Comunicat stampa

En sabeda ai 23 de má vëgnel metü da jí a Desproch, en presënza di trëi presidënc dl’Euregio Günther Platter (Tirol), Arno Kompatscher (Südtirol) y Ugo Rossi (Trentin), la comemoraziun publica dla Gran Vera avisa cënt agn do l’ingres dla Talia tl conflit. La comemoraziun religiosa gnará tignida dai trëi vëschi dles diozejes, daldô él preodü n’incuntada di trëi presidënc.

L’assistënza y les modalités de sojornamënt dles porsones che damana do asil, sciöche ince la situaziun di migranc tratan le passaje tles staziuns dles ferates de Balsan y dl Prener é stades tematiches debatüdes tles ultimes edemes. Te na conferënza stampa ai 18 de má spligará l’assessuria Stocker, adöm ai rapresentanc dles assoziaziuns che se crüzia di migranc, la situaziun atuala te Südtirol.

Dal teritore al paesaje, dal cataster ales strades, dales misciuns ales localités. Bëgn 180 é les series de dac desponibles sön la plata internet nöia geoportale.retecivica.bz.it che é online da incö (14 de má). „Al se trata de n vare inant dër important – á splighé l’assessuria Waltraud Deeg – tla direziun de n’aministraziun tres plü digitala.“

Ai 12 de má á les trëi Intendënzes adöm al Zënter d’informaziun „Europe Direct Südtirol“ organisé le Dé dl’Europa tl zënter cultural Grand Hotel de Toblach. Plü co 500 maestri y studënc á tut pert ala manifestaziun.

Indöt 1300 porsones cun handicap á tut pert incö (12 de má) ala 32ejima ediziun dla festa dl sport y dla lidëza a Altenburg dlungia Kaltern. La scomenciadia é gnüda organisada dal Ofize Porsones cun handicap dla Provinzia en colaboraziun cun l’assoziaziun „Lebenshilfe“ y cun la scora profescionala por profesciuns soziales „Hannah Arendt“.

Inier él gnü benedí (12 de má) döes ciampanes nöies dla capela de Ćiastel Tirol che é dedicades ai Sanc Pancrazio y Elisabeth. Ala zerimonia de benedisciun al tut pert danter l’ater l’assessur Florian Mussner y le diretur dl Museum de Ćiastel Tirol, Leo Andergassen.

Mostres, vijites, rapresentaziuns teatrales y artejanales, jüc da stomé, musiga, festes de families, workshops, discusciuns sön l’ert, cianté deboriada y tröpes d’atres scomenciadies: chësc é le program dër rich por mituns, jogn y families en gaujiun dl Dé internazional di Museums en domënia, ai 17 de má dl 2015. L’entrada é debann te düc i museums che fej para.

Cun „Spread“ él ince na scomenciadia dl Südtirol che fej pert di 64 proiec che ciafará n sostëgn finanziar tres le program de promoziun culturala europeich „Creative Europe“. Le proiet „Spread“ é na cooperaziun danter la Fondaziun Gustav Mahler, le „Monteverdi Choir and Orchestras“ de Londra y n’orchestra jonila dai Paisc Todësc.

La Junta provinziala á indô contesté n provedimënt dl’Agenzia dles doganes che ne respetëia nia le Statut d’Autonomia y sües normes d’atuaziun. La Junta provinziala á insciö tut la dezijiun incö (12 de má) da fá recurs cuntra les mosöres stabilides dala Direziun dles doganes. Bele l’ann passé â le TAR azeté le recurs dla Provinzia.

La Junta provinziala á definí incö (12 de má) i componënc nüs dl Consëi d’aministraziun dl ABD Airport Spa, na sozieté inhouse dla Provinzia che manajëia les infrastrotöres, i sorvisc y i implanc dl aeroport da Balsan. Sciöche presidënt nü dl CdA él gnü nominé Otmar Michaeler.