Comunicat stampa

En sabeda, ai 11 d’otober 2014, vëgnel organisé por le terzo iade le Dé internazional dles mitans. La scomenciadia é gnüda metüda a jì dales Naziuns Unides tl 2011, l’assessuria competënta Martha Stocker y la Presidënta dla Consulta por l’avalianza dles oportunitês Ulrike Oberhammer anüza chësta ocajiun por recordè l’importanza da sostignì les mitans te so svilup por plü independënza y autostima.

Aprofondì le conzet de na buna aministraziun, garantì prozesc efiziënć y n’adoranza prezisa dles ressurses y ofrì sorvisc de cualité: chisc é i obietifs dl proiet „Aministraziun inovativa 2018“, che sarà al zënter de na Conferënza danter le Presidënt Kompatscher, l’assessuria Deeg y le Diretur general Staffler ai 15 d’otober a Balsan.

La Repartiziun Frabiches y sorvisc tecnich inviëia por le 13ejimo iade a n seminar sön l’architetöra. La tematica zentrala sarà chësc iade le conzet de „corporate architecture“. La manifestaziun, che é ponsada dandadöt por architëć, injiniers y tecnics, vëgn inaugurada en mercui, ai 15 d’otober tla sënta dl’Université da Balsan dales 9 dal assessur por i laûrs publics Christian Tommasini.

La Ministra por l’istruziun Stefania Giannini gnarà indoman, jöbia ai 9 de otober, a Balsan por s’incuntè cun rapresentanć dla scora dl Südtirol.

L’oferta di programs radiofonics digitai y süa rezeziun sön döt le teritore gnarà amplià dai 15 d’otober inant: da öna na pert gnaràl metü en ona programs nüs, dal atra pert gnaràl inće amplié la rezeziun dl radio digital sön döt Südtirol. L’oferta digitala nöia gnarà presentada en lönesc, ai 13 d’otober dales 12 te na conferënza stampa cun le Presidënt dla Junta Arno Kompatscher.

Cun apresciapüch 19 mile vijitadus s’à la Fiera dla formaziun "Futurum" y le campionat provinzial “Mistiers tla competiziun 2014” stlüt jö ai 4 de otober a Balsan. I vijitadus é aumentà de 3.600 unitês en confrunt al’ediziun dl 2012.

L’acordanza finanziara danter Balsan y Roma dess gnì metüda sön na basa iuridica sterscia, internazionala y de dorada lungia che prevëighes garanzies de planificaziun y n contribut de finanziamënt mënder co chël atual: Le Presidënt dla Provinzia à presentè incö (ai 7 de otober) ala Junta provinziala les diretives por les tratatives finanziares cun Roma.

Tl Südtirol él indöt 20.000 frabicać rurai, la maiù pert de chisc é tablà, majuns y üties da munt, che messass gnì registrà tl cataster di frabicać y relevà por la calcolaziun dla Cuta comunala sön i imobiliars (GIS, IMI). Chësta relevaziun burocratica é gnüda eliminada incö, ai 7 de otober dala Junta provinziala.

Le laûr de preparaziun por le bilanz de previjiun por le 2015 dla Provinzia de Balsan va inant. Les zifres é söporjö les medemes co chëres dl 2014. La Junta provinziala à aprovè incö (07/10) i terminns por l’aprovaziun dl bilanz: tratan la proscima edema él preodü n’incuntada cun les organisaziuns soziales, ai 28 de otober l’aprovaziun da pert dla Junta y dai 16 ai 18/12 la discusciun tl plenum.

Da incö é düć i dać di Libri fondiars dl Südtirol desponibls tres na racoiüda digitala: l’êra di gragn volums fondiars de papier é gnüda portada a fin incö lönesc, ai 6 de otober te döt Südtirol cun na zerimonia de contlujiun ofiziala tl Ofize dl liber fondiar de Balsan. Dui i vantaji plü significatifs: la scemplificaziun dl relevamënt di dać y n’anuzamënt plü asvelt.