Comunicat stampa

Proieć culturai y n concurs artistich en gaujiun dl centenà dla Pröma Vera Mondiala, la promoziun dla leteratöra ladina, le Dé dla Cultura Ladina y la lege nöia che reverda la promoziun dla cultura sarà cater dles tematiches zentrales dl Departimënt Educaziun y Cultura Ladina tl ćiamp cultural por l’ann 2015.

L Museum Ladin mët a jì en cunlaurazion cun l Servij ai Jogn dla Val Badia n workshop per jëuni danter i 14 y 20 ani per mparé a fé videospots y videoclips nce tres l’adurvanza de n drohne. L curs unirà fat dai 14 ai 20 de fauré dl 2015 y à n priesc simbolich de 10 Euro. Se nuté su possen pra l Sorvij ai Jogn dla Val Badia entro i 5 de fauré 2015.

Anuzè les staziuns dla RAS te na manira otimala, menè fora informaziuns dla proteziun zivila te na manira capilara y alisiré le finanziamënt dles emitënzes locales: chisc é i obietifs dla convenziun nöia aprovada incö (27/01) dala Junta provinziala por ći che reverda l’anuzamënt di implanć de trascmisciun dla RAS.

La Junta provinziala à aprovè incö (27 de jenà) l’inserimënt dles aodles speziales por les inieziuns d’insulina ai mituns. Chëstes adoles dër sotides à le vantaje che ares smendrësc le mé di mituns tratan l’inieziun. Les aodles gnarà metüdes ite tl register dles medejines dal 1. de aurì dl 2015 inant.

La Junta provinziala à alzè incö (27 de jenà) dl 28 porcënt i mesi finanziars por le sorvisc zivil volontar che porta para n aumënt de 120 posć (a 330 posć indöt) che la Provinzia metarà a desposiziun por le 2015. Por realisé chësc fin à la Junta provinziala aprovè indöt n investimënt de 1,4 miliuns de euro.

Plü mostres speziales, söporjö 800.000 vijitadus, ofertes por mituns y families, vijites tematiches, proieć d’inrescida, publicaziuns scientifiches y referać: l’Aziënda „Museums provinziai“ à organisé tratan l’ann 2014 plü scomenciadies y proieć che à confermè le gran interès de pići y gragn, sciöche inće dla jënt dl post y turisć.

La biblioteca provinziela "Dr. Friedrich Teßmann" a Bulsan urganisea n sada, ai 31 de jené na festa aldò dl moto “Cin valedes – cin sënsc” per la fin dla lingia de scumenciadives “Per ejëmpl la Ladinia”, cun chëles che l ie unit presentà de plu tematiches dl mond ladin. L program de festa mët man dala 10:30 y durerà nchin dala 20 da sëira cun mujiga, film, bal, letures y delicatësses culinaries.

Le parch technologich é un di proieć zentrai por le svilup dl Südtirol tl dagnì: te na conferënza stampa ai 2 de forà saràl le presidënt dla Provinzia Arno Kompatscher che presentarà a Balsan Süd, adöm ai suranstanć de BLS y TIS, les proscimes tapes por la realisaziun dl proiet.

La Consulta provinziala nöia por les families é formada da indöt 19 mëmbri y s’à incuntè incö (23 de jenà) a Balsan por süa pröma sentada. Öna dles competënzes primares dla Consulta é chëra de aconsié la Junta provinziala pro chestiuns y mosöres che reverda les families. „Cun l’aumënt di mëmbri ùnse orü ti dè n maiù pëis ala Consulta“, à sotligné l’assessuria por les families Waltraud Deeg.

„La produziun ecologica po imparè dala produziun integrada y insciö inzescü“, chësc à dit inier (22/01) l’assessur por l’agricoltöra Arnold Schuler tratan le semiar "Bioland Südtirol" sön le lian danter l’ecologia y l’agricoltöra. Söporjö 200 partezipanć, danter chisc inće le suranstant dl „Bioland Südtirol“ Michael Oberhollenzer y la direturia Jutta Staffler, s’incunta dui dis söl Ritten.