Comunicat stampa

“I dërć dla porsona y l’integraziun tl Südtirol”: chësc é le tema dla campagna de sensibilisaziun nöia che mët man incö por un n mëis y che é gnüda laorada fora dal Sorvisc provinzial de coordinamënt por l’integraziun (KOI). Cun placać de sensibilisaziun ti comuns dl Südtriol ôn insciö motivé da ponsè do sön la proteziun di dërć umanns de vigni porsona y dles sfidades che reverda l’integraziun.

Prësc indöt 133.000 anuzadus atifs, n aumënt sostanzial dles porsones che anüza le trasport publich y funziuns d’adoranza nöies: Chësc é le bilanz de morvëia dl Südtirol Pass da süa ativaziun dai 14 de forà dl 2012. „La cherta unica por i mesi dl trasport publich por döta la Provinzia à motivé tröpes porsones da anuzé tres deplü les ferates y corieres publiches“, à sotligné l’assessur Mussner.

La scomenciadia “Bücherwelten” cun l’esposiziun de libri premià é jüda a piz dan da dui dis (11/02) tl Waltherhaus a Balsan. Les publicaziuns premiades tl ann passè vëgn insciö presentades da en mercui ai 8 de forà inant por n mëis tl foyer dla Biblioteca Provinziala Dr. Friedrich Teßmann y po inće gnì imprestades fora.

1 en miliun de entrades: Chësc é le numer dles porsones che à vijité le Museum Natöra a Balsan dal mëteman de süa ativité d’esposiziun dal 2000 inant. La familia Hager de Balsan à albü la fortüna de ester avisa le milionejim vijitadù dl Museum y à ciafè inier (12/02) les congratulaziuns dal assessur Florian Mussner, dal diretur de Departimënt Valentino Pagani y dal diretur dl Museum Vito Zingerle.

L’Aziënda Speziala dla RAS garantësc da oramani 40 agn la trasmisciun de programs radio y televisifs ladins y todësch di Paîsc confinanć.„Chësc colegamënt cun i raiuns dla cultura todëscia y ladina é dër important por le svilup de nostes mendranzes“, sotlignëia le presidënt dla Provinzia Arno Kompatscher. La basa é gnüda ponüda avisa dan da 40 agn, ai 13 de forà dl 1975, cun la lege dla RAS.

Por gaujia de laûrs él preodü che döes ferates, öna tla direziun dal Prener a Maran y l’atra da Maran al Prener toma fora danter en lönesc 16 a en vëndres 20 de forà y da en lönesc 23 a en vëndres 27 de forà. Le sorvisc de trasport gnarà garantì dal Prener a Balsan y da Balsan al Prener tres corieres de sostituziun.

Na bandida dopla cun plü pëis por les Provinzies de Balsan y Trënt é le resultat dl’incuntada de incö danmisdé (11 de forà) a Roma, a chëra che le presidënt dla Provinzia Arno Kompatscher à tut pert y che reverda na metoda de devijiun nöia dl fonds por i comuns confinanć, cun chël che al vëgn sostignì proieć de comuns che confinëia cun les döes Provinzies.

Sön indöt 30 plates él gnü metü jö la strategia por le svilup dl’assistënza sanitara tl dagnì te Südtirol. Le documënt é gnü aprovè incö (10/02) dala Junta provinziala y „rapresentëia – insciö à splighé incö Kompatscher y Stocker – la basa de na reforma dl sistem sanitar che à sciöche obietif chël de assiguré i standarg de cualité dles prestaziuns sanitares inće tl dagnì por döta la popolaziun."

Cun l’ingrés tl conflit dla Talia ai 23 de mà dl 1915 à la Pröma Vera Mondiala inće arjunt le Tirol y le frunt dles Dolomites. Do che les trëi Provinzies dl’Euregio à ponü la basa por recordè deboriada l’aniversar, à incö (10/02) la Junta provinziala aprovè les scomenciadies de comemoraziun che gnarà tignides te Südtirol tl 2015. I proieć reverdarà plü lingać y düć trëi i raiuns.

N program fit cun plü presentaziuns de material didatich nü é preodü inće chësc ann tres le Ćiamp Inovaziun y Consulënza dl’Intendënza ladina che se crüzia dantadöt dl’elaboraziun de publicaziuns aposta dales scolines ćina les scores altes dles valades ladines. Dan da püch s’à l’assessur Florian Mussner incuntè cun i colaboradus por tratè i proieć por le 2015 y por vijité i ofizi.