Comunicat stampa

Al vëgn sciazè che sön le monn él plü co 35 miliuns de porsones che s’à taché le virus HIV. Baldi ne él atualmënter degöna cura, mo al é poscibl da archité le svilup dla maratia cun medejines. „La prevenziun y l’educaziun é fondamentales, deache l’AIDS é tres ćiamò n prigo che ne po nia gnì sotvaluté“, à dit l’assessuria por la sanité Martha Stocker.

Plü funziuns à da śëgn inant l Abo+ por studënć sura i 18 agn: cun l’ativaziun de na funziun de paiamënt aposta saràl poscibl da paié diretamënter cun la cherta dl Abo+ plü sorvisc dl trasport publich local, sciöche por ejëmpl la tarifa por le trasport dla roda y i iadi danter Prener-Desproch o Sanćiana-Lienz.

Tan ćialt co mai denant, dër mol y püch sorëdl: chësc é le ressumé di meteorologs dl Sorvisc Meteo dla provinzia por ći che reverda le tëmp tl mëis de novëmber. Les temperatöres é stades altes tratan döta la sajun da d’altonn che é le secundo altonn plü ćialt dal mëteman dles mosoraziuns dl tëmp.

Colié la fantasia y la pratica cun l’aprofondimënt de n tema d’atualité: Chësta é stada la sfidada dl proiet „Politische Bildung“ che é gnü organisè dal’Intendënza todëscia adöm a chëra ladina, por tlasses dles scores mesanes, altes y profescionales. Le concurs scolastich é rovè incö (27/11) tla fasa finala cun la presentaziun y valutaziun di 8 mius proieć a Balsan.

500 agn te un n liber: Le Museum Natöra à dè fora la pröma publicaziun importanta sön la storia, le svilup y les descurides dla paleobotanica, chël ô dì dl’inrescida de plantes fossiles tla Talia. Le liber é gnü presentè incö, ai 27 de novëmber da Evelyn Kustatscher, öna dles auturies prinzipales y paleontologa tl Museum Natöra.

Le portal internet www.manif.it cöi adöm y presentëia te na manira scëmpla plü sorts de manifestaziuns, dal ćiamp dla cultura, ala musiga y formaziun, che vëgn metüdes da jì tles valades ladines dl Südtirol: incö, jöbia ai 27 de novëmber él gnü presentè le conzet nü dl portal che vëgn sostignì dales Repartiziuns dla cultura todëscia y ladina.

La Biblioteca Provinziala Dr. Friedrich Teßmann inviëia ala presentaziun dl liber de Hubert Stuppner „Oswald von Wolkenstein: Liebe, List und Leidenschaft“. La vita dl poet y dl componist dl tëmp terdmedieval y sües creaziuns musicales y artistiches é al zënter dla publicaziun nöia che vëgn presentada ai 4 de dezëmber dales 20 Biblioteca Provinziala Dr. Friedrich Teßmann a Balsan.

La conferënza stampa de presentaziun dl portal internet nü www.manif.it preodüda por indoman, vëndres ai 27 de novëmber, gnarà tignida tl Palaz provinzial 2 (plaza Silvius Magnago 10) tla terza alzada. L’orar de scomenciamënt resta dales 11.

La revista „ëres-FrauenInfoDonne“ che vëgn dada fora dala Comisciun por l’avalianza dles oportunitês, po gnì lita inće online y trata te süa cuarta ediziun la violënza sön les ëres y co che ara po gnì evitada y combatüda.

La Junta provinziala à aprovè incö (25/11) danter l’ater le plan de svilup presentè da Ecotherm che prevëiga l’ampliamënt dla rëi de telescialdamënt a Balsan. "Cun l’aprovaziun da incö unse fat n gran vare inant tl vers dla sconanza dl tlima“, à splighé l’assessur Theiner. Implü à la Junta valuté positivamënter la spartiziun di fonds ambientai che reverda l’implant idroeletrich da Bornech.