Comunicat stampa

Inier, lönesc ai 27 d’otober ti à l’assessuria por la sanité Martha Stocker presentè ai doturs de familia les diretives dla reforma dl’assistënza sanitara tl Südtirol y à ascuté sö sües minunghes. Na seria de doturs da döt le Südtirol à tut pert al’incuntada por portè dant sües propostes.

Le Presidënt dla Provinzia Arno Kompatscher, l’assessuria Martha Stocker y le vësco Ivo Muser tignarà na conferënza stampa en lönesc, ai 3 de novëmber dales 11:00 a Balsan, tratan chëra che al gnarà presentè na suraodüda dla situaziun atuala di profugs y dl’acoliënza di profugs tl Südtirol.

Sensibilisé sön le mantignimënt dla biodiversité tles Alpes tres fotografies sön i spostamënć de tiers tl’America: Chësc é un di fins prinzipai dla mostra speziala „Lëdi y salvari" de Florian Schulz che é gnüda daurida inier tl Museum Natöra a Balsan. Ara resta daverta ćina ai 13 de setëmber 2015. I tesć dla mostra é da ciafè te cater lingac.

Por indoman, mertesc ai 28/10, él preodü na sentada de plenum danter i Consëis provinziai dl Trentin, dl Südtirol y dl Tirol a Schwaz tl Tirol. La sentada edemala dla Junta provinziala gnarà insciö sburlada a indoman da sëra cun sön l’ordinn dl dé l’aprovaziun dl dëssegn de lege sön le bilanz de previjiun 2015 y che le Presidënt Kompatscher presentarà te na conferënza stampa en mercui (29/10).

Le monn di museums dl’Euregio à metü tl zënter dl „Dé di Museums dl Tirol Storich“ che é gnü tignì incö a Trënt i aspeć dla comunicaziun museala de avenimënć storics en ocajiun dl aniversar di 100 agn dal scomenciamënt dla Gran Vera. Le cuinto congrès de ajornamënt por i colaboradus di museums dl Tirol, Südtirol y dl Trentin é stada n’ocajiun de confrunt sön i lingać de comunicaziun di museums.

La app ofiziala por i smartphons y i tablets dl Sorvisc dl tëmp dla Provinzia è dan man da jügn inant y à atira albü n gran suzès. La app, che é debann, é gnüda desćiariada passa 100.000 iadi - y le numer di utënć vëgn tres majer. La app vëgn ajornada regolarmënter inće por ladin.

„Implì de vita l’Euregio“: chësc é le slogan dl proiet transfrontalier nü che vëgn metü a jì tl raiun dl Euregio tles Regiuns dl Südtirol, dl Trentin y dl Tirol. La Junta provinziala à aprovè da püch la scomenciadia nöia che premiëia proieć de cooperaziun transfrontaliera. Les iscriziuns é davertes ćina ai 31 d’otober.

Miorè l’efiziënza tla comunicaziun y smendrì i cosć dla manutenziun: l’assessur por la Proteziun zivila Arnold Schuler à presentè incö (24/10) adöm al diretur Hanspeter Staffler y al coordinadù Markus Rauch l’istalaziun de na rëi radiofonica unitara y digitala (TETRA) de comunicaziun por les organisaziuns dla Proteziun zivila y di sorvisc de pröm aiüt de volontariat che porta para de plü vantaji.

Milena Fallaha dl Lizeum d’Ert „Cademia“ da Urtijëi é la suranstanta nöia dla Consulta di Studënć por les scores altes dles localitês ladines. La pröma incuntada danter la Consulta di Studënć nöia cun l’Intendënt Roland Verra é gnüda tignida dan da püch a Urtiijëi, te chëra che an à inće rajonè dl proiet „Buona Scuola“. Johannes Geier rapresentëia la Consulta tl Consëi Scolastich provinzial.

Les ferates regionales de Trenitala y de Trenord, sciöche inće ferates suraregionales de Trenord, podarà tomè fora o passè te intervai nia regolars indoman vëndres, ai 24 d’otober dales 9 ales 17 por gaujia de n scioper di feratiers. Sciöche anunziè dala Repartiziun Mobilité dla Provinzia é inće le personal dla SAD cherdè sö a n scioper por indoman por 24 ores y che dess mët man incö a mesanöt.