Comunicat stampa

Sön les trasses dla ferata locala él gnü registré d’otober indöt 932.682 timbradöres. „Al é le valur de timbradöres plü alt che é gnü registré da tres te un n mëis tl Südtirol, y al é la testimonianza che l’oferta ampla de ferates locales vëgn anuzada tres de plü dai utënć“, sotlignëia l’assessur por la mobilité Florian Mussner.

Le plann de setur nü por i implanć portamunt y por les pistes da schi é gnü presentè inier (17 de dezëmber) dal assessur competënt Richard Theiner: la Provinzia à svilupé n plann de dorada lungia che à sciöche obietifs le sparagn de ressures, la scemplificaziun dla burocrazia, la sconanza dl ambiënt y dantadöt n aumënt dla cualité tl setur da jì cun i schi.

Na seria de carateristiches tecniches dl proiet che reverda l’eletrificaziun dla linia dla ferata dla Val Venosta é gnüdes aprovades incö (16/12) dala Junta provinziala che ti à dè l’inćiaria por la planificaziun dl proiet ala STA y a Südtirol Finance y che prevëiga n investimënt de 56 miliuns de euro. Implü él gnü aprovè n’acordanza cun le gestur dla rëi dla forza eletrica nazionala Terna.

Les diretives nöies sön i apalć de fornidöres, sorvisc y operes publiches é tl laûr da gnì laurades fora sön inćiaria dla junta provinziala, che à aprovè incö (ai 16 de dezëmber) les bases y i obietifs dl dessëgn de lege che vëgn. Da jenà laôron sön i articui cun les perts interessades, de merz le dessëgn de lege.

La Junta provinziala à aprovè incö le test de lege en discusciun al Senat sön le pat de garanzia danter Roma y Balsan che reveda le finanziamënt dl’Autonomia. "I ùn aprovè la pert che reverda le pat de garanzia tla lege de stabilité, deache dötes les acordanzes é gnüdes respetades“, à splighé le Presidënt Kompatscher.Intratan à le premier Renzi firmé la comunicaziun scrita por Viena.

Dai 11 - 13.12 iel unì tenì a San Martin n workshop sun la traduzion leterera. "La leteratura ladina ie scialdi viva y davia che l ie mé n pitl cërtl de letëures iel mpurtant jì la streda dla traduzion per fé cunëscer nosta produzions letereres“, à spligà Alexander Prinoth, Diretëur dla Repartizion Cultura Ladina che à metù a jì l workshop adum cun Rep. Cultura tudëscia y la Cësa Editëura Folio.

Passè dala ferata diretamënter sön la pista dai schi: da śëgn é chësc passaje inće poscibl tl raiun da jì cun i schi dl Helm, tl’Alta Val de Puster, olache al é gnü inaugurè dan da püch dal assessur por la mobilité Florian Mussner y dal’assessuria tiroleja Ingrid Felipe la staziun dla ferata nöia de Vierschach-Helm – na pera miliara dla mobilité che coliëia l’Euregio.

„Les ferates diretes é n sëgn concret dl’Euregio che i zitadins po anuzé tresfora y nes mostra les gran poscibilitês che la colaboraziun danter les trëi provinzies porta cun sè“ chësc à dit le presidënt Arno Kompatscher, che à presentè incö a Desproch adöm al presidënt dl Tirol Günther Platter i coliamënć cun la ferata danter Desproch,Balsan y Lienz y n proiet de cooperaziun por tarifes coletives.

Di 308 insegnanć dles scores ladines dla Provinzia da Balsan, ne à incö, vëndres ai 12 de dezëmber, 17 nia laurè fajon para al scioper di impiegać publics. La porcentuala che à fat para a chësta protesta é insciö de 5,5 porcënt.

En domënia, ai 21 de dezëmber, gnaràl presentè dal assessur por la cultura ladina Florian Mussner dales 15.30 tl Museum Ladin Ćiastel de Tor a San Martin n catalogh nü realisé en ocajiun dla mostra “Le cör dla ćiasa – La stüa tla Val Badia”. La mostra sarà da odëi indô dai 26 de dezëmber, dé dla daurida invernala dl Museum Ladin a San Martin.