Comunicat stampa

En ocajiun dl Dé mondial por migranć y profugs ai 16 de jenà recorda l’assessuria Martha Stocker che les tematiches che reverda i profugs ne é nia estlusivamënter na sfidada locala dl Südtirol o de d’atres Regiuns, mo che reverda döta l’Europa y che po ma gnì davagnada lauran adöm. "Cun la pröma assistënza söl Prener y cater d’atres strotöres dunse nosc contribut", sotlignëia Stocker.

Cun incö, jöbia ai 15 de jenà él piè ia na fasa nöia por ći che reverda la digitalisaziun dles prescriziuns di doturs tl Südtirol. Les rezetes scrites a man sön le papier dess gnì baratades fora vare por vare cun rezetes eletroniches. „Insciö saràl poscibl da dè inant les rezetes plü debota“, à sotligné l’assessuria Martha Stocker tratan la presentaziun a Balsan.

Da atira inant y ćina ai 31 de merz dl 2015 pol gnì presentè domanda por contribuć de spëises de iade por l’ann 2014. Implü él stè meso da paiè fora i aretrać pro i contribuć di pendolars abinà sö ti ultimi agn. "La Junta provinziala à metü a desposiziun l’ann passè feter 5,5 miliuns de euro implü por paiè fora i aretrać", recorda l’assessur por la mobilité Florian Mussner.

Ćina ai 9 de forà podarà porsones interessades a n curs de formaziun trienal por mënacrëp presentè na domanda d’iscriziun por fà l’ejam pratich d’amisciun.

La Junta provinziala à azetè incö (13/01) les dimisciuns de Andreas Fabi sciöche diretur general dl’Aziënda sanitara dl Südtirol. Contemporaneamënter él gnü aprovè la prozedöra por la seleziun por la nominaziun dl diretur general nü.

Na colaboraziun danter i dui aeroporć de Balsan y Desproch é gnüda aprofondida inier (12 de jenà) a Balsan dal presidënt dla Provinzia Arno Kompatscher y dal assessur Florian Mussner cun l’assessuria tiroleja Patrizia Zoller-Frischauf, l’ombolta de Desproch Christine Opitz-Plörer y i capi dl post d’ateraje tirolej. N grup de laûr studiarà les poscibilitês de na cooperaziun.

Do l’acordanza arjunta tratan la tlausöra à la Junta provinziala aprovè incö (13/01) le dessëgn de lege che reverda la reforma dl ordinamënt dl personal. „L’aprovaziun da pert dla Junta porta a fin un di percursc prinzipai dl proiet dl’inovaziun aministrativa 2018“, insciö l’assessuria por l’aministraziun Waltraud Deeg.

I 88 miliuns de euro dla cuta IRAP che les aziëndes dl Südtirol paiarà demanco tl 2015 gnarà registrades dala Provinzia sciöche n smendrimënt dles entrades, mo porchël ne saràl degügn tais di finanziamënć te d’atri seturs. „I ùn bele calcolè ite la diminuziun dles entrades de 88 miliuns de euro che gnarà recuperades tres la dotaziun dër alta dl fonds de rotaziun“, insciö le presidënt Kompatscher.

Le Südtirol alda pro les arees plü digitales dla Talia y é ćinamai al pröm post por ći che reverda i azesc internet dles families (73,4%): chisc é i dać che vëgn presentà dales inrescides nöies dl ISTAT sön l’adoranza dles tecnologies modernes de comunicaziun: „L’adoranza dl internet é aumentada de valgügn punć prozentuai en relaziun al 2014“, sotlignëia l’assessuria provinziala Waltraud Deeg.

Dl 2015 paiarà les impreses dl Südtirol zirca 88 miliuns de euro de manco de IRAP: chësc por mirit dl arbassamënt dla basa imponibla IRAP che la Provinzia – sön proposta dl presidënt Arno Kompatscher – ô rezepì daldöt dala normativa preodüda a livel statal.