Comunicat stampa

Le monn dla laûrs di andri Ursus ladinicus, süa descurida, süa vita, les particolaritês y le tesur dl ander de Conturines: chëstes é les tematiches dl referat dl paleontologh Herwig Prinoth en mertesc, ai 26 de agost, dales 21:15 tla Ćiasa de Cultura Jan Batista Runcher a San Ćiascian. Le referat gnarà tignì por talian, l’entrada é debann.

Sides te Gherdëna sciöche inće tla Val Badia à i programs d’assistënza "L’isté di mituns" (Gherdëna) y "La scolina da d’isté" (Val Badia) podü registré na buna partezipaziun de mituns y à confermè insciö le gran interès da pert di geniturs. Da püch é i programs d’assistënza d’isté por mitans y mituns tla Val Badia y te Gherdëna gnüs stlüć jö.

Tania Cagnotto é (indô) campiona europeica. Incö (mercui ai 20 de agost) à l’atleta da Balsan davagné a Berlin la medaia d’or tla disciplina de salt dal trampolin da un en meter, süa ventejima medaia, de chëres bëgn trëdesc de or.

En ocajiun dla festa dla cité vedla (Altstadtfest) de Porsenù la proscima fin dl’edema dai 22 ai 24 de agost vëgnel organisé n sorvisc de trasport aposta da y por Porsenù dales localitês dlungia la cité.

La situaziun atuala y i svilups tl dagnì dla colaboraziun tl setur dla sanité danter la Provinzia de Balsan y le Land Tirol é stà al zënter dl’incuntada ai 18 de agost danter l’assessuria por la sanité Martha Stocker y l’assessur dl Land Tirol Bernhard Tilg adöm cun rapresentanć y direturs di ospedai y dla sanité dl Tirol (Tilak).

Les deliberaziuns por ći che reverda le „bonus energia“ nü aprovades ai 5 de agost dala Junta provinziala y les diretives nöies sön l’efiziënza energetica di frabicać é gnüdes publicades incö (mertesc, ai 19 de agost) tl Boletin ofizial dla Regiun y jarà en forza indoman.

Por merit di contribuć por le ressanamënt dl ambiënt che vëgn paià fora dal’aziënda SE Hydropower Srl, che à en gestiun 10 implanć idroeletrics tl Südtirol, po i Comuns interessà y la Provinzia finanzié tres investimënć de plü proieć de mioramënt dl ambiënt y dla contrada.

Teatri scolastics y n concurs artistich: döes é les scomenciadies che la Repartiziun Cultura y Scora Ladina metarà a jì, adöm cun la Consulta Provinziala por le grup linguistich ladin, por l’aniversar dl scomenciamënt dla pröma vera mondiala tl 1914, che à portè cun l’ingrès te vera dla Talia tl 1915 a combatimënć amesa les Dolomites. Tl zënter dles scomenciadies saràl i scolars y i artisć.

Ai 5 de setëmber, Dé dl’Autonomia, vëgnel chësc ann organisè na scomenciadia particolara: la Provinzia mët insciö a jì por chësta ocajiun n Dé dla Porta daverta, tratan chël che düć i interessà po ti dè n’odlada al’aministraziun publica y ales ativitês da vigni dé ti ofizi publics dla Provinzia. La plata internet cun dötes les informaziuns sön le Dé dl’Autonomia é da püch online.

Vera, terorism, jënt che mëss s’un sciampè y lascè sües ćiases y abitaziuns: la popolaziun tl Irak y tla Siria é tl zënter de conflić violënć cun conseguënzes tragiches por la jënt sön le post. La Provinzia de Balsan à metü a jì te trami dui i Stać proieć d’aiüt, che dess dandadöt portè aiüt ai mituns y ai jogn de families sciampades dala vera.