Comunicat stampa

Cun le premier Renzi él gnü sotescrit n pat de sconanza dl’autonomia por restabilí les mudaziuns sforzades sö dales mosöres che va zoruch al govern Monti: chësta la prezisaziun dl presidënt dla Provinzia Arno Kompatscher en relaziun ales detlaraziuns dl deputat Salvini che a Balsan â baié de miliarg che Renzi ti ess tut ala Provinzia.

Plü sorvisc cun le medemo numer de colaboradus sará la sfidada prinzipala por la Repartiziun Mobilité tl dagní. Da plü co n ann laora i colaboradus y i suranstanc deboriada por inrescí la reorganisaziun, por partí sö les competënzes damí y por garantí n mioramënt di sorvisc. „I colaboradus é te chësc prozes la ressursa plü importanta“, recorda l’assessur Mussner tratan la presentaziun.

Les mosöres por le smendrimënt dles emisciuns d’incuinamënt sön y dlungia l’autostrada dl Prener, la reorganisaziun dl Parch nazional dl Stelvio, la proibiziun da jí a ciacia al’intern di parcs naturai: Chisc é stá i temesc prinzipai dl’incuntada danter l’assessur provinzial Richard Theiner y le Minister por l’ambiënt Gian Luca Galletti.

„La formaziun duala dla Provinzia de Balsan, che prevëiga l’alternanza danter scora y laur, é n model che i orun ince adoté tl rest dla Talia“. Cun chëstes parores á le premier Matteo Renzi stlüt jö incö (ai 5 de má) süa vijita al’intern dl’aziënda Stahlbau Pichler de Balsan, tratan chëra che al é gnü acompagné dal presidënt Arno Kompatscher y dala Junta provinziala.

Renforzé y svilupé inant deboriada l’autonomia: chësc é le resultat da incö (05/05) dl’incuntada danter le premier Matteo Renzi y i dui presidënc dl Südtirol y dl Trentin, Kompatscher y Rossi, che á concordé le program che prevëiga l’aprovaziun tl 2015 de normes d’atuaziun nia ciamo aprovades, la formaziun de plü grups de laur sön competënzes nöies y la metoda de laur por ajorné le Statut.

Di 342 insegnanc dles scores ladines dla Provinzia da Balsan, ne à incö, mertesc ai 05 de má, 8 nia laurè fajon para al scioper nazional dles scores. La porcentuala che à fat para a chësta protesta é insciö de 2,3 porcënt tles scores ladines. 42,29 porcënt di insegnanc á scioperé tles scores talianes, 18 porcënt te chëres todësces.

Dales ferates locales ales ferates a d’alta velozité, dal tunel de basa ales staziuns plü piceres: la Provinzia laora tresfora por renforzé les ferates regionales che vëgn conscidrades sciöche le motor prinzipal dl’economia y dl turism. Chësc é sté un di conzec prinzipai al convëgn da incö (04 de má) en gaujiun di 10 agn dla linia dla Val Venosta.

La rëi dles scines y dles staziuns dles ferates dl Südtirol vëgn ampliada y modernisada, dantadöt les linies che porta a Maran y tla Val de Puster, mo ince la linia dl Prener. La basa é gnüda stabilida incö (04/05) cun la sotescriziun de n’acordanza danter le presidënt dla Provinzia Arno Kompatscher y le suranstant dla RFI Maurizio Gentile a Maran.

La Junta provinziala tignará indoman, mertesc ai 5 de má, na sentada plü cörta en gaujiun dla vijita dl premier Matteo Renzi a Balsan. Al ne sará porchël gnanca degöna conferënza stampa dales 12:30.

Le suranstant dl govern Matteo Renzi sará indoman ( ai 5 de má) a Balsan. Tratan süa vijita él preodü n’incuntada cun le presidënt dla Provinzia Arno Kompatscher y cun le presidënt Ugo Rossi, sciöche ince na vijita al’aziënda Stahlbau Pichler por imparé da conësce da plü daimpró le model de formaziun dual dl Südtirol. Dales 11:30 él preodü na detlaraziun ala stampa.