Comunicat stampa

En gaujiun di dis de festa de Pasca ne sarál proscima edema degöna sentada dla Junta provinziala, che s’incuntará indô en mertesc ai 14 de aurí.

La Biblioteca provinziala Teßmann da Balsan organisëia en colaboraziun cun l’assoziaziun “Deutsche Sprache / Zweig Bozen” na sëra d’informaziun dal titul “Lingaz y stil dl jornalism de sensaziun” cun le germanist Andreas Wiesinger che mostrará sö les formes desvalies de publicaziun y les carateristiches tipiches dl jornalism da sensaziun. L’entrada é debann, le referat sará por todësch.

La conferënza stampa de presentaziun dla campagna de sensibilisaziun sön les adoziuns gnará tignida ai 9 de aurí dales 10 tl Auditorium dl Palaz provinzial 12 (strada Gamper 1) a Balsan en presënza dl’assessuria por les politiches soziales Martha Stocker.

Recordé adöm por planifiché te na manira pazifica y critica le dagní: Chësc le messaje prinzipal dla presentaziun dles scomenciadies en recordanza dl centenar dla Pröma vera mondiala (ingres dla Talia tl 1915) incö (02/04) a Balsan. Por sostigní n’elaboraziun storica che coliëia le cultures desfarëntes fej la Provinzia de Balsan rové adöm de plü raiuns, grups linguistics y generaziuns.

Le Museum provinzial dles usanzes y tradiziuns da Dietenheim organisëia ince chësc ann indô la chirida tradizionala de üs da Pasca por mituns y mitans en Lönesc de Pasca ai 6 de aurí y che sará ince l’ocajiun por la daurida dla sajiun museala dl 2015.

Te Südtirol él söporjö 200 jogn che mëss se confronté cun desturbs che reverda l’autism. L’assessuria por la sanité Martha Stocker sotlignëia en gaujiun dl Dé internazional dl’Autism, indoman ai 2 de aurí, l’esigënza da sostigní y daidé i mituns, jogn, adulc y sües families pro les sfidades cuotidianes.

La Junta provinziala á aprové inier ( 31 de merz), sön proposta dl’assessur por la mobilité Florian Mussner, la prozedöra por la formulaziun de n’acordanza cheder cina al 2019 che reverda le sorvisc cun i joliers por compic istituzionai dla Provinzia.

„Cun la re-ejaminaziun y l’assegnaziun nöia dles conzesciuns únse stlüt jö le capitul dl’assegnaziun iregolara de n valgönes conzesciuns por gragn implanc idroeletrics“, insciö le presidënt Arno Kompatscher incö (31/03) do la sentada dla Junta. „I ún indô arjunt la situaziun de legalité y chësta dezijiun é la basa por la reorganisaziun dl setur dl’energia“, á ajunté l’assessur Theiner.

I ofizi y i sorvisc dla Provinzia restará stlüc tratan i dis de festa de Pasca da en Vëndres Sanc ai 3 cina al Lönesc de Pasca ai 6 de aurí y dauriará indô regolarmënter en mertesc ai 7 de aurí.

Te duta la provinzia scumëncerà l servisc stredes tl’enes che vën a fé lëures de mantenimënt straurdeneres. Tl raion Salten/Scilier uniral nvestì 1,27 milions de euro per lëures sun la stredes provinzieles y 1,31 milions per ntervënc sun la stredes stateles.“A chësta moda ulons njinië ca la stredes per i zitadins y la zitadines, acioche les sibe segures y adatedes a furné”,dij l assessëur Mussner.