Comunicat stampa

La promoziun di editurs gnarà laorada fora danü y adatada a chëra dla Regiun: chësta dezijiun é gnüda portada dant incö (15/09) dal Presidënt Arno Kompatscher, dai assessurs provinziai Philipp Achammer y Christian Tommasini tratan n’incuntada cun i rapresentanć di editurs. „Insciö orunse sostignì le contribut important che i editurs dà inant sciöche fontanes de cultura“, insciö Kompatscher.

La Provinzia à scrit fora n concurs publich por l’assegnaziun de n post a tëmp plëgn sciöche colaboradëssa tecnica/colaboradù tecnich pro la Repartiziun 41 – Liber fondiar, Cataster fondiar y urban cun la sënta de sorvisc a Silandro. Le post ne é nia resservè a n grup linguistich. Les domandes po gnì dades jö ćina ai 07/10.

La biblioteca "Dr. Friedrich Teßmann" da Balsan mët da jì na seria de referać sön le svilup dl’architetöra y les conseguënzes dl influs dl turism sön la contrada y les costruziuns tla Val Badia y Gherdëna. Le pröm referat de Carlo Calderan sön le "Frabiché tla Ladinia" vëgn tignì en jöbia, ai 18 de setëmber dales 18 tla Teßmann.

8,18 miliardg de euro: chësc é le valur complessif dl patrimone dla Provinzia de Balsan. La Repartiziun Patrimone à en gestiun indöt proprietês por n valur complessif de 4,168 miliarg de euro, laprò röiel 2,668 miliarg de euro de strades y le patrimone dla Laimburg, dl demane forestal y dles ressurses idriches. L’ospedal da Maran à la valüta singula plü alta: 164,5 miliuns de euro.

Hanspeter Staffler, ćina incö diretur dla Proteziun zivila, é le diretur general nü dla Provinzia de Balsan. Staffler é gnü presentè incö danmisdé (11 de setëmber) dala Junta provinziala. „Le candidat Staffler é gnü chirì fora do n prozès de seleziun lunch y detaiè, i sun sigüsc de avëi ciafè la porsona dërta por chësta inćiaria“, à dit le Presidënt Kompatscher.

Incö danmisdé (11 de setëmber) s’à incuntè la Junta por mët man la discusciun sön le bilanz de previjiun por le 2015. La pröma analisa dles zifres prevëiga n trend tl vers dla stabilité: la soma complessiva dles entrades dla provinzia por le 2015 é preodüda de ester de 5,2 miliarg de euro, che gnarà smendrida a 4,5 miliarg por gauja dles resserves che messarà gnì metüdes da pert.

Por aumentè la segurëza sön strada y les conescënzes sön na mobilité plü ecologica, mët a jì les Repartiziuns Sorvisc Strades y Mobilité la campagna d’educaziun y de sensibilisaziun „S.O.S. Zebra“. L’assessur por la mobilité y le sorvisc strades Florian Mussner presentarà te na conferëza stampa ai 18 de setëmber dales 09:00 les ativitês preodüdes tla cornisc dla campagna.

I laûrs de dortorada dla strada provinziala che porta dal zënter dl paîsc de San Martin de Tor al Museum Ladin Ćiastel de Tor gnarà surandà en mercui dla proscima edema ai 17 de setëmber. Le cost dl intervënt é de 462mile euro.

La colaboraziun suraregionala y transfrontaliera tla Regiun europeica dla Euregio, la promoziun de na Macroregiun alpina y le svilup dl’agricoltöra tl’Europa é stades les tematiches prinzipales tratan la vijita da inier (09 de setëmber) dl minister por l’Agricoltöra dl’Austria Andrä Rupprechter y dl’assessur por l’agricoltöra Arnold Schuler ala lataria de Sterzing.

„Quaky“ à inom la publicaziun nöia de Inovaziun y Consulënza tl Departimënt Educaziun y Cultura Ladina che é gnüda realisada por alisiré l’alfabetisaziun di mituns te n eté prescolara. Le cufer de materiai, che contëgn n manual sön la teoria dla promoziun di lingać y na racoiüda de jüć por le svilup dla „cosciënza di sonns“ gnarà presentè en mercui, ai 17/09 dales 17 tla scolina Saliëta a Urtijëi.