Comunicat stampa

„Implì de vita l’Euregio“: chësc é le slogan dl proiet transfrontalier nü che vëgn metü a jì tl raiun dl Euregio tles Regiuns dl Südtirol, dl Trentin y dl Tirol. La Junta provinziala à aprovè incö la scomenciadia nöia che premiëia proieć de cooperaziun transfrontaliera. Al é le pröm iade che chësc concurs vëgn scrit fora.

La Junta provinziala à stabilì incö mertesc, ai 16 de setëmber i obietifs dl conzet nü por la gestiun dl Aeroport da Balsan. Al gnarà insciö ejaminé les poscibilitês de mioraziun dl’anuzamënt dl aeroport por la popolaziun y por l’evoluziun dl’economia locala tolon en conscidraziun inće na maiù colaboraziun cun Desproch y la sconanza dl ambiënt.

En lönesc ai 22 de setëmber dales 16 gnarál presentè tl gran salf dla Scora mesana da La Ila material didatich nü dè fora dal Departimënt dl’Educaziun Ladin cun le sostëgn de Inovaziun y Consulënza realisé por l’insegnamënt dl’educaziun musicala tles scores ladines.

La promoziun di editurs gnarà laorada fora danü y adatada a chëra dla Regiun: chësta dezijiun é gnüda portada dant incö (15/09) dal Presidënt Arno Kompatscher, dai assessurs provinziai Philipp Achammer y Christian Tommasini tratan n’incuntada cun i rapresentanć di editurs. „Insciö orunse sostignì le contribut important che i editurs dà inant sciöche fontanes de cultura“, insciö Kompatscher.

La Provinzia à scrit fora n concurs publich por l’assegnaziun de n post a tëmp plëgn sciöche colaboradëssa tecnica/colaboradù tecnich pro la Repartiziun 41 – Liber fondiar, Cataster fondiar y urban cun la sënta de sorvisc a Silandro. Le post ne é nia resservè a n grup linguistich. Les domandes po gnì dades jö ćina ai 07/10.

La biblioteca "Dr. Friedrich Teßmann" da Balsan mët da jì na seria de referać sön le svilup dl’architetöra y les conseguënzes dl influs dl turism sön la contrada y les costruziuns tla Val Badia y Gherdëna. Le pröm referat de Carlo Calderan sön le "Frabiché tla Ladinia" vëgn tignì en jöbia, ai 18 de setëmber dales 18 tla Teßmann.

8,18 miliardg de euro: chësc é le valur complessif dl patrimone dla Provinzia de Balsan. La Repartiziun Patrimone à en gestiun indöt proprietês por n valur complessif de 4,168 miliarg de euro, laprò röiel 2,668 miliarg de euro de strades y le patrimone dla Laimburg, dl demane forestal y dles ressurses idriches. L’ospedal da Maran à la valüta singula plü alta: 164,5 miliuns de euro.

Hanspeter Staffler, ćina incö diretur dla Proteziun zivila, é le diretur general nü dla Provinzia de Balsan. Staffler é gnü presentè incö danmisdé (11 de setëmber) dala Junta provinziala. „Le candidat Staffler é gnü chirì fora do n prozès de seleziun lunch y detaiè, i sun sigüsc de avëi ciafè la porsona dërta por chësta inćiaria“, à dit le Presidënt Kompatscher.

Incö danmisdé (11 de setëmber) s’à incuntè la Junta por mët man la discusciun sön le bilanz de previjiun por le 2015. La pröma analisa dles zifres prevëiga n trend tl vers dla stabilité: la soma complessiva dles entrades dla provinzia por le 2015 é preodüda de ester de 5,2 miliarg de euro, che gnarà smendrida a 4,5 miliarg por gauja dles resserves che messarà gnì metüdes da pert.

Por aumentè la segurëza sön strada y les conescënzes sön na mobilité plü ecologica, mët a jì les Repartiziuns Sorvisc Strades y Mobilité la campagna d’educaziun y de sensibilisaziun „S.O.S. Zebra“. L’assessur por la mobilité y le sorvisc strades Florian Mussner presentarà te na conferëza stampa ai 18 de setëmber dales 09:00 les ativitês preodüdes tla cornisc dla campagna.