Comunicat stampa

En Jöbia, ai 2 de otober dales 12 gnaràl inauguré la cuinta ediziun dla Fiera dla formaziun „Futurum“ tla sënta dla Fiera a Balsan y en vëndres ai 3 de otober dales 9 metaràl man al Hotel Four Points by Sheraton, da ciafè dlungia la Fiera a Balsan, la manifestaziun por la promoziun dles arees formatives MINT dla matematica,dl’informatica, dles sciënzes naturales y dla tecnica.

Representanć dla Provinzia dl Südtirol, dla Lombardia, dl Piemont y dla Val d’Aosta s’incuntarà chësta jöbia a Balsan tl contest dl Fiera Futurm por tratè chestiuns che reverda i lernerać y la segurëza sön le laûr. „Cun chësta incuntada orunse laurè fora na posiziun unitara por miorè la formaziun di lerneri y por smendrì le burocratism tl setur dla segurëza sön le laur“, insciö Kompatscher.

Les zones artejanales ne dess nia ma plü ester na pert funzionala di raiuns, mo inće na cherta da vijita dles localitês: La Junta provinziala à aprovè porchël incö (30/09) standarg nüs por i raiuns produtifs. „Por concretisé chësc svilup orunse premié l’adoranza de concursc por la proietaziun, n anuzamënt de energia plü efiziënt y na maiù colaboraziun suraregionala", insciö Kompatscher.

Le Presidënt dla Junta, Arno Kompatscher, à referì incö (30 de setëmber) ala Junta provinziala i tëmps de realisaziun de na macroregiun alpina, de sü contignüs y süa organisaziun. La rajun dl inserimënt de chësc punt sön l’ordinn dl dé é stada l’incuntada, a chëra che Kompatscher à tut pert, danter les Regiuns interessades dla Talia inier a Milan.

La Junta provinziala à aprovè incö (30 de setëmber) n plann general de intervënć che prevëiga l’eliminaziun dles barieres architetoniches te düć i frabicać dla Provinzia por garantì l’anuzamënt dles strotöres a düć i zitadins. Al gnarà insciö eliminé ti proscimi agn i impedimënć architetonics ćiamò presënć por na spëisa totala de 15,75 miliuns de euro.

Por informè sön i prighi pro les cumpres y les prenotaziuns online él l’Ofize Media audiovisuai adöm ala Zentrala europeica di consumadus che mët a jì la manifestaziun d’informaziun „Gefahren im Netz- Kaufen und buchen im Internet“ ai 8 de otober a Balsan cun le fin da sensibilisé y mostrè sö ai consumadus les poscibilitês de proteziun cuntra trapolades söl web.

Hanspeter Staffler metarà man süa inćiaria nöia sciöche Diretur general nü dla Provinzia ofizialmënter al pröm d’otober. Incö (29 de setëmber) ti à l’assessuria por l’aministraziun Waltraud Deeg surandè süa funziun nöia tl’aministraziun publica. Ara ti aôda al diretur general n bun garatè „pro l’ademplimënt di compić da afrontè“ y le inviëia a anuzé deplëgn dles funziuns che ti é gnüdes surandades

Por le Zënter de formaziun profescionala a Bornech chir la Provinzia autonoma de Balsan n laurant spezialisé tl setur dl metal y che sarà inće responsabl por laûrs de verdaćiasa. L’assunziun dl laurant/dla lauranta é preodüda a tëmp plëgn y nia limité. La domanda por tó pert al concurs po gnì dada jö al Ofize Assunziuns personal ćina ai 21 de otober.

L’architada dles corieres sön la strada SP 60 che porta da Pidrô a La Val vëgn spostada da incö inant cina ai 09/12 sön la strada statala dla Val Badia SS244 por guaja de laûrs de ressanamënt dla trata. Les corieres che porta a La Val s’archita insciö sön la strada dla Val Badia direziun Corvara por daldô dè ota tla zona artejanala y jì inant regolarmënter ćina sö La Val.

91 scores te döt Südtirol cun indöt 2139 scolars (1036 mitans y 1103 mituns) à fat para tl 2012 al’inrescida PISA-OCSE. Por la scora paritetica dles valades ladines él preodü n’incuntada de formaziun por le stüde dl 2015 ai 20 d’otober dales 15 tl Istitut Tecnich Economich a Urtijëi.