alto Adige Südtirol“, che é gnüda fondada da püch dala federaziun dles cooperatives Confcooperative. Le presidënt Massimo Moretti ti á presenté da püch al’assessuria por l’sport Martha Stocker i fins dla federaziun locala nöia, sües ativités y intenziuns.

L’emergënza y les soferënzes de indöt prësc 60 miliuns de porsones che é tl sun sciampé da violënzes y maltratamënc é tl zënter dl De mondial di migranc ai 20 de jügn. Por l’assessuria Stocker é la chestiun di migranc na sfidada de dimenjiuns globales. „Impó ne dess l’Südtirol nia stlü i edli“,dij Stocker che damanda do comprenjiun y desponibilité da daidé i migranc y les porsones che damana asil.